1 Pofi amweesi me kaka nzali wu munene wa mamba ma moonyi, wu akamwedeme we manya li mulingu. Nzali mo akapala hutso a kiti-ipfumu hya Nzambi na hya Mwana Limeme, 2 na akayene ŋa butima bu litandala li musyenge. Muti a moonyi ayala manganzi mu pasi simu la nzali. Nde ubaabuta mbutu mbuta kuumi na yoole mu ilima, buta limosi mu pasi tsuungi. Makaya ma nde bubaasalila mo mu ubeeloso mabuli. 3 Huuna a hubweba na isiha tso imosi hi hyuba na tsingili a Nzambi ve. Kiti-ipfumu hya Nzambi na ya Mwana Limeme sa yiba hutso musyenge, na basalili ba Nzambi buukuunda nde. 4 Bo sa bamono hiinzi hya nde, na nduhi a nde sa basonehe mu mabunzu ma bo. 5 Butsuhu a buubweba ve, na bo a buubweba na nzala liyalala la mwinda tso la taangu ve, mu tooni ati, Pfumu Nzambi upuhala bo liyalala la nde. Na bo sa batuma mu bilima na bilima.
6 Titswene, Pofi aleeli me: «Mambu mo maniima mali ma mbuli na ma usiila hiitu. Na Pfumu Nzambi wu asalili mimbihuli, amiitsindaha pofi a nde mu umweese huli basalili ba nde, mambu ma mu uya hu busu.» 7 Yisu ti: «Yuha, me a taamba mu uya ve! Kinya yili na ba bali mu ukeelese mambu ma mbihulili ma libuuku mo linili!» 8 Me Yowani, me anzuhi na me amoni mambu mo maana. Bu me amani uyuha na umono mo, me ambwidi ŋa miilu mya pofi wu amweesi me mo, mu ukuunda nde. 9 Ka pofi aleeli me: «Kele, a sa buuna ve! Me musalili we we me ndi, we baana ba ngu ba we mimbihuli, na we boosi ba bali mu ukeelese mambu ma libuuku mo linili. Ndulu Nzambi we afwana ukongemene!»
10 Titswene nde abweleele: «A swehe mambu ma mbihulili ma libuuku mo liniili ve mu tooni ati, taangu yi Nzambi haakese mu utswihasa misamu mo miniimi yika bebele. 11 Nyaha muutu wu ubaasa bubi, abaahwada mu ubaasa bubi, na muutu wu li wu asumaha abaahwada mu ubaasumaha. Muutu wu li mu usa mavaanga ma mabwe abaahwada mu ubaasa buuna. Muutu wu li wa ngidi, abaahwada hutso bungidi bwa nde!»
12 Yisu ti: «Yuha, me a taamba mu uya ve! Me tsa mbehe musyendo buuve tsundusu a muutu muutu we bu hu li mavaanga ma nde. 13 Me ni Alafa na Omenga, watsomi na wa tsyelele, mbandihili na tsukusu.»
14 Kinya yili na ba bali mu uswaha bikutu bya bo, mana bo babaha muswa mu udya mbutu muti a moonyi na ukoto hutso musyenge mu minywa mya nzo. 15 Ka hu mbadi musyenge hu li na: bamvwa, ba bali mu usalila bungaanga, banga bumbembo, badubi, basambili ba binzanzambi na boosi ba baatondo mapfuta na usalila mo!
16 «Me Yisu, me miitsindaha pofi a me mu uyabisa benu maana moosi, ma baatsindaha huli mabundu. Me ni wu imbisa hya nzo a Davidi. Mvwelele wu ubaamwedeme pasi ngwali.» 17 Livupu na Mukadi bali mu uleele: «Yaanga!» Nyaha wu li mu uyuha aleele: «Yaanga!»
Nyaha wu li na peyu a mamba aya. Nyaha wu toondi mamba ma moonyi ayaka mo bungodu.
18 Me Yowani, me ndi mu unzibusa mu mifudi myosi, wu li mu uyuha mambu ma mbihulili a libuuku mo linili: tso muutu bwesi isiha imosi, Nzambi sa abwese ŋa yulu a nde mapasi, we bu baasonehe mutso libuuku mo linili. 19 Na tso muutu maasi isiha ŋa yulu a mambu ma mbihulili a libuuku mo linili, Nzambi sa amaasa ikuuku hya nde hya mbutu muti a moonyi. Nzambi sa amaasa kaka ikuuku hya nde mu musyenge a ngidi, hi baasonehe mutso libuuku mo linili.
20 Mbangi wu li mu uyabisa imbuli hya mambu mo maniima moosi, li mu uleele: «Eye, me a taamba mu uya ve!»
Amen! Yaanga Pfumu Yisu!
21 Nyaha hyese hya Pfumu Yisu hiba na benu boosi!
/images/a/Tcg2NiV7ce24OT6kCIQGR)
/images/a/-h5KPk8ct3kLpCpYm9-g6)