1 Me Pahuli, ikondaayi hya Kristo Yisu, na mwaana a ngu Timoteho, lili mu usonehele muhanda mo wunuuwu huli Filemoni, tsyengi a bisu wu litondo. 2 Bisu lili mu usonehele nde ka huli Apiya, kedi a bisu, huli Arikiipe, mbaahi a bisu wu mudiingu, na huli libundu li lili mu ukuukama mu nzo a we. 3 Nyaha hyese na hyenze bi bimati huli Nzambi Taata a bisu na Pfumu Yisu Kristo, biba na benu.

4 Filemoni, me ndi mu upfutala matondo taangu yoosi huli Nzambi, na ubaasambila mu we. 5 Mu tooni ati, me ndi mu unzuha tsangu yi litondo li we li mu umweese huli bangidi boosi, na yi imiinu hya we mu Pfumu Yisu. 6 Me ndi mu upondo huli Nzambi, mana itwadi hi hili mu upfuuta bisu a benu mu imiinu, himonehele. Itwadi mo hina himonehele, mu mavaanga ma mabwe moosi ma luukuhasa mu usalila Kristo. 7 Mwana a ngu a me, litondo li we amweesi laaviidi me kinya yindahi na kwadili. Mu litondo mo liina, we ahwadisi kaka mitima mya ba banzuhisini ŋa hati li libundu.

8 Ni mu buuna, me ndi na bunyanga bu Kristo hamiiva me, mu uyabisa we isalu hi we afwana mu usa. 9 Me Pahuli, wu aka inunu na ikondaayi mu tooni a Kristo Yisu, me ndi mu upondo huli we, isiha imosi. 10 Me pondi huli we, mu uvanga lilibwe mu tooni a Onisimi, nde wu aka mwaana a me hutso a kondaayi huni. 11 Tsomi nde a haba na tsoongo huli we ve. Ka bunuubu nde ka na tsoongo huli we na huli me.

12 Bunuubu, me ndi mu upfutala we nde. Nde wu aka we mutima a me. 13 Me kiikeelese nde mana nde akumbasa me ŋa mbuha a we, bu me ndi mu kondaayi mu tooni a Tsaangu Yimbwe. 14 Ka me a hatondi usa pasi isiha hwavele ufuula matsimi ma we ve. Mana we a havanga lilibwe mu kwamisa. Ka we vanga lo mu mutima wu ayaluha.

15 Peleve Onisimi amiitahuha na we mu mwaana taangu hole, mana nde akwilala mu ubweba na we. 16 Ka bunuubu, nde a hasaali muviha ve, ka nde afulala tso muviha, mu tooni ati, nde li mwaana a ngu wu afulala talu na litondo. Eye, nde li na tsongo huli me! Ka nde sa afulala tsongo huli we mu busalili na mu bumwana bwa ngu mu Pfumu. 17 Buuna, tso we li wu abaambana na me, yaka nde we bu we uyaka me mwakulu. 18 Tso nde havangila we lilibi, buuve tso nde li na mukanu a we, suusa byo mutso a biita la me. 19 Me mwakulu ndi mu utsonehe mambu mo maniima mu hoho hwa me: «Me Pahuli, me tsa pfuta we mukanu mowuna.» We ayaba bubwe-bubwe ti, we na mukanu a me. Mukanu mo, ni moonyi a we. 20 Eye, mwaana a ngu a me, kumbasa me mu musamu mo wunuuwu mu litondo la Pfumu. Hwadisa mutima a me mu itwadi na Kristo. 21 Me ndi mu utsindaha we muhanda mo wunuuwu, na hiitu ti we sa vanga ma me ndi mu upondo huli we. Na me nzaabi ti we sa kuhasa hu hwafulala, bi me ndi mu upondo we. 22 Titswene, vangila me itini hya nzo hi ubwamina. Me ndi na hiitu ti mu tooni masambulu ma benu, me tsa nzapfutahala benu.

23 Epafasi wu uli mutso a kondaayi na me mu tooni a Yisu Kristo, tsindihi we mabwehe. 24 Malako, Arisitake, Demasi na Luuka, bambaahi ba me ba isalu, bo kaka batsindihi we mabwehe. 25 Nyaha hyese hya Pfumu Yisu Kristo hiba na benu.