1 Yibwala libundu moonyi, ti lo lafwana uyuhala na usiingala bakuutu na lituma la tsi. Lo lafwana uvangama mu ubaavanga moosi ma mabwe. 2 Bo muutu utuha ve, mitsotso ve. Ka bo bafwana uba baatu ba hyenze na bababwe, banga bulembo ŋa busu bwa baatu boosi. 3 Mu tooni ati, bisu ka hu mbandu, laaba biyahudi, banga kene ŋa busu bwa Nzambi na ba baadunga. Bisu aba baviha ba linyungi na makinya ma toto moosi. Idiingu hya bisu aba hutso bukanyi na linyungi. Bisu laakabelele bana na laakabelesene bisu mo na bisu mo. 4 Ka Nzambi Mufuhisi a bisu, mu taangu yi yafwana, amweesi bubwe bwa nde, na buni nde hafula utondo muutu. 5 Nzambi hafuuhisi bisu, a mu tooni ati bisu laavaanga mambu ma mabwe ve. Naana! Nde hafuuhisi bisu, mu bunene bwa kwili lingebe a nde mu bisu. Nde hafuuhisi bisu, mu taangu yi Livupu la Ngidi laaswahi bisu na laavidi bisu buta li linyatihi. 6 Nzambi apuhili bisu Livupu mo liina mu iteesi hi hyafulala, mu nzila a Yisu Kristo Mufuhisi a bisu. 7 Nde hasiidi buuna, mana bu buuteele bisu «ba bamiibinga» mu kolo-kolo a nde, bisu likituha babahi ba hiitu hya moonyi wu bilima na bilima. 8 Mo mali mambu ma mbuli. Na me tondi ti we kwilala mu usilasa misamu mo minimi, mana ba buusa hiitu mu Nzambi, bahwada mu ubaavanga ma mabwe. Mono ma mali ma mabwe, na ma tsongo huli baatu.

9 Ka baapeke usobosono hu munywa hu hwavele na lisunga, mu manduhi ma bakaaha ba benu. Kaapeke paha na midiingu mu musamu Mikele mya Moose. Mu tooni ati mbiili mo yiina, a yili ya tsalu na lisunga ve. 10 Wu ubehe buraandu ŋa hati li libundu, kebese nde kebese latsomi, titswene la moole. Bu nde avelisiinga, we afwana umasa nde mu libundu. 11 Mu tooni ati, muutu wa pila yina, amiidimbala nzila. Bu nde ali mu ukwilala mu masumu, nde li mu usyembe nyutu a nde mwakulu.

12 Me tsa tsindaha we Aritemisi na Tisiike. Bu bo buuyato, a hatamba mu uyabiisala me hu musyenge a Nikopolisi, mu tooni ati, ni huuna me upyoso mangala. 13 Ba na bukuhu mu uva likumbasa huli Zenasi, ngeele mikele, na Apoloosi mu byosi bi bo bali na byo nzala mu mudyenge. Sa buuna, mana bo a bakima mu pasi isiha. 14 Baatu ba bisu ka bafwana uhwada mu uva linyutu mu uvanga ma mabwe, mana bo bakumbasa ba bali na nzala likumbasa. Bo bavanga buuna, bo sa baba na tsongo.

15 Boosi ba bali itwadi na me, bamiiva we mabwehe. Va mabwehe huli ba baabaambana na bisu mu imiinu. Nyaha hyese hya Nzambi, hiba na benu boosi.