1 Ka we Tiite, longese ma maayelemene na ndongisili yi yasungama. 2 Leele huli babahala ba baakula, baba na mbiili yi yasungama na yi butsitu. Bo baafwana uba na tsiki, babaahwada mu imiinu, na mu litondo, na mu mukami.

3 Leele ka bumosi huli bakaasu ba baakula, bo baba na ndyatili yi yuumweese Nzambi kinya. Bo babaavelekusa, na uveleba baviha ba nwyili malamu yinono. Bo babaalongese ma mabwe, 4 mana banuumba batondo balumi na baana ba bo. 5 Bo bafwana uba banga butsitu na ba baatsyeme mu mitima. Bo bafwana uba na bisalili bibibwe, mu manzo ma bo ma makweele. Bo bafwana uluula mu bubwe na mu kulimini ŋa busu bu balumi ba bo. Buuna, muutu tso mumosi a hutwala ubaya mambu ma Nzambi ve.

6 Ni bumosi, hwadisa ka pfudu-mbahala, mana baba na tsiki mu bitoyili bya bo. 7 We mwakulu Tiite, afwana umweese mbiili yimbwe, mana baatu badukala ifwaani hya we. Ndongisili a we, yafwana uba ya mbuli na yi likiinzu. 8 Mikuma mya we myafwana uba mi myaleme, mi baatu buuvelesa paha. We usa buuna, bambene ba we buukwa tsonyi, na uvelebaha dyaambu li buusyembe bisu.

9 Tuma baviha, basingala bapfumu ba bo mu pasi dyaambu. Bo bafwana ubamweese bapfumu ba bo kinya, mu ubaaveletungalala bo, 10 na uveleyibala bo pasi isiha. Ka baviha bafwana umonehele taangu yoosi, basalili bababwe. Moosi ma bo buupalisa, bo baafwana uvangimasa mo. Bo bavanga buuna, baatu sa bava muyusu mu mambu ma bisu libaalongese mu Nzambi Muyobili a bisu.

11 Eye, Nzambi amweesi ma mabwe ma nde, mu tooni ati nde asooli nzila yi uyobolo baatu boosi. 12 Liyobolo mo lili mu ulongese bisu mu uveletahuha na Nzambi, na ubisa linyungi. Bisu livaanga buuna mu taangu mo yiniiyi, bisu luuba na idingu hya tsiki, hya tsiitsa na hi likiinzu mu Nzambi. 13 Ni buuna, bisu lafwana ukeele ilumbu hya kinya hi bisu lili mu usa hiitu. Ilumbu mo hina, Nzambi a bisu wu munene, wu uli Mufuhisi a bisu Yisu Kristo, sa amonehele hutso muyusu a nde. 14 Nde ayehuli nyutu a nde, mu unyahula ma mabi ma bisu moosi. Eye, nde anyahuli ma mabi ma bisu, mana nde akitula bisu ibaandu hya nde hi hyatsyeme, hi hili na lehemene mu ukuhasa mavaanga ma mabwe. 15 Ni mu buuna, we afwana ulongese na uhwadisa ba bubaayuhala we. We afwana usyembe libundu na ibahala hyoosi. Ba na buyedi, mana muutu tso mumosi a hapenye we.