1 Me Pahuli ndi mu utsonehele we muhanda mo wunuuwu. Ni me ndi muviha a Nzambi na iluumbi hya Yisu Kristo. Nzambi amiiva me isalu mu ubita baatu ba nde hamiisoolo, mu nzila imiinu. Nzambi amiiva me ka isalu hi uyabisa bo imbuli hi hyafwana, mana bo badyata mu mbiili ya ba baakiinza Nzambi. 2 Me ndi mu unzabisa bo imbuli, mana bo baba na hiitu hi ubaha moonyi wu bilima na bilima wu li mu Nzambi. Moonyi mowuna, Nzambi wu ubaavelepfuta, asiidi bisu nzuhisini umata pangili a tsi. 3 Mu taangu yi nde hasooli, Nzambi Mufuhisi a bisu, ayabisi mambu ma nde. Ndongisili mo yiina ni yi nde haviidi me mu ulongese baatu. 4 Ni huli we Tiite, me ndi mu utsonehe muhanda mo wunuuwu. We ni mwana a me wu litondo mu itwadi hi imiinu hi hyapfuuta bisu a we. Nyaha Nzambi Taata na Kristo Yisu Mufuhisi a bisu, basyeme we na uva we hyenze!

5 Me atsiisi we hu iliiŋa hya Kerete, mu umanisala isalu. Na we soolo bakuutu ba libundu mu pasi musyenge, mu usalila tumili yi me apiidi we. 6 Mukuutu libundu afwana uba wu avele masyembo, na nde utwala uba ikama ve. Baana ba nde baafwana uba na hiitu mu Kristo, na bo utwala umweese imbangi hi ibi mu ndyatili a bo, buuve umweese kene ve. 7 Pasi mutumi libundu, ahwama na mupfuna a mambu ma Nzambi. Nde afwana ubaaba muutu wu avele na masyembo. Nde utwala uba nga isaayi tso nga makesi ve. Nde utwala uba ikolo-mbungu, tso nga bisongi, tso nga ngaabi*. 8 Ka nde afwana uba muyaki a byenyi, buuna ni bubwe. Nde afwana utondo mavaanga ma mabwe, muutu nga tsiki, wu asungama, wa ngidi, wu ayaba ukuka linyutu la nde. 9 Mukuutu libundu afwana uba muutu wu akangama na mifudi, mu mambu ma mbuli, ma maabaambana na Tsangu ya Mbuli yi bubaalongese nde. Buuna, nde afwana uba muutu wu ubaahwadisa bakima, na wu ubaava bo ndongisili ya mbuli. Nde afwana uba na matwala ma usyembe ba bubaabisa ndongisili a nde.

10 Yaabaani ti, hu li na baatu ba banzuhisini ba bubaavelesingala bana na ba bubaapfuta bambaahi mu mambu ma maavele lisunga. Ŋa hati la bo, ba banzuhisini bali Bakristo ba baamata hu bula bu Bayudaayo. 11 We afwana ukala bo mu utoyo. Mu tooni ati, bo bali mu udimbasa imiinu hi mabuli ma baatu, mu ubaalongese ma mavelefwana. Bo bali mu ulongese mambu mo maana, mu tooni ati bo bayaka pfuta mu ngaabi. 12 Mumosi ŋa hati la bisu iliiŋa mo hiina, mumbihuli a bo mwakulu, aleeli bu: «Bisu Kerete bali banga mapfuta pasi taangu. Bo bali bibulu bi bukanyi, babolo na banga mubaka udya.» 13 Imbangi mo hinihi, hili hya mbuli. Ni mu buuna, fwengele bo na mifudi, mana bo basa imiinu hya mbuli. 14 Bo babwevelekangama mu masahu ma ikulu hi Bayudaayo. Bo babwevelekangama mu mikele mya baatu ba bali mu utehele mambu ma mbuli mbisa. 15 Byosi bili bi byatsyeme, huli ba bali batsyeme. Ka isiha tso imosi a hili hi hyatsyeme, huli ba baasumaha na ba baavelesa hiitu ve. Mu tooni ati, buyedi bwa ba baasumaha na matsimi ma mitima mya bo, bili bi byasumaha. 16 Bo bali mu uleele ti bo baayaba Nzambi. Ka mavaanga ma bo, mali mu umweese ti bo bubaatunala nde. Bo bali banga muwala, ba baavele na lisingala, na ba baavelesa isalu tso imosi hi ibwe.