1 Me tumi we ŋa busu bwa Nzambi, na ŋa busu bwa Yisu Kristo wu utsundasa ba bali moonyi na babaakwa, bu nde hu uyamonehele mu Ipfumu hya nde. 2 Yabisa Mambu ma Nzambi, na mukonono, tso mu taangu yimbwe, tso mu taangu yimbi. Pamina, syembe, hwadisa baatu na kwilala mu ulongese bo na mukami woosi.

3 Ka sa huba na taangu yi baatu bu ubwevelekunda ndongisili a mambu ma mbuli. Ka mu mapeyu ma bo mwakulu, bo sa bakangama mu ndongisili yi milongisi mi milahi, we bu hwafwana na mapeyu ma bo mwakulu. 4 Bo buudibuha matswi ma bo, mu uveleyuha imbuli. Bo buukinguha mu ubaayuha makuma ma mapfuta. 5 Ka we, kuta linyutu la we mu moosi. Kunda mapasi, yabisa Musamu wu Mubwe, na kuhasa bu hwafwana isalu hya we hi musalili a Nzambi.

6 Me Pahuli, me ndi mu umono ti taangu a me yaka bebele mu uyeholo muvumu a me we bungodu bu musiitu huli Pfumu. Tangu a me yi ukwa yimiito. 7 Me miindwana mudiingu we bu hwafwana mu ulwana. Me miitsukasa tiinu a me na me miikeelese imiinu. 8 Bunuubu, bamiiswehele me mutata a butsiitsa, humbisa a mbingili a me. Pfumu, nzonzi wa tsiitsa, wu utsundasa bu hwafwana, uva me mutata mo ilumbu mo hiina. Nde uva mutata, ndulu a huli me ve, ka napa huli boosi ba bali na lehemene bibaayaka ukeele monihili a nde.

9 Leenge, sa moosi ma we utwala, we yabiisala me matsuhu mo maniima. 10 Yanga yabiisala me, me akasiha, mu tooni ati Demasi amiitimba me. Nde amiikangama mu makinya ma toto. Nde miiyene hu musyenge a Tesalonika. Keresenisi miiyene hu tsi a Ngalatiya, na Tiite hu tsi a Dalamatiya. 11 Ndulu ni Luuka bibaayaka na me. Buuna, yanga we mwakulu na Malako, nde na tsongo mu me na mu isalu. 12 Me miitsindaha Tisiike hu musyenge a Efeso. 13 Ŋa we uya, behele me iyunga hi me atsiisa hu musyenge a Tolowasi mu nzo a Karaposi. We behi kaka mabuuku, homo ma mikobo mi bibulu. 14 Alekizandi, mutsuli bitali, avangila me ma malahi ma maafulala bubi. Pfumu usyembe nde we bu huli mavaanga ma nde. 15 Baakele na nde we kaka, mu tooni ati, nde atelemene ndongisili a bisu mu mifudi.

16 Ŋa me anzakala nyutu a me kala latsomi, muutu tso mumosi a havolili me mileembe ve. Baatu boosi baatiimbi me. Nyaha Nzambi avengolo bo lo! 17 Ka Pfumu ni wu avolili me mileembe. Nde aviidi me mifudi, mana me twala uyabisa bo Musamu wu Mubwe, mana baatu ba matsi ma bangoyi kaka bayuha nde. Na nde ayobili me mu munywa a kosi. 18 Pfumu ubiingasa me mu mavaanga moosi ma mabi. Nde uyobolo me na ukotese me mu Ipfumu hya nde hi mayulu. Muyusu aba huli nde mu bilima na bilima! Ameni!

19 Va bwehe huli Pilisile, Akilasi, na baatu ba nzo a Onezifole. 20 Erasite miisaala hu musyenge a Koliito. Me miitsisa Tolofime, hu ngulu makuumbi ma nzali a musyenge a Mile, hutso bubeedu. 21 Leenge mu uya, tswamina ndolo mu uto. Ebulusi, Pudenesi, Linyusi, Kolodiya na baana ba ngu boosi, batsindihi we bwehe.

22 Nyaha Pfumu aba na we, na hyese hya Nzambi hiba na benu.