1 Me Pahuli, iluumbi hya Yisu Kristo, mu litondo la Nzambi. Me ndi iluumbi mu uyabisa moonyi wu bilima na bilima, wu Nzambi hasiidi nzuhisini huli ba baakangama mu Yisu Kristo. 2 Me ndi mu utsonehele we Timoteho, mwaana a me wu litondo: Nyaha Nzambi Taata na Yisu Kristo, Pfumu a bisu bava we hyese, litondo na hyenze.

3 Me ndi mu upfutala ŋa matondo huli Nzambi, wu me ndi mu utsalila we bakaaha ba me, na matsimi ma me ma maatsyeme. Na me umbanzibwala moonyi mu we, butsuhu na nyangu, mu masambulu ma me. 4 Me ndi mu unzibwala moonyi mu matsanga ma we*, na me na lehemene bibaayaka ubwemono we, mana me ndula mu kinya. 5 Me ndi mu unzibwala moonyi kaka mu hiitu hya we hya mbuli. Ni hiitu hya mu Nzambi hiina, kaaha a we Loyisi na ngu a we Enisi, baabedi na hyo. Me ndi mu umono ti we kaka ka mu usa hiitu mu Yisu.

6 Ni mu buuna, me ndi mu unzibwala we moonyi mu udukasana mbaahu bungodu. Ni hyese hya Nzambi hiina, hi we ayaki ŋa me atsuusili we myoho. 7 Mu tooni ati, Livupu bibaayaka Nzambi hava bisu, a bibaayaka uba yombidi ve. Ka lo lili la kwadili, bibaayaka litondo na bibaayaka isusi.

8 Ni mu buuna, a hamono tsonyi mu imbangi hi we usa mu Pfumu a bisu. A hamono kaka tsonyi mu me, wu uli kondaayi mu tooni a Pfumu. Ka siinga umono pasi na me mu Musamu wu Mubwe, mu mifudi mi Nzambi ubaava.

9 Nde ni wu ayobolo bisu,

na wu ateele bisu mu mbila ya ngidi,

a mu tooni mavaanga ma bisu ma mabwe ve,

ka mu tooni a kesili a nde mwakulu

na mu tooni bubwe bwa nde.

Nde asa bisu kolo-kolo a nde mu Yisu Kristo,

tswamina mbandili a taangu.

10 Ka nde amiimweese bisu bwo taangu yiniiyi,

mu monihili a Muyobili a bisu Yisu Kristo.

Nde ni wu asukasa matwala ma lipfu,

na mu Musamu wu Mubwe, nde amweese moonyi wu ubaavelekwa.

11 Ni mu Musamu wu Mubwe, Nzambi habyalisa me we iluumbi hya nde na mulongisi. 12 Na, ni mu buuna, me ndi mu umono mapasi mo maniima. Ka me a handi na tsonyi ve, mu tooni ati me nzaabi mu na me atsa hiitu hya me. Me na hiitu mu nde, wu uli na matwala ma ukeelese bi nde hava me, natee mu ilumbu hya tsundusu. 13 Volo ifwaani mu ndongisili ya mbuli yi me anzabisa we, na hwada mu imiinu hya Nzambi. Titswene, hwada mu utondo baatu mutso itwadi hya na Yisu Kristo. 14 Keelese mandoongi ma talu, ma we ayaka mu likumbasa bibaayaka Livupu la Ngidi bibaayaka lili mu bisu.

15 We bu we yabi, boosi ba itaanzi hya Asiya, baamiitimba me. Baatu we Fizeli na Emozeni. 16 Ka nyaha Pfumu alusa kwili a nde lingebe mu nzo a Onezifole, mu tooni ati nde akahwadisa me taangu yoosi. Na nde a hamono tsonyi mu me wu uli mu kondaayi ve. 17 Bu Onezifole hayato hu musyenge a Looma, nde asahi me na lehemene loosi, natee bu nde hayasoolo me. 18 Nyaha Pfumu ataasila nde, mu kwili lingebe a nde, mu ilumbu hya tsundusu! We afula kaka uyaba ma mabwe moosi ma nde havangili me hu musyenge a Efeso.