1 Nyaha boosi ba bali mu panga buviha, babaakiinza bapfumu ba bo we ba baakuha, mu uyaka muyusu woosi. Vaangaani buuna, mana pasi muutu a harokolo nduhi a Nzambi na ndongisili a nde. 2 Na, baviha ba bali na bapfumu banga imiinu, a baafwana upenye bo ve, bu bo bali baana ba ngu. Ka bo baafwana ubaasalila bo hu unzuhisini, bu bo bali banga imiinu na bambaahi ba litondo, ba bubaayaka likumbasa la bo lilibwe.

Maana ni ma we afwana ubaalongese na ubaatuma baatu. 3 Tso muutu li mu ulongese mandoongi makima, ma maasobono na mambu ma mbuli ma Pfumu a bisu Yisu Kristo, buuve ma maasobono na ndongisili yi yibaayusa Nzambi, 4 nde wuuna aluula mu isaayi. Muutu wa pila yiina, a hayabi isiha tso imosi ve. Nde na bubedu bwa paha mu tooni mikuma. Maana ni ubaabuta nyengi, ukakana, bituhi, na utsima mambu ma mabi mu bana. 5 Mo mu baabehe kaka ukakana hu hwavelefwa, ŋa hati la baatu banga buyedi bu bwatengeme. Bo a baabweyaba imbuli ve. Bo bubaatsima ti imiinu mu Nzambi, ni nzila yi ubahila busina.

6 Mu mbuli, imiinu mu Nzambi ni nzila yinene yi busina, tso muutu li mu umono kinya mu bi Nzambi hava nde. 7 Mu tooni ati, bisu a laabehi isiha tso imosi ŋa laayidi ŋa tsi ve. Ni bumosi kaka, a luutwala ubita isiha tso imosi ve, ŋa luusisa tsi mo yiniiyi. 8 Ni mu buuna, tso bisu lili na byudya, na bikutu, biina byukuha huli bisu. 9 Ka baa bubaasaha uba bisina, baamiibwa mu lobese na mu mweto manzala ma mabi ma maavele na tsongo. Manzala mo maana mu baabiyasa baatu na ubita bo hu lipfu. 10 Ka nzuki a mbongo, ni nzila a bisiha byosi bibibi. Mwana a kabu la baatu mu nzuki a mbongo, baatahuhi na imiinu hya bo, na baakwamisi linyutu la bo mwakulu.

11 Ka we muutu a Nzambi, bata maana moosi. Saha mbiili butsiitsa, muyusu a Nzambi, imiinu, litondo, mukami, na isusi. 12 Lwana mudingu wu afwana wu imiinu. Kanga moonyi wu bilima na bilima wu Nzambi haateeli we mu nde. Moonyi mo wuuna, ni wu we asiingi ŋa we abinuhi mu udukala nzila imiinu, ŋa busu bu bambangi ba banzuhisini. 13 Me ndi mu utuma we lo ŋa busu bwa Nzambi, wu ubaava moonyi huli bisiha byosi. Ŋa busu bwa Yisu Kristo, wu atiidi imbangi hi ibwe ŋa busu bwa Ponse Pilaato, me utuma we mu 14 ubaakeele mukele wu we ayaki na uba wu atsyeme na wu avele na masyembo, nate bu Pfumu a bisu Yisu Kristo hu uyamonehele.

15 Yisu Kristo uyafutaha, mu taangu yi Nzambi hakese.

Nde ni Nga Matwala moosi,

Nga Kinya,

Mutumi batumi,

Pfumu bapfumu,

16 ndulu ni nde wu uvelekwa.

Nde ubaatsahala hutso liyalala,

li pasi muutu huvelekunda,

mu ubeleme na lo.

Muutu tso mumosi kini a hamoni nde ve,

tso utwala umono nde ve.

Nyaha muyusu na matwala biba huli nde,

mu bilima na bilima! Ameni!

17 Leele huli banga busina baa tsi mo yiniiyi, baveleba na isaayi. Leele bo bavelesa hiitu hya bo mu busina bu bubaadimbala, mu tooni ati, bwo a buudinga ve. Ka nyaha babaasa hiitu hya bo mu Nzambi, wu ubaava bisu byosi bi byafulala, mana bisu liba mu kinya. 18 Tuma bo babaavaanga ma mabwe, bo baba bisina mu mavaanga ma mabwe, mu umonehele banga a lehemene li ukabila bana. 19 Buuna, bo buukukaha busina bu bubwe na bu bwavangama bwa hu busu, na ukaanga moonyi wa mbuli.

20 Ho! Timoteho! Keelese isalu hi Nzambi hava we. Peke bileedi bi butsudu, na mikuma mi myasobono na imiinu. 21 Bamosi baasiingi ndongisili yi mapfuta yiina, we yi yaaba ya mbuli. Na bo baadungi nzila imiinu.

Nyaha hyese hya Nzambi hiba na benu!