1 A hasyembe mukuutu libundu na bukanyi, ka longese nde mu bulembo we taata a we. Longese kaka pfudu-mbahala we baana ba ngu a we. 2 Longese bakaasu ba baakula we bangu ba we, na banuumba we bibusi bya we, mu mutima wu atsyeme.

3 Baakiinza bakwili ba bakaasu ba baavele na bakumbisi. 4 Tso mukwili li na baana buuve batehudu, bo baafwana umaamweese ukangama hwa bo mu Nzambi, mutso manzo ma bo, titswene ufutala ma mabwe ma bo baayaki huli bataata na bangu ba bo. Maana ni ma kinya huli Nzambi. 5 Mukwili wu amiisaala siha vii, asusa hiitu hya nde mu Nzambi. Nde li mu ukwilala mu mapondili na masambulu huli Nzambi butsuhu na nyangu. 6 Ka mukwili wu ubaadyata mutso makinya ma tsi, nde amiikwa, tso bu nde ali moonyi. 7 Mono matumili ma we afwana uva bakwili, mu uyibusa bo, mana bavelesyembe bo. 8 Tso muutu a hali mu ukumbasa baa ibaandu hya nde mwakulu ve, fula-fula baa mu nzo a nde, nde amiituna imiinu. Buuna, nde afulala bubi na wu avelesa imiinu mu Yisu Kristo.

9 Mu muhanda litangu, bakwili ba bakaasu ba libundu huva likumbasa, ndulu ba baamiivyoso tungi li maku masamunu (60) ma bilima. Nde afwana uba mukwili wu akoto kwele ndulu koto limosi. 10 Baafwana utiila nde imbangi mu mavaanga ma mabwe, bu nde habuhisi baana ba nde, bu hakayaka baatu bubwe. Bafwana utiila nde imbangi kaka, bu hakaswaha miilu mya baatu bangidi, bu hakakumbasa banga pumbu, na bu haba hakangama mu mavaanga moosi ma mabwe. 11 Ka uto ti bakwili ba bakini banuumba, a hasonehe bo mu muhanda litangu. Mu tooni ati, ŋa bo bu uba na nzala yi ubwekwele, bo bu utahuha na Kristo. 12 Bo bavanga buuna, Nzambi utsundasa bo, bu baavelikeelese nzuhisini la nde latsomi, li bo baasiidi ŋa busu bwa nde. 13 Titswene, bu bo baavele na isalu hi usa, bo bubaataangila manzo ma baatu, mu ubaasaha uyiha. Ka ŋa yulu a maana, ndulu avele li isalu ve, bo bubaasa kaka lipedi li laavele a tswehi. Bo bubaakoto mu misamu mi myaveletala bo, na ubaatoyo ma bakiiveletoyo. 14 Ni mu buuna, me tondi ti bakwili ba bakini banuumba, babwekwele. Hwafwana ti bo babuta baana na ubaatuma manzo ma bo, mu uveleva nzila huli baa bubaatelemene bo, mu ukusa bo. 15 Ka bakwili ba banuumba bakima, baamiisobo nzila mu udukala Saatana. 16 Me mbwendeele, tso mukaasu nga imiinu li na bakwili mu buli la nde, nde afwana ukumbasa bo. Nde a hafwana ususa bo ŋa myoho mi libundu ve, mu tooni ati libundu laafwana ukumbasa ndulu bakwili ba siha vii.

17 Bakuutu ba libundu baa bubaatuma libundu bubwe, baahwama na pfuta yole. Hwavele uvusana ba bali na isalu hiinene hi utanga mambu ma Nzambi, na ulongese bambaahi. 18 Mabasonehe ma Ngidi mali mu uleele: «A laakutala munywa a ngombe wu li mu usala, mu taangu yi nde ubaadyata muhunu*.» Na: «Musali afwana uyaka pfuta a nde✝.»

19 A hayaka mukesu mu mukuutu libundu, tso a husolihi bambangi boole buuve batatu ve. 20 Syembe baa bubaasa masumu ŋa busu bwa baatu boosi, mana bakuutu bakima kaka, bamono boomo. 21 Ŋa busu bwa Nzambi, ŋa busu bwa Yisu Kristo na ŋa busu bu bapofi ba Nzambi hasoolo, me ndabi ŋa busu bwa we mu usalila mambu mo maana, hwavele buraandu, tso uvelevolele bakima mileembe. 22 A habingalala usuusala muutu myoho, mu uva nde mupfuna mu libundu. Na a hasilasa masumu ma muutu mukima. We afwana uba we mwakulu wu atsyeme.

23 Kolo ubaanywa ndulu mamba, ka baasalila mwaana vinye hole mu tooni ifundu hya we, na mu tooni mabedu ma we. 24 Masumu ma baatu bamosi, a mu ubaaswemene ve. Mo mu ubaatehele bo tswamina batsundasa bo. Ka huli bakima, masumu ma bo ubaayabana ka hu busu. 25 Ni bumosi kaka, mavaanga ma mabwe mu ubaamonehele mawasa, na ma mavelebingalala umonehele, utwala uswemene nzyeni ve.