1 Me Pahuli, ndi iluumbi hya Kristo Yisu. Me ndi mu unzabisa we mu tumili a Nzambi Mufuhisi a bisu, na mu tumili a Kristo Yisu wu uli hiitu hya bisu. 2 Me ndi mu utsonehele huli we Timoteho. We li mwaana a me mwakulu, mu hiitu hya we mu Kristo. Nyaha Nzambi Taata na Kristo Yisu Pfumu a bisu, bava we hyenze, bakwila we lingebe na uva we hyese.

3 Tsahala hu musyenge a Efeso, we bu me akwadisi we ŋa me akanzyene hu tsi a Masedonya. Huuna, huli na baatu bakima babali mu uva ndongisili yi mapfuta. Liha bo mu uva ndongisili mo yiina. 4 Leele bo banyaha masahu mo maana, na utanga mihanda mimila, mi manduhi ma bakaaha. Maana moosi ubaabehe ndulu ukaakana, hwavele uvanga litondo la Nzambi, li libaavangama mu imiinu.

5 Tsongo a nzibusili mo yiina, ni mu upalisa litondo. Litondo li libaamata hutso mutima wu atsyeme, na matsimi ma mabwe, na imiinu hi hyavele na muwala. 6 Bakima baamiitahuha na nzila mo yiina, na baamiiyadunga hutso bileedi bi byavele na kaluha. 7 Bo ubaasaha uba milongisi mi Mikele mya Nzambi. Ka bo a bali mu utsikaha mambu ma bo bali mu uleele ve, tso ma bo bali mu uyabisa na hiitu hyoosi.

8 Bisu liyaabi ti Mikele mya Nzambi mili mimibwe, tso baatu bali mu usalila myo we bu hwafwana. 9 Mu mbuli, bisu liyabi kaka ti, Nzambi a havanga Mikele mu baatu ba baakuha ve. Nde havanga kaka Mikele mu tooni a ba baavele na lisingala, bangoyi, banga bukanyi, banga masumu, ba baavelekiinza Nzambi, na bya ngidi. Nde havanga Mikele, mu tooni a baatu ba bubaaduba bataata na bangu ba bo, napa mu badubi ba baatu. 10 Nzambi havanga Mikele, mu tooni a baatu banga butsutsungu, baa bubaanyiha masambu babahala na babahala, babali mu usumbasa bambaahi mu buviha. Nzambi havanga kaka Mikele, mu tooni a banga mapfuta, banga milabu mi mapfuta, na mu moosi ma maasobono na ndongisili yimbwe yi benu laayaki. 11 Ndongisili mo yiniiyi, yayelemene na Musamu wu Mubwe wu baaviidi me, wu ubaamata huli Nzambi Nga Muyusu.

12 Me ndi mu upfutala matondo huli Yisu Kristo Pfumu a bisu, wu aviidi me matwala, mu tooni ati nde amoni ti me ndi wu apfwana, mu ukuhasa isalu hya nde. 13 Nzambi akwili me lingebe, tso bu me akandeele ma mabi mu nde, tso bu me akakwamisa baatu ba nde, tso bu me amba mutuhi. Nde hasiidi buuna, mu tooni ati, me a hakanzaba ma me akapanga ve, mu pelili imiinu. 14 Pfumu a bisu amiipuhala hyese hya nde mu me, mu iteesi hi hyafulala. Nde akumbisi me mu usa imiinu mu nde, na mu utondo bana. Maana moosi mu ubaayelemene, mu tooni a bu me akangama mu Yisu Kristo.

15 Liniili ni dyaambu la mbuli, li baatu boosi baafwana uyaka: Yisu Kristo amiiya ŋa tsi mu uyobolo banga masumu. Ka me watsomi ŋa hati la bo. 16 Ka Nzambi amiikwila me lingebe, wu uli watsomi mu banga masumu. Nde havangi buuna, mana nde amweese huli baatu mukami a nde. Nde avoli me we ifwaani, mana bakima baa bu usa imiinu mu nde, bayaka moonyi wu bilima na bilima. 17 Butsitu na muyusu biba, huli Pfumu mataangu moosi! Nde wu uli Nzambi ndulu mosi, wu avelekwa, na wu bubaavelemono! Ameni!

18 Timoteho mwaana a me, me ndeele we buni we afwana mu usa, we bu hwayelemene na mbihulili yi baasiidi mu we umata beleve. Nyaha mambu mo maana mava we ibahala, mana we yaba buni we ulwana mudingu wu afwana. 19 Keelese imiinu hya we na matsimi ma mabwe. Bakima baamiitimba matsimi ma bo, na imiinu hya bo hyamiiyene mu nyamba. 20 Imene na Alekizandi bali mu litangu la baatu mo baana. Me apahulili bo huli Saatana, mana batungalala bo mu uveletuha Nzambi.