1 Musamu a bungeele ni wunuwu:

«Muutu atondo uba mutumi libundu, nde miisoolo isalu hi ibwe.» 2 Mutumi libundu afwana uba wu avele masyembo, mulumi a mukaasu mumosi, nga mbiili yi yasungama, nga tsiki, nga butsitu na wu akuha. Nde afwana uba muyaki a byenyi na wu utwala ulongese libundu. 3 Mutumi libundu utwala uba ikolo-mbungu ve. Nde utwala uba nga ngaabi ve, ka nde afwana uba nga bulembo. Nde utwala uba nga a bisongi ve, tso wu avelekebele mbongo mu diisu. 4 Mutumi libundu, afwana utuma nzo a nde mwakulu bubwe-bubwe. Baana ba nde bafwana usiingala nde na likiinzu loosi. 5 Tso muutu a hatwali utuma nzo a nde mwakulu ve, buni nde hutwala utuma libundu la Nzambi? 6 Nde utwala uba wu munyatihi mu libundu ve, kini nde unangimana bana mu nyeme. Mana Nzambi a hasyembe nde we bu hasyembi Saatana. 7 Hwafwana kaka ti, baatu babali hu mbadi libundu, batiila nde imbangi hi ibwe. Imbangi mo hiina, mana bavelerokolo nde, na nde avelebwa mu myeto mi Mukuyi.

8 Bakeelisi ba libundu kaka, ni bumosi, baafwana uba baatu banga likiinzu, na banga imbuli. Bo utwala ukoto mutso a nywili malamu yinono ve, na mu mbahili a mbongo ya tsonyi ve. 9 Bo baafwana ukeelese mambu ma Nzambi hayabisi, mu matsimi ma matsyeme. 10 Baafwana umaakete mbiili a bo. Titswene, tso a bamoni lilibi mu bo ve, bo utwala usa isalu hya bo hi bukeelisi bu libundu. 11 Bakadi ba bakeelisi balibundu kaka ni bumosi, baafwana uba na likiinzu, babaavele na makusa, babaakuta linyutu. Ka baba ba baasungama mu mambu moosi. 12 Mukeelisi libundu, afwana uba ndulu mulumi a mukaasu mumosi. Bakeelisi baafwana utuma baana ba bo na manzo ma bo mwakulu bubwe-bubwe. 13 Bakeelisi balibundu boosi ba bu usa isalu hya bo bubwe, bu uyaka muyusu. Ni mu buuna, bo utwala uyabisa na hiitu hyoosi, imiinu hi ibaapfuuta bisu mu Yisu Kristo.

14 Me ndi mu utsonehele we muhanda mo wunuuwu, mu hiitu hi uyamonehele na we, mutso bilumbu mo biniibi. 15 Ka tso nziili a me yitambi, yaba buni we afwana udyata mu nzo a Nzambi. Ni libundu la Nzambi a moonyi, wu likuunzi lilinene, na ibene hi imbuli. 16 Mu mbuli, muutu utwala utuna love ti, tswehi matsimi ma inzambi, yi Nzambi hayabisi bisu, yili yinene.

Kristo ayamonehele huli bisu mu linyutu li musunya,

Livupu la Ngidi laasilisi,

ti nde li wu akuha.

Nde amonihili huli bapofi,

na baayabisi tsangu a nde, huli ba bavele Bayudaayo.

Baayaki nde na hiitu mu tsi yoosi,

Nzambi asyenuli nde mu muyusu.