1 A̱tsuma̱ a aa'wan a̱ ire o mogono Dariyu, o woto wa̱ ta̱li o urana wu ufaru u woto'o, adanshi a̱ A̱sulazuva a̱ ta̱wa̱ ta̱ ya Hagai vumava̱sula̱ a̱ tyo ya Zerubabe ulobo wa Sheyatiye gwamna va Yahuda na̱ Josuwa ulobo wa Jehozada ganu gbain. 2 Apa nda ili i na A̱sulazuva o oɓolo a̱ a̱soja a zuva a dammai, <<Ama a nda a ta dansa, <Yashi koto i rawa a na aa suwa u'wa wa̱ A̱sulazuva shi.> >>

3 Reve adanshi a̱ A̱sulazuva a̱ ta̱wa̱ o una̱ wa vumava̱sula̱ Hagai. 4 <<Mantsa ma ɗa a na a̱ɗu ya̱a̱ da̱nu a 'wa na a lapulai ulobonu, agba u'wa wa̱ A̱sulazuva a ɗa nda a̱ nden mo okongo?>>

5 Gogo apa nda ili i na A̱sulazuva o oɓolo a̱ a̱soja a zuva dammai, <<Ka̱lyuwa̱i ili i na ya yuwusan a wuma u ɗu. 6 I yuwan ta̱ ca̱'a̱n va̱ a̱bunda̱, a̱vu gba i gasa wa'a. I ta lyuwusa, agba i cuwa̱n shi. I to sowuso, agba u rawa ɗu shi. I to otosu itana, agba yaa uwwusa shen shen shi. Waru i ta̱ ushishi atsupu, adama i zuwa yi o oosonu a na a̱ ri uba̱mu.>>

7 Apa nda ili i na A̱sulazuva o oɓolo a̱ a̱soja a zuva a dammai, <<Ka̱lyuwa̱i ili i na ya yuwusan a wuma u ɗu. 8 Gawain zuva masasan i ta̱wa̱a̱ na akpata i suwisa u'wa'a, adama mu uwwa uyo'o a̱vu waru n tsura̱ tsugbain a̱tsuma̱ a̱yi,>> A̱sulazuva a ɗa dammai ne. 9 <<I ta zuwusa okolo i tsura̱ na̱ a̱bunda̱, agba a̱yi ɗa nda wo o'woi wa'a. Waru ili i na i ta̱wa̱yi o u'wa, a̱vu mi ivula̱ yi. Adama a̱ nye?>> A̱sulazuva o oɓolo a̱ a̱soja a zuva a ɗa a dammai ne. <<Adama o u'wa u va̱ u na u ri okongo, a̱ɗu ɗa nda gba koyan o mpolo mu u'wa wa̱ yi. 10 Adama o ndolo, zuva putsaa ta̱ na a'iza, reve uvaɗi u putsaa ni itana yu uɗuma̱. 11 Reve gba n ta̱wa̱a̱ nu ulambu wi iro'i e iɗa'a na̱ nsasan, ne e ishina, ne e ili i na iɗa i tsu matsan suru, nu uba̱ta̱ wa ama ni inama, no o ulinga we ekere ɗu suru.>>

12 Reve Zerubabe ulobo wa Sheyatiye na̱ Josuwa ulobo wa Jehozada ganu gbain, oɓolo na akapi a ama suru a yuwan tsutoni nu uɗyo wa̱ A̱sulazuva A̱sula̱ e le, na adanshi a Hagai vumava̱sula̱ za na A̱sulazuva A̱sula̱ e le a̱ lyunguyi. Reve ama a uwwa wovon wa̱ A̱sulazuva.

13 Reve Hagai malingata ma̱ A̱sulazuva ma damma ama ikaka ya̱ A̱sulazuva, <<N to oɓolo na̱ a̱ɗu,>> A̱sulazuva a ɗa a dammai ne. 14 Reve A̱sulazuva a̱ 'ya̱sa̱n ruhu va Zerubabe ulobo wa Sheyatiye gwamna va Yahuda na̱ ruhu va̱ Josuwa ganu gbain ulobo wa Jehozada, oɓolo na̱ ruhu va akapi a ama a na a pasai suru. Ɗaɗa a̱ ta̱wa̱i e temei ulinga wu u'wa wa̱ A̱sulazuva o oɓolo a̱ a̱soja a zuva, A̱sula̱ e le. 15 E teme ta̱ ulinga o urana wu ushin na̱ a̱za̱ a̱ na̱shi u woto wa̱ ta̱li a aa'wan e ire o tsugono tso mogono Dariyu.