1 A̱tsuma̱ o woto we cindere, o urana wu ushin na̱ za ta̱ u woto'o, adanshi a̱ A̱sulazuva a̱ ta̱wa̱ ta̱ o una̱ wa Hagai vumava̱sula̱, 2 <<Vu yuwan adanshi na̱ Zerubabe ulobo wa Sheyatiye gwamna va Yahuda, na̱ Josuwa ulobo wa Jehozada ganu gbain, oɓolo na akapi a ama suru. Vee ece le, 3 <Zane ɗa a̱tsuma̱ a̱ ɗu buwai wuma za na shi enei u'wa u nda a̱tsuma̱ o ulobonu wa̱ yi wu ufaru? Cine ye ene niyi gogo? U rotso ta̱ ili ya̱ a̱ɓula̱ e yeni i ɗu? 4 Agba gogo vu kaɓa asuvu, Zerubabe,> A̱sulazuva a ɗa a dammai ne. <Vu kaɓa asuvu Josuwa ulobo wa Jehozada, ganu gbain. I kaɓa asuvu a̱ɗu ama e iɗa'a suru i yuwan ulinga,> A̱sulazuva a ɗa a dammai ne. <Adama a na n to oɓolo na̱ a̱ɗu,> A̱sulazuva o oɓolo a̱ a̱soja a zuva a ɗa a dammai ne. 5 <Ne ɗa n yuwaan nɗu akucunu a mantsa ma na yu uta̱i e iɗa ya Masar. Ruhu va̱ buwa ta̱ e memere ma̱ ɗu. She yu uwwa wovon wan.>

6 <<Adama a na apa nda ili i na A̱sulazuva o oɓolo a̱ a̱soja a zuva a dammai, <A̱tsuma̱ a mantsa wa'a, n ta̱ da̱shi jinga̱ɗa̱ zuva nu uvaɗi oɓolo na̱ mala ni iɗa yu u'yewu. 7 N ta̱ jinga̱ɗa̱ nɗa suru, adama utsuru wu nɗa suru u ta̱wa̱ pe, reve n shiton u'wa u nda na̱ tsugbain,> A̱sulazuva o oɓolo a̱ a̱soja a zuva a ɗa a dammai ne. 8 <Azurufa za va̱ ɗa zinariya waru za va̱ ɗa,> A̱sulazuva o oɓolo a̱ a̱soja a zuva a ɗa a dammai ne. 9 <Tsugbain tsu u'wa tso gogo tsa ta la'a tsu za vu ufaru,> A̱sulazuva o oɓolo a̱ a̱soja a zuva a ɗa a dammai ne. <Waru pa uba̱ta̱ u nda n ta ca nden ma asuvu,> A̱sulazuva o oɓolo a̱ a̱soja a zuva a ɗa a dammai ne.>> 10 O urana wu ushin na̱ a̱za̱ a̱ na̱shi o woto wa̱ kucci, a aa'wan e ire o tsugono tsa Dariyu, adanshi a̱ A̱sulazuva a̱ ta̱wa̱ ta̱ o una̱ wa Hagai vumava̱sula̱ ana, 11 <<Apa nda ili i na A̱sulazuva o oɓolo a̱ a̱soja a zuva a dammai, <Ece nan ganu adama a̱ wila̱'a̱. 12 Na̱ vuma tanu inama ya akiza ukutsuluwu o utugu wa̱ yi, reve utugu'u u ju'wa̱n opopofu ko mayan ko masayan ko mani'in ko cu'un vi ilyalya suru, wo o'wo ta̱ na akiza?> >> Nan ganu a̱ usu ta̱, <<O'o.>>

13 Reve Hagai damma, <<Na̱ vuma na o'woi idaba o una̱ u na u ju'wa̱in a̱kwa̱kwa̱ u ju'wa̱n za ta̱ a̱tsuma̱ e ili i nda, ili'i wo o'wo ta̱ idaba?>> Reve nan ganu'u a̱ usu, <<wo o'wo ta̱ idaba.>>

14 Ɗaɗa Hagai usuyi u dammai, << <Ne ɗa u ri na ama a nda ni iɗa i nda e esu a̱ va̱, A̱sulazuva a ɗa a dammai ne, ne ɗa fo u ri nu ulinga we ekere e le, waru ne ɗa u ri ni ili i na biti a cayi kucci wo o'wo ta̱ idaba.

15 << <Gogo nda i yuwan majiyan diga ana'an a̱ 'ya̱wa̱. Kafu a̱ shi a̱ kuru aatali zuva va aatali a̱tsuma̱ a̱ a̱a̱'isa̱ a̱ A̱sulazuva, cine wuma u ɗu u shi? 16 Cine i tsu uwwa? Na̱ nanza 'ya̱wa̱ o oɓolo a na a̱a̱ kunzu makundatsu ushin, reve u cina kupa goon. Na̱ vuma 'ya̱wa̱ uba̱ta̱ u na ee kene masayan makundatsu kupoton, reve u cina ushin goon. 17 N faba ta̱ ulinga we ekere a̱ ɗu suru na̱ mɓa̱la̱ a̱vu a̱ pa̱luwa̱ na atayan, agba suru na̱ ne i ka̱mba̱ ya̱'a̱ va̱ shi,> A̱sulazuva a ɗa a dammai ne. 18 <Ka̱lyuwa̱i, diga ana'an a̱ 'ya̱wa̱, diga o urana wu ushin na̱ a̱za̱ a̱ na̱shi o woto wa̱ kucci, diga o urana u na a varai ikyun ya̱ a̱a̱'isa̱ a̱ A̱sulazuva, i yuwan majiyan ulobonu. 19 Icu'un i buwa ta̱ pe o mopon? Na amayun ataci nu ubiri na̱ muwun mu uɗanga m peme na̱ ɗanga zetun a matsan ili shi. Amma diga ana'an a̱ 'ya̱wa̱ n ta zuwaa ɗu aba'un.> >>

20 Adanshi a̱ A̱sulazuva a̱ ta̱wisa̱ ta̱ ya Hagai we ire o urana wu ushin na̱ a̱za̱ a̱ na̱shi o woto'o, 21 <<Vu yuwan adanshi na̱ Zerubabe gwamna va Yahuda, vu damma, n ciga ta̱ n jinga̱ɗa̱ zuva nu uvaɗi. 22 Reve m mumula̱ otogu o tsugono, a̱vu n kototo ucira u tsugono wu nɗa n ro. N ta̱ mula̱ ikeke yi ido na akumbi e le. Ido na akumbi e le a̱ ta̱ riya̱, za suru a matsun me pe'eni ma za va̱ yi.

23 << <O urana u ndolo,> A̱sulazuva o oɓolo a̱ a̱soja a zuva a damma ta̱, <N ta tara wu Zerubabe ulobo wa Sheyatiye aagbashi a̱ va̱,> A̱sulazuva a ɗa a dammai ne, <Reve n ka̱mba̱to wu tsa makawani mo urotsu wu ukere u va̱, adama a na n ɗangwa wu ta̱,> A̱sulazuva o oɓolo a̱ a̱soja a zuva a ɗa a dammai ne.>>