1 N ta kumba atsura a̱ va̱

mi isawan tsa za vi ipiri,

n puro mu uwwa ili i na waa damma mu,

nu usuwu u na wa ca adama e mesun ma̱ va̱.

2 Reve A̱sulazuva a damma mu,

<<Vu ɗana alavu alavu'u

vu ɗana yi a alanga e eteshe aɓaci a atali,

tsa̱ra̱ za vu ɗesununa̱

u ɗe yi babu usa̱n.

3 Adama a na alavu alavu'u

u ta pura mantsa ma na a zuwai,

u ta yuwusan adanshi o ukosu

waru wo o'wo epen shi.

vu puro yi, ko nu jima,

na amayun u ta̱ ta̱wa̱, waa tara mantsa shi.✝

4 Uwwai, za na okolo a̱ yi a̱ ri mejege shi u ta̱ riya̱,

amma za va̱ a̱ɓula̱ ta yuwan wuma,

adama o ucawu wo okolo a̱yi.>>

5 Na̱ ne suru, masayan ma̱ ina̱bi*

ma̱ tsu pusa̱n ta̱ za vu uvaɗu ugbozu,

adama o ndolo u tsu da̱nu o u'wa shi.

Utsa̱n wa̱ yi u ta̱ a̱bunda̱ tso ason,

waru u ta̱ tsu ukwa̱, u tsu cuwa̱n shi.

U tsu ɓolotowo ta̱ aciya̱yi nɗa suru,

a̱vu u pura̱a̱ aciya̱yi ama suru.

6 Ama'a suru a ta yuwan tsushu'un na̱ a̱yi,

o zo'osuso yi a yuwusan yi ulamu adansa,

<<A̱tsuma̱lima̱ a ta cina za na o ɓolotosoo aciya̱yi itana i wivu!

Hali a̱ tyo a mantsa ma̱ ne

voo ɓolotowo aciya̱wu

utsuru a̱tsuma̱ o ure wu ule'e?>>

7 Babu usa̱n, aza a na o tono wu utan a ta zuwa wu elime,

a̱ ta̱ ta̱wa̱ a zuwa wu meje'en ma̱ lipu.

Vu to o'wo le itana

i na a̱ pura̱i uba̱ta̱ o uvon.

8 Ana wo o'woi vu usa ta̱ nɗa na̱ a̱bunda̱,

akapi a ama a nɗa nna n buwai a ta usa a̱za̱ a̱ wu.

Adama a na vo oco ta̱ mpasa ma ama,

vu lungusa̱ nɗa ni ilyuci,

na ama a na a̱ ri a̱tsuma̱ e le suru.

9 <<A̱tsuma̱lima̱ a ta cina

za na a lyuwusa melen ma̱ yi shi adama o u'wa wa̱ yi!

A̱vu na vu suwai u'wa zuva va aagaɗi

adama vu la'a a addama!

10 Vu ronoo ta̱ u'wa wa̱ wu wono.

Adama a na vu una ta̱ ama na̱ a̱bunda̱,

vu kototo ta̱ aciya̱wu.

11 Atali o ukari a̱ ta̱ shon,

atsura akpata a̱ ta̱ usu.

12 A̱tsuma̱lima̱ a ta cina,

za na suwai lyuci na̱ mpasa,

za na suwai lyuci gbain ni iwuya!

13 Ashe A̱sulazuva o oɓolo a̱ a̱soja a zuva ɗa zuwai ama o uvaɗi

a yuwan a̱tsuma̱lima̱ reve akina o soɗu le shi?

Waru a yuwan ulinga we pere shi?

14 Adama a na uvaɗi u ta̱ da̱na̱ tapu

nu urevu u tsugbain tsa̱ A̱sulazuva,

cine vu revei mini mo tsu shiton mala.✝

15 A̱tsuma̱lima̱ a ta cina za na tsura̱to yi nron mu nden ma̱ yi,

a̱ zuɗa̱sa̱ yi diga a̱ tsa̱n vu ukwan hali she no o'wo usowu,

tsa̱ra̱ we ene e le aataɓu!

16 Wono u ta̱ kpa̱to wu o una̱ u tsugbain.

Gogo mantsa ma̱ wu ma ɗa!

Vu to sowo vo o'wo ataɓu!

Mokkoto ma na ma̱ ri o ukere u sa'ani wa̱ A̱sulazuva ma̱ ta̱ riya̱ wu,

ili i wono i kpa̱to tsugbain tsa̱ wu.

17 Ulungusu u na vu yuwain a aci a Lebanon

u ta̱ ka̱mba̱ a aci ya̱ wu,

mona me inama ya̱ yi i na vu yuwain

u ta ca wu wovon.

Adama a na vo oco ta̱ mpasa ma ama,

a̱vu vu lungusa̱ nɗa ni ilyuci,

na ama a na a̱ ri suru a̱tsuma̱ e le na̱ nden.

18 Ucira u ne u ɗa a̱a̱ma̱li a̱ ri na̱ a̱yi

ana wo o'woi vuma ɗa she'en niyi?

Uruma u ɗa u na woo ritosu epen.

Adama a na vuma na yuwan niyi

u ta zuwusa ucira e ili i na u yuwain,

u yuwan ta̱ a̱ma̱li a na a tsu yuwan adanshi shi.

19 A̱tsuma̱lima̱ a ta cina za na dammai akpata, <Ka̱mba̱ wuma>

Ko aatali a na a̱ ri ukwa̱, <'Yon!>

U ta gura yuwan uritosu?

Agba a̱yi ɗa nda a pala yi ta̱

na̱ zinariya oɓolo na̱ azurufa,

agba u ri wuma shi.

20 Amma A̱sulazuva a̱ ta̱ pe a̱tsuma̱ a̱ A̱a̱'isa̱ a Akiza a̱ yi,

lyawa uvaɗi ma̱ɓula̱ u rungwa̱ kpen

a̱ ma̱ka̱ka̱n ma̱ yi.>>