1 Avasa a Haba̱ku vumava̱sula̱, aci a Shigiyonotu*.

2 A̱sulazuva, mu uwwa ta̱ aɗa o ulinga wa̱ wu,

reve wovon u guza̱ mu.

Vu yuwisan a̱ba̱jini a linga va̱ wu a mantsa ma̱ tsu,

vu lyawa e reve le.

A̱tsuma̱ o upan wa̱ wu

vee ene iliyali i tsu.

3 A̱sula̱ a̱ ta̱wa̱ ta̱ diga Teman,

Za va Akiza ta̱ ta̱wa̱ diga a Masasan ma Faran.

Zuva va zuva ta shiwan na̱ tsugbain tsa̱ yi,

uvaɗi ma̱ɓula̱ u ta shiwan ni ica ya̱ yi.

4 Imaɗatsu ya̱ yi i ta̱ tse ekan yu urana,

eka'an u ta̱ e ikanasa diga o ukere wa̱ yi,

uba̱ta̱ u na ucira wa̱ yi u ri usokowu.

5 U lyungu ta̱ mɓa̱la̱ elime a̱ yi,

waru u zuwa ta̱ ukwa̱ wu usuɗuwu u kuru a̱ca̱pa̱ a̱ yi.

6 Wi isawan ta̱, reve u jinga̱ɗa̱ uvaɗi.

A̱vu u ka̱lyuwa̱, reve u zuwa nɗa n je'en.

Akuci a nsasan a̱ ra̱mo ta̱,

a̱vu akuci a agaɗi o oco.

Re va̱ yi a̱ ta̱ lo hali hali.

7 Me ene ta̱ ogodo a̱ Kushan a̱tsuma̱lima̱,

ama e iɗa ya Midiya e meje'en ma̱ lipu.

8 A̱sulazuva, vu yuwan ta̱ upan na̱ ɗolu?

A̱tsumola̱ngu a̱ wu a̱ ta̱ aci o ɗolu?

Upan wu usuɗuwu wa̱ wu u ta aci a mala?

A mantsa ma na vu kumbai ido ya̱ wu,

ni ikeke yi ido yu ulyuwu wa aci ya̱ wu?

9 Vu uta̱ ta̱ utan wa̱ wu alanga e eteshe,

vu zuwa ta̱ aya a̱ wu a'yin. Wivuwun

A̱vu vu ne'eshen uvaɗi na̱ mini.

10 Nsasan me ene wu ta̱,

a̱vu o oɓoro.

A jara ta̱ mini ma̱ a̱bunda̱,

hali mala ma̱ a̱ru'un ma̱gugwa̱,

hali ikeɗu i mala'a i 'yon zuva.

11 A̱vu urana na̱ woto e isawan kpen

uba̱ta̱ u na a̱ ri na̱ nde,

adama e ekan ya aya a̱ wu na a̱ ka̱ra̱i,

oɓolo ne ekan e ibata ya̱ wu.

12 A̱tsuma̱ asuvu usuɗuwu a̱ wu a ɗa vu dasai uvaɗi,

a̱tsuma̱ o upan u ɗa vu dasai nɗa.

13 Vu uta̱ ta̱ tsa̱ra̱ vu wawa ama a̱ wu,

adama vu wawa aza a na vu tawai.

Vu kototo ta̱ za vi iwuya,

reve vu voton yi ataɓu.

14 Vu sapa yi ta̱

aaci ni ibata ya̱ yi,

ana a̱soja a̱yi na a gurai uvon a̱ ta̱wa̱i tsa̱ lipa̱

tsa̱ra̱ e bete'we tsu,

ma̱za̱nga̱ ma̱ le a̱ yi ɗa o soɗu

alambi a na a̱ ri usokowu.

15 Vu dasa ta̱ mala ni ido ya̱ wu,

vu ta̱ lukuta̱sa̱ mini mo ucira.

16 Na mu uwwai ne, a̱vu okolo a̱ va̱ a̱ riya̱,

a̱vu una̱ u va̱ u je'en adama e ilama,

etele a̱ va̱ a̱ kuwa̱ ta̱,

a̱mu a mmalu ana a̱ va̱ e meje'en.

Suru na̱ ne n ta kaɓa asuvu,

n puro urana wa̱ a̱tsuma̱lima̱ u ta̱wa̱ a aci e iɗa

i na ya̱a̱ ta̱wusa̱a̱ tsu nu uvon.

17 Ko na̱ shi uɗanga wu ubiri u ɓoso yipa̱lu shi,

ko na̱ shi a̱ tsura̱ muwun n ina̱bi a ataci shi,

ko na̱ shi ɗanga zetun matsan shi,

ko iɗa i kuɗa̱ a̱ ta̱wa̱a̱ ni ilyalya,

ko na̱ shi babu ikyon o uva̱la̱ta̱

ko na̱ shi babu inan uba̱ta̱ u na a̱a̱ gutsusu le,

18 suru na̱ ne n ta yuwan ma̱za̱nga̱ a̱ ma̱ka̱ka̱n ma̱ A̱sulazuva.

N ta yuwan mere e ekere a̱ A̱sula̱ za vi iwawi i va̱.

19 A̱sulazuva zagbain ɗa ucira u va̱,

u zuwa ta̱ ana a̱ va̱ e reme iɗa tsa mere'on,

n yuwan mmalu zuva va atali.✝

Udammu a̱ tyo a̱ ma̱dobiya. Za vi itana i tsuwe'e i na i ri na a'yin.