1 A mantsa mo ukosu,

masasan ma na u'wa wa̱ A̱sulazuva a̱ ri

u to o'wo masasan ma na ma la'ai a̱ɓula̱ suru suru.

A ta cuwa yi ulawu na̱ nsasan na agaɗi suru.

Nɗa n ta̱ da̱na̱ a sumusa a̱ 'ya̱wusa̱ ɗe.

2 Nɗa na̱ a̱bunda̱ a̱ ta̱ ta̱wa̱ a damma,

<<Ta̱wa̱ yi, tsu kumbai masasan ma̱ A̱sulazuva,

a̱ 'ya̱wa̱ o u'wa wa̱ A̱sula̱ a Yakubu,

adama u roco tsu re va̱ yi,

tsura̱ a̱tsu fo tsu yuwan mmalu o ure wa̱ yi. >>

Adama a na uritosu wa̱ A̱sulazuva

u ta̱ o uta̱ diga Sihiyona,

waru adanshi A̱sula̱ a̱ ta̱ ta̱wa̱ diga Urishelima.

3 A̱sulazuva a̱ ta̱ ge'eto ama o uvaɗi a̱bunda̱.

Waru u ta̱ ge'eto nɗa m gbain gbain.

A ta ruma mutsun mu pe'eni n le

a̱ ka̱mba̱to le a̱ba̱ri e iluma,

ibata i le waru a ta ruma le

a̱ ka̱mba̱to le mutsun n wukoɗu wu ɗanga.

Nɗa n buwa o uta̱ a̱ 'ya̱wa̱ uvon shi,

waru a̱ da̱shi rito uvon shi.

4 Vuma suru ta̱ da̱nu e ikyun ya ataci a ina̱bi a̱ yi,

na̱ e ikyun yu uɗanga vu biri va̱ yi na asuvu nden.✝

Za lo na da'waton yi shi,

adama a na A̱sulazuva o oɓolo a̱ a̱soja a zuva a ɗa a dammai ne.

5 Ko na wo o'woi nɗa suru n ta̱ kurusu musula̱ n le,

amma a̱tsu tsu ta̱ toni A̱sulazuva A̱sula̱ a̱ tsu.

6 Reve A̱sulazuva a damma,

<<O urana u ndolo, n to oɓoloto aza a na a̱ pura̱i a̱ tyo tsugbashi

waru n to ɓoloto aza a na o losoi,

na aza a na n cayi a̱tsuma̱lima̱.

7 N ta̱ ka̱mba̱to aza a na a̱ pura̱i

a̱ tyo tsugbashi na la'ai ama a̱ va̱,

aza a na o losoi o'wo iɗa yu ucira.

A̱mu A̱sulazuva n ta yuwan tsugono a aci e le

a masasan ma Sihiyona

diga gogo hali hali.

8 A̱vu usa wu uga'an wu uba̱ta̱ e ipiri yi ikyon,

uba̱ta̱ wu upa'anta wu ucira wa Sihiyona

a aci a̱ wu a ɗa tsugono tsu ufaru tsa̱ a̱ ka̱mba̱,

tsugono'o u ta̱ ka̱mba̱ Urishelima.>>

9 Gogo nye i zuwai vu ri a yisali nu ucira?

Mogono me pe a̱tsuma̱ a̱ wu gogo shi?

Za na a casu wu a̱sa̱la̱ a̱ kuwa̱ ta̱ ɗa?

A̱yi ɗa ili i na i zuwai a̱tsuma̱lima̱ a̱ riya̱ nuwu

tsa ka na ri a uwwusa mɓa̱la̱ n limatan?

10 Vu yuwan ma̱nga̱ vu sala a̱vu Sihiyona,

tsa ka na ri a̱ a̱tsuma̱lima̱ a̱ mɓa̱la̱ n limatan.

Adama a na gogo vu ta̱ o uta̱ pe a̱tsuma̱ a̱ lyuci'i

reve vu da̱nu oogodo aagalaci o ugyuru.

Vu ta̱ ka̱ra̱ a̱ tyo Babila.

Diga ɗe ɗa A̱sulazuva a wawa wu

diga e ekere a n'yuwatan ma̱ wu.

11 Gogo, nɗa na̱ a̱bunda̱ o ɓoloto ta̱

e reme tsushu'un na̱ a̱ vu

a dansa, <<Lyawa a̱ lungusa̱ yi,

lyawa tsu zuwa esu a aci a Sihiyona.>>

12 Agba a̱ reve majiyan ma A̱sulazuva shi,

waru e reve ifoɓi ya̱ yi shi,

na wo ɓoloto le

tsa aakatalu e ishina shi,

tsi ishina i na o ɓolotoi

o osoroto a na a faba.

13 Reve A̱sulazuva a damma,

<<A̱vu Sihiyona aaɗanga o usuɗa

'yon vu yuwan usuɗa.

Adama a na n ta ca wu ucira tsa̱ rumu

no ookotsu e irumushili.

Vu ta̱ lungusa̱ nɗa na̱ a̱bunda̱,

a̱vu vu ca utsuru u le

uba̱ta̱ wa̱ A̱sulazuva o uvaɗi suru.>>