1 A̱sulazuva a ca ta̱ Mika vuma va Moreshete adanshi e ikaka i nda a̱tsuma̱ alavu alavu adama a Samariya na̱ Urishelima a mantsa ma̱ tsugono ma Jotam na̱ Ahaz na̱ Hezekiya ngono ma Yahuda.

2 Uwwai, a̱ɗu ama o uvaɗi suru,

polo atsuvu vu uwwa, a̱vu uvaɗi ni ili i na i ri pe a̱tsuma̱ wu suru.

Lyawa A̱sulazuva Zagbain A̱sula̱

diga A̱a̱'isamapaɗa a akiza a̱yi wo o'wo,

iroci a aci a̱ ɗu.

3 I reve, A̱sulazuva a̱ ta̱ ta̱wa̱ diga o uba̱ta̱ a̱ nden ma akiza a̱ yi.

U ta̱ cipa̱ reve u dadasa ba̱ta̱ va̱ a̱ga̱nda̱ o uvaɗi.

4 Nsasan n ta̱ jeruwe za̱la̱ va apata ana a̱ yi

waru ka̱ri ta ɓatsa

cine abaji e ishiki a tsu jejeruwe o una̱ wa akina,

reve u ka̱ra̱ e ilaɗi a̱ cipa̱ cine o tsu oco mini diga a agaɗi.

5 Ili i nda suru adama o unusu wa Yakubu u ɗa

na̱ nusu va Isra'ila.

Nyen ɗa unusu wu ugundo wa Yakubu?

Ashe mayan ma̱ a̱ga̱nda̱ ma̱ a̱ma̱li a Samariya ɗa shi?

A te ɗa gba ba̱ta̱ va̱ a̱ga̱nda̱ va Yahuda ri?

Ashe a̱tsuma̱ a Urishelima ɗa a̱ ri shi?

6 <<Adama o ndolo n ta̱ ka̱mba̱to Samariya oɓolo e edemu a̱ rulu,

wo'o tsu uba̱ta̱ u na a̱ tsu cu'wa̱n a̱ɗuma̱ a̱ ina̱bi.

Waru n ta gandalato atali a̱ yi a̱ tyo o uka̱ri

reve waru n za̱ɓa̱luwa̱ atali e ikyun a̱ yi.

7 N to ɓoɓoso a̱ma̱li a̱ yi

a na a̱ zuɗa̱i,

a̱ ta̱ kula̱to utsuru wa̱ yi na akina,

n ta̱ kototo a̱ma̱li a̱ yi suru,

adama a na a̱ tsura̱ le ta̱ diga o ure u tsushakala,

waru a̱ ta̱ a̱ ka̱mba̱ o ure u tsu tsushakala'a.>>

8 A̱vu Mika damma, <<Adama e ili i nda,

n ta yuwan a̱tsumola̱ngu reve n shon,

n foɗo itana n wala ataɓu.

N ta̱ shon tsa̱ musa̱n mu una,

waru n yuwan a̱tsumola̱ngu tsa azamina,

9 Adama a na antsu a Samariya

aza a na e ina ɗa shi,

hali fo u ju'wa̱n Yahuda,

waru u rawa ta̱ a̱ na̱ntsu va ama a̱ va̱,

hali a uwa Urishelima.>>

10 She a yuwan adanshi a̱ yi a̱tsuma̱ a Gat wan,

ko ke'en she a̱ shon wan.

Amma a̱ɗu a̱za̱ Bet Leyafara

i gandala a̱ ma̱buta̱ goon.

11 A̱ɗu ama a Shafiri,

i yuwan n mmalu ataɓu na̱ a̱tsuma̱ o wono.

Ama a Za'anan gba

she yu uta̱ wan.

Bet Eze na ama a̱ yi a̱ te e mesun

ya̱ tsura̱ ikambi e ekere a̱ yi shi.

12 Adama a na ama a Maroto

a ta pura isa'ani na̱ meje'en.

Agba iwuya diga uba̱ta̱ wa̱ A̱sulazuva

a̱ cipa̱ ta̱ o una̱ntsu wa Urishelima.

13 A̱ɗu ama a Lakish,

i foɓo ikeke yi ido i ɗu,

adama a na a̱ a̱tsura̱ ta̱ unusu

wa Isra'ila a̱tsuma̱ a̱ ɗu.

Hali na u zuwai Sihiyona

mayan mo unusu gayin.

14 Adama o ndolo,

i ca ama Moreshete Gat ne'en vu ukosu.

Waru lyuci va Akizibi ta̱ pura̱ ugbozu

wu ngono ma Isra'ila.

15 Reve A̱sulazuva a damma,

n ta̱ ta̱wisa̱ na̱ za na a lyuwa ɗu nu uvon,

aza a na a̱ ri na̱ nden a̱tsuma̱ a Maresha.

Tsugbain tsa Isra'ila

tsa̱ ta̱ ka̱mba̱ e ekere a Adulam.

16 A̱vu Yahuda, vu puna aciya̱wu ogbondo adama a̱tsuma̱la̱ngu

a̱ muwun ma̱ wu n na vu cigai.

Vu puna aciya̱wu ogbondo vo o'wo tsa̱ a̱a̱kuru,

adama a na muwun ma̱ wu n ta̱ 'ya̱wa̱ tsugbashi e iɗa i ro.