1 Agba ili'i u lungusa̱ ta̱ Yunana okolo lon, hali u zuwa yi u yuwan upan. 2 Reve u yuwan avasa a̱tyo uba̱ta̱ wa̱ A̱sulazuva u damma, <<A̱sulazuva, ili i na n dammai i ɗa nda a̱mu e iɗa i va̱ shi? A̱yi ɗa i zuwai n sumai a̱tyo Tarshishi. Adama a na n reve ta̱ a̱vu za vi isa'ani ɗa waru vu tse ene ta̱ iliyali, vu ta̱ tapu na ankuri waru icigi ya̱ wu i tsu vadala shi, A̱sula̱ a na a tsu vadala diga e ili i na u dammai waa yuwan.✝ 3 Gogo A̱sulazuva, vu lyawa mu n kuwa̱. U la'a mu ta̱ n kuwa̱ a na ma̱ da̱na̱ wuma.>>✝

4 Reve A̱sulazuva a yuwan Yunana yeci, ana, <<Mejege ma̱ ne vu ri na̱ a̱yi hali na vaa yuwan upan.>>

5 A̱vu Yunana uta̱ u ka̱ra̱ a̱ 'ya̱wa̱ upasu wu uyagi u lyuci'i reve u da̱nu ɗe. Reve u yuwan oogodo reve u da̱nu pe a pura we ene ili i na yaa cina Niniva.

6 Reve A̱sulazuva A̱sula̱ a zuwa aataci a̱ ɓa̱tsa̱ a̱vu u kungwa, reve u yuwaan Yunana ululu, adama wu uwwa yuwu. Yunana gba yuwan ta̱ ma̱za̱nga̱ lon na̱ aataci'i. 7 Agba usana we ire, urana a̱ ma̱riya̱a̱, a̱vu A̱sula̱ a zuwa azun a tama aataci'i, hali u 'yewe. 8 Nu urana a aaci, reve A̱sula̱ e keɓe upepu wu usuɗu diga asana, reve usuɗuwu wu urana'an u faba Yunana a aaci reve wo'o gashi u lima̱ ta̱. Reve u damma o okolo a̱ yi, <<U la'a mu ta̱ n kuwa̱ a na ma̱ da̱na̱ wuma.>>

9 Amma a̱vu A̱sula̱ a damma yi, <<Mejege ma ne vu ri na̱ yi hali na vaa yuwan upan aci a̱ aataci'i?>>

Reve Yunana usu, <<N yuwan ta̱ upan lon, hali na u rawai n kuwa̱.>>

10 A̱vu A̱sulazuva a damma yi, <<Aataci a nda a kungwa ta̱ a̱tsuma̱ ayin a̱ ta̱, reve u kuwa̱ a̱tsuma̱ o urana we ire. Agba vu sowo a̱tsuma̱lima̱ adama a̱yi shi, waru vu zuwa yi u kungwa shi, agba na̱ ne suru vu yuwan ta̱ a̱tsumola̱ngu aci a̱ yi. 11 Agba a̱mu wuntsaa mee ene iliyali ya Niniva lyuci gbai'in shi? Lyuci na ri na ama upasu nu ukpakukupa ukpaku nu ushin (120,000) a na e revei ugula̱ ko usa'ani shi a̱tsuma̱ a̱ yi ni inama ya̱ a̱bunda̱ shi?>>