1 Reve A̱sulazuva a̱ da̱shi yuwan adanshi na̱ Yunana, 2 <<'Yon vu ka̱ra̱ a̱ 'ya̱wa̱ a̱ lyuci gbain va Niniva, vu rono le atsuvu cine n damma nuwu.>>

3 Reve Yunana 'yon a̱vu u ka̱ra̱ a̱ tyo Niniva cine A̱sulazuva a damma niyi. Niniva gba lyuci gbain ɗa. Vuma ta yuwan rana ta'atsu a mmalu kafu u ka̱ra̱la̱i lyuci'i. 4 O urana wu ufaru u na Yunana rawai a̱ lyuci'i, a̱vu u teme a yuwusaan le adanshi ana, <<Rana amunga ɗa buwai o kototo Niniva!>> 5 Reve a ama a Niniva suru a ca okolo e le uba̱ta̱ wa̱ A̱sulazuva, a̱vu a yuwan nzuwulai n na ama suru a yuwan akuli. A̱vu a ama suru zagbain na̱ mawun o oto a̱tugu a̱ a̱tsumola̱ngu.

6 Ana mogono ma Niniva ma uwwai adanshi'i, reve u 'yon o ootogu o tsugono tsa̱ yi u foɗo a̱tugu a̱ yi, reve wo oto a̱tugu a̱ a̱tsumola̱ngu* u da̱nu o okomo. 7 Reve mogono ma zuwa a lapa ulingi a̱tsuma̱ a Niniva adansa,

<<Udammu u ɗa diga uba̱ta̱ u Mogono oɓolo na azagbain a̱ lyuci. She za ko iliyamunga ko oɓolo e inan ko oɓolo e ikyon e peɗe ili wan, agba she a lyuwa ko o sowo mini wan. 8 Lyawa o otowoo vuma suru na̱ nama a̱tugu a na o roco a̱tsumola̱ngu nu uvadalasa, lyawa a yuwan avasa a̱tyo uba̱ta̱ wa̱ A̱sula̱ no okolo a̱ ta̱. Reve za suru u vadala diga e iwuya ya̱ yi nu u'ya̱susa̱n wu ugbozu. 9 Zane revei? Ko A̱sula̱ a ta vadala majiyan ma̱ yi reve waru u bula̱ upan wa̱ yi, adama u kototo tsu wan.>>

10 Ana A̱sula̱ e enei a vadala ta̱ a lyawa mayan me iwuya i le, a̱vu u bula̱ ifoɓi ya̱ yi, waru u kototo le cine u foɓoi shi.