1 Apa adanshi a na a̱ A̱sulazuva a dammai Yunana ulobo wa Amita, ✝ana, 2 <<Ka̱ra̱ a̱ 'ya̱wa̱ a̱ lyuci gbain va Niniva vu rono yi atsuvu adama a na iwuya ya̱ yi i rawa ta̱ uba̱ta̱ u va̱.>> 3 Amma a̱vu Yunana 'yuwan, reve u saɓa ure u ro ko'o adama u suma a̱ ma̱ka̱ka̱n ma̱ A̱sulazuva a̱tyo Tarshishi. U ka̱ra̱ ta̱ a̱ cipa̱ a̱tyo Japa uba̱ta̱ u na u cinai a̱ba̱jini a wantsun. Reve u tsupa ikebe a̱vu u ka̱ra̱ a pasa oɓolo ne le, adama u suma a̱ ma̱ka̱ka̱n ma A̱sulazuva a̱tyo Tarshishi.

4 Reve A̱sulazuva a̱ lyungu nu upepu wu ucira a mala'a. Upepu'u u yuwan ta̱ ucira lon hali ke'en ɗa shi buwai na wantsu'un wo ɓoso.

5 Reve a̱za̱ o uluwu u wantsu'un suru a uwwa wovon lon, reve za suru showen ma̱sula̱ ma̱ yi. Reve o oco itana i na i da̱na̱i pe suru a̱tsuma̱ a wantsu'un a mala adama a jibaa wantsu'un ume, adama u liɓa wan. Ele pe o mpolo, ashe Yunana gba da̱na̱ ta̱ pe a̱tsuma̱ a wantsu'un a̱ ma̱dimba̱ ma nlavu.

6 Ana zagbain wantsu'un u cina niyi pe a nlavu, reve u damma yi, <<Nye i zuwai vu ri a nlavu? 'Yon! Vu yuwan avasa a̱ tyo uba̱ta̱ u ma̱sula̱ ma̱ wu! U ta gura o o'wo ma̱sula̱ ma̱ wu me ene iliyali i tsu, reve u wawa tsu.>>

7 Reve a̱za̱ o uluwu u wantsu'un a dammulai, <<Ta̱wa̱i tsu vari yi agita, adama tsu reve o una̱ u vuma ne ɗa tso sowuso a̱tsuma̱lima̱ a nda.>> Reve a vari agita, a̱vu u roco a na Yunana ɗa.

8 Reve a damma yi, <<Damma tsu o una̱ wu unusu wa zane ɗa addama a nda a̱ ta̱wa̱i a aci a̱tsu? Nye ɗa vu yuwain? Waru e te ɗa vu uta̱i? Diga e iɗa i ne ɗa vu uta̱i? A̱vu za ve elentsu e ne ɗa?>>

9 Reve Yunana usu, <<A̱mu za vi Imaci ya Ibrahim ɗa, waru n ta yuwusaan A̱sulazuva A̱sula̱ a na a yuwain zuva na̱ mala ni iɗa a̱ga̱nda̱.>>

10 Reve a̱za̱ o uluwu u wantsu'un a uwwa wovon lon a̱vu a damma yi, <<Ili i ne ɗa vu yuwain tsunda?>> Ama'a e reve ta̱ a na u ri e ilaɗi wu urewesu wa̱ A̱sulazuva, adama a na ne ɗa u damma nle.

11 Reve a damma yi, <<Nye tsa yuwan na̱ a̱vu, adama mala'a mo von?>> Adama a na upepu'u u ta̱ da̱shi keɓushe nu ucira.

12 A̱vu Yunana u damma le, <<Sheɗe numu i vari mu pe a̱tsuma̱ a mala'a, upepu u mala'a u to von. N reve ta̱ adama a̱ va̱ ɗa upepu u wuya u nda u cina nɗu.>>

13 Agba na̱ ne suru, a̱za̱ o uluwu u wantsu'un a yuwan ta̱ ukadu adama a̱ luwa̱ wantsu'un a̱tyo e nge'en m mala, agba a̱ kuɗa̱ ta̱. Adama a na upepu'u u da̱shi ta̱ ucira lon. 14 Reve e showen A̱sulazuva, <<A̱sulazuva vu wawa tsu, she vu lyawa tsu, tsu kuwa̱ o una̱ u vuma nda wan, waru she vu tsuwa̱a̱n tsu mpasa mu za babu unusu wan. Adama a na a̱vu A̱sulazuva vu tsu yuwan ta̱ ili i na i lobonoi.>> 15 Reve a sheɗe Yunana a̱vu a vari yi a̱tsuma̱ a mala'a ɗaɗa mala'a mo voyin. 16 Adama o ndolo reve ama'a a̱ da̱shi uwwa wovon wa̱ A̱sulazuva lon. Reve a ca A̱sulazuva kucci, a̱vu a yuwan akucunu na aa yuwaan A̱sulazuva a̱ga̱nda̱.

17 Amma a̱vu A̱sulazuva a zuwa a̱ba̱jini a magula mo soɗu Yunana. Reve u da̱na̱ pe a̱tsuma̱ a magula'a hali rana ta'atsu na ayin a ta'atsu.✝