1 Apa ikaka ya̱ A̱sulazuva zagbain na Obadiya enei a̱tsuma̱ alavu alavu adama e iɗa ya Edom.✝

A̱ lyungu ta̱ na̱ malingata uba̱ta̱ wu nɗa,

waru tsu uwwa ta̱ wovon wi ikaka'a diga uba̱ta̱ wa̱ A̱sulazuva Zagbain adansa,

<<'Yon! Tsu ka̱ra̱ a gawan tsu yuwan uvon na̱ Edom!>>

2 A̱vu A̱sulazuva a damma,

<<Ka̱lyuwa̱, n ta̱ ka̱mba̱to wu lyuci ke'en suru suru

a̱tsuma̱ akapi a nɗa,

waru aa tara wu ili i ro shi ko ke'en.

3 Uvaɗu wo okolo a̱ wu a̱ luluma̱ wu ta̱,

a̱vu na vu ri upa'awun a̱tsuma̱ a atali,

waru za na ri nden a̱tsuma̱ a nsasan.

A̱tsuma̱ a majiyan vu ta dansa,

<Zane ɗa aa gura cipa̱to mu e iɗa?>

4 A̱vu A̱sulazuva a damma,

ko na̱ shi vu 'yon zuva tsa̱ a̱a̱kuru,

ko na̱ shi vu suwa ta̱ 'wa va̱ wu a̱tsuma̱ italyo'o n ɗa,

diga ɗe ɗa moo rono wu a̱cipa̱ e iɗa.>>

5 <<Nna̱ evu a uwa ta̱ a̱tsuma̱ o u'wa wa̱ wu,

waru nna̱ a̱za̱ a̱ nga̱la̱la̱i a̱ ta̱wa̱ ta̱ na ayin,

ili i na a cigai goon ɗa a tara shi?

Nna̱ ozo o uta'an u muwun ina̱bi a yuwan uta'an,

to, a tsu lyawa ozo o ro adama a̱za̱ o u'yanlu shi?

6 Amma a̱ɗu ama a̱ Edom a̱za̱ o ugundo wa Isuwa,

a̱ ta̱ kototo ɗu,

utsuru u ɗu suru a̱ ta̱ pura̱ le!

7 Ama a na i yuwulai nzuwulai suru

a ta vadala wu ucina̱.

O to loso wu hali a̱ tyo o utyo wi iɗa ya̱ wu.

N'utsa̱ ma̱ wu na vu la'a soɗuwoyi ma̱tsa̱n,

a̱ ta̱ pusa̱n ugbozu wa̱ wu a̱vu a lyuwa wu nu uvon,

aza a na a lyuwa ilyalya oɓolo na̱ a̱vu,

a ta azu wu agba ve reve na̱ yi shi.>>

8 Reve A̱sulazuva Zagbain damma,

<<O urana u ndolo, n ta̱ kototo a̱za̱ a̱ Edom,

waru n kototo a̱za̱ o urevu wa̱ yi.

Nta̱ fo kototo ozo o ugbozu wa̱ yi

diga a masasan ma Isuwa.

9 A̱vu lyuci va Teman,

ali o uvon a̱ wu na la'a gurai uvon a̱ ta̱ je'en lipu,

waru a̱ ta̱ o una za suru a masasan ma Isuwa.>>

10 <<Adama o okolo a vama a na vu rocoyi

moron ma̱ wu Yakubu,

Wono u ta̱ kpa̱to wu,

waru o to kototo wu hali hali.

11 A rana ndolo vu rono ta̱ a̱ca̱pa̱ diga uba̱ta̱ u moron ma̱ nden ma̱ wu,

a mantsa ma na omocin a uwai a̱ na̱ntsu va̱ yi.

A̱vu Edom vo o'wo ta̱ tsa za ta̱

a̱tsuma̱ a n'yuwatan

a mantsa ma na a̱ pura̱i utsuru wa̱ Urishelima

a̱vu fo a yuwan mazuwa ma agita aciya̱yi!

12 <<Mejege ma ɗa vu yuwain shi,

na vi isawain e izo'oshi i moron ma̱ wu,

a̱tsuma̱ o urana u na a tara nle a̱ tyo e iɗa i ro tsugbashi.

Mejege ma ɗa vu yuwain shi,

reve vu yuwan ma̱za̱nga̱

o una̱ wa̱ a̱tsuma̱lima̱ a na ama a Yahuda o sowuso,

Mejege ma ɗa vu yuwain shi,

a na vu zo'oso niyi o urana wa̱ a̱tsuma̱lima̱ a̱ yi.

13 Mejege ma ɗa vu yuwain shi,

a na vu uwai a̱tsuma̱ lyuci va ama a̱ va̱ aza a Isra'ila,

reve vu pura̱ itana a mantsa ma addama me e le.

Mejege ma ɗa vu yuwain shi,

reve vu pura̱ itana a mantsa ma addama me e le.

14 Mejege ma ɗa vu yuwain shi,

a na vi isawain uba̱ta̱ wu nsanji

na vu unai aza a na a zama ala'a.

Mejege ma ɗa vu yuwain shi,

na vu cayi aza a na a zama la'a

e ekere a n'yuwatan nle,

a̱tsuma̱ o urana u na addama a cina nle.>>

15 <<Urana u na a̱mu A̱sulazuva Zagbain

me ge'eto wu nɗa suru n yuwan ta̱ zuzu.

Cine vu yuwayin Isra'ila ne ɗa a yuwan wu,

waru iwuya ya̱ wu suru i ta̱ ka̱mba̱ aci a̱ wu.

16 Cine ama a̱ va̱

o sowoi ugana wo okono

a Masasan ma Akiza,

ne ɗa akapi a nɗa o sowo a̱tsuma̱lima̱,

a̱ ta̱ da̱na̱ usowu hali o kototo le diga a̱tsuma̱ o uvaɗi.>>

17 <<Amma zuva Masasan ma̱ Sihiyona,

akapi a ama a ta la'a,

waru u to o'wo uba̱ta̱ wa aza a akiza.

A̱za̱ o ugundo a Yakubu a ta usisa

ili ya agadu e le.

18 Amma A̱sulazuva Zagbain damma ta̱, ugundo wa̱ Yakubu a̱ ta̱ da̱na̱ tsa akina,

u'wa wa Isuhu ta̱ da̱na̱ tsa e elentsu a akina.

Amma Edom ta̱ da̱na̱ tsa anlya o u'yewu,

Isra'ila ta̱ kula̱to le reve a tama le.

Babu vuma na a buwa diga a̱tsuma̱ o u'wa wa Isuwa.>>

19 <<Amma ama a Nege o uyagi

o to o'wo na̱ Masasan ma Isuwa.

Aza a na a̱ ri e iɗa i mugaɗi ma Yahuda,

o to o'wo ni iɗa ya aza a Filistiya,

oɓolo ni iɗa ya Ifiramu na̱ Samariya.

Ugundo wa Banyami

u to o'wo nu upasu wi iɗa ya Giliyadu.

20 Ama a̱bunda̱ a Isra'ila

a na a̱ pura̱i a̱ 'ya̱wa̱ tsugbashi,

a̱ ta̱ ka̱mba̱ reve a usa iɗa ya Ka'ana

hali a̱ tyo o upasu wi iɗa ya Zarefat.

Waru ama a̱ Urishelima

aza a na a̱ pura̱i a̱ tyo tsugbashi a̱tsuma̱ a Sefarada

a̱ ta̱ ka̱mba̱ na a usa mulyuci ma Nege wu uyagi.

21 A̱za̱ e iwawi

a ta kumba masasan ma Sihiyona ma̱ Urishelima

a usa masasan ma Isuwa.

A̱sulazuva Zagbain na aciya̱yi a ɗa

wa yuwan tsugono tsa le.>>