1 Reve Yunana yuwan avasa a̱tyo uba̱ta̱ wa̱ A̱sulazuva A̱sula̱ a̱ yi, a̱yi pe a̱tsuma̱ a magula'a, 2 u damma,

<< <N ɗe ta̱ A̱sulazuva a̱tsuma̱ a̱tsuma̱lima̱ a̱ va̱,

waru u usu mu ta̱.

Waru diga pe uba̱ta̱ wu nden ma̱ a̱kwa̱kwa̱

n ɗe ta̱ adama e ikambishi,

avu vu uwwa mesun ma̱ va̱.

3 Vu vari mu ta̱ uba̱ta̱ wa̱ a̱ru'un a̱tsuma̱ a mala,

pe o ugundo u mala,

hali ikeɗu i mini i ka̱nda̱ruwa̱ mu.

Waru ikeɗu i mini ya̱ wu suru

a la'a ta̱ ucira u va̱.

4 Reve n damma,

ko na wo o'woi a tawa mu ta̱

diga a̱ ma̱ka̱ka̱n ma̱ wu,

na̱ ne suru n ta̱ da̱shi ene

A̱a̱'isamapaɗa akiza a̱ wu.>

5 Mini ma la'a ta̱ ucira u va̱,

mala'a u soɗu mu ta̱ suru suru,

waru ogozo a̱ mini a̱ ka̱ta̱la̱ ta̱ yinlu i va̱.

6 N liɓa ta̱ a̱tsuma̱ a mala'a

hali a̱ tyo pe a̱ nkyun yi nsasan,

a̱ ɓa̱ru mu uba̱ta̱ wa̱ a̱kwa̱kwa̱.

Amma a̱vu A̱sulazuva A̱sula̱ a̱ va̱,

vu uta̱a̱ mu ta̱ a̱ka̱ri o ndolo.

7 Ana me enei ukwisa̱ a̱ ta̱wa̱ mu,

a̱vu n yuwan majiyan ma̱ A̱sulazuva.

Avasa a̱ va̱ waru a rawa ta̱ uba̱ta̱ wa̱ wu,

a̱tsuma̱ a̱ A̱a̱'isamapaɗa a akiza a̱ wu.

8 Ele na a yuwusaan a̱ma̱li e pere a̱ga̱nda̱,

a vadalaa ta̱ icigi ya̱ A̱sula̱ a na a tsu vadala shi ucina̱.

9 Amma a̱mu ni ishipa yu ugodyusho i ɗa

ma ca wu kucci.

Waru n ta̱ shiton nzuwulai n na n yuwain.

Iwawi i ta̱ uba̱ta̱ wa̱ A̱sulazuva!>>

10 A̱vu A̱sulazuva a zuwa magula'a ma shama Yunana a̱ nge'en m mala.