1 Amulange kuti nduyando lupati biyeni Taata ndwaakatupa, lwakuti twiitwe kuti bana baLeza, aboobo tulimbabo. Nyika tiituzi pe nkaambo teeyakamuziba pe. 2 Nibayandwa, lino tulibana baLeza, takuna yubununwa pe kuti tuyoobaanzi, pesi tulizi kuti nayooliboniya tuyoba mbuli nguwe, nkaambo tuzomubona mbuli mbwabede. 3 Alimwi kufumbwa ulaabulangilizi muli Kkirisitu ulalisalazya mbuli mbwasalala alakwe.

4 Kufumbwa uchita chibi ulaamulandu wakutyola mulawu waLeza, nkaambo chibi nkutyola mulawu. 5 Mulizi kuti wakaliboniya kuti agwisye zibi, mpawo mulinguwe tamukwe chibi pe. 6 Taakwe ukkalilila mulinguwe unooya buchita chibi pe, taakwe pe ubisya wakamubona nikuba kumuziba.

7 Nibana bangu nimuyandwa, kutabi umweena. Kufumbwa uchita ziluleme, uliluleme, mbuli Kkirisitu mbwaluleme. 8 Kufumbwa uchita chibi nguwaSikuchenga mupati, nkaambo Sikuchenga wakabisya kuzwa kumatalikilo. Zyakachita kuti Mwana Mulombe waLeza ayubununwe nkuti alobye milimu yaSikuchenga.

9 Taakwe uzyalwa kwaLeza unooya buchita chibi pe, nkaambo chiimo chaLeza chilikkalilide mulinguwe, alimwi taakwe nachinooya bubisya pe nkaambo uzyedwe kwaLeza. 10 Acheechi kulabonwa kuti mbaani bana baLeza, alimwi mbaani bana baSikuchenga, kufumbwa utachiti chibotu teesi waLeza pe, nikuba utayandi munyina.

11 Nkaambo aaya ngimakani ngimwakamvwa kuzwa kumatalikilo, kuti tweelede kuyandana. 12 Alimwi peepe kuba mbuli Kkayini pe wakali wamubi alimwi wakajeya mwanike wakwe. Alimwi nkaamboonzi naakamujeya? Nkaambo milimu yakwe mwini yakali mibi mpawo yamwanike wakwe yakali luleme.

13 Nibakwesu, mutagambi, kuti nyika yamusula. 14 Tulizi kuti twakayinda kuzwa kulufu katuya mubuumi, nkaambo tulabayanda bakwesu. Kufumbwa utakwe luyando ulakkalilila mulufu. 15 Kufumbwa usula mukulana wakwe mujayi, alimwi mulizi kuti taakwe mujayi uli abuumi butamani bukkalilila mulinguwe. 16 Mbumbuboobu Jesu Kkirisitu mbutuzi chaamba luyando, kuti wakatula buumi bwakwe nkaambo kandiswe, mpawo tweelede kutula buumi bwesu nkaambo kabakwesu. 17 Pesi kuti umwi ulijisi zintu zyanyika mpawo wabona munyina kabulide, pesi katakwe luzyalo anguwe, luyando lwaLeza lulakkalilila biyeni mulinguwe? 18 Nibana bangu nimuyandwa, tutayandi mumajwi biyo nikuba kwaambuula pesi mukuchita amukasimpe.

19 Acheechi tuyooziba kuti tuli bakasimpe, akuba achoonzyo mumyoyo yesu kunembo lyakwe, 20 kufumbwa myoyo yesu niitupa milandu, nkaambo tulizi kuti Leza mupati kwiinda myoyo yesu, alimwi uzi zyoonse. 21 Nibayandwa, kuti myoyo yesu kayitatupi mulandu, tuli abusichaamba kunembo lyaLeza, 22 alimwi tulatambula kulinguwe kufumbwa nchitukumbila, nkaambo tubamba milawu yakwe akuchita zimubotezya. 23 Alimwi ooyu nguumulawu wakwe, kuti tweelede kusyoma muzina lyaMwana wakwe Mulombe Jesu Kkirisitu akuyanda umwi awumwi, mbuli mbwakatulayilila. 24 Boonse baswiilila milawu yakwe balakkalilila mulinguwe, alakwe mulimbabo. Alimwi acheechi tulizi kuti ulakkalilila mulindiswe, aMuuya ngwaakatupa.