1 Nimuyandwa, mutasyomi kufumbwa muuya, pesi ngamweezye myuuya kuti naa njakwa Leza, nkaambo basinsimi babeji bayingi bakazula kale munyika. 2 Acheechi mulaziba Muuya waLeza, muuya woonse waamba kuti Jesu Kkirisitu wakaza mumubili nguuwa Leza, 3 alimwi muuya woonse utazumini Jesu teesi waLeza pe. Ooyu nguumuuya wakukazyaniya, ooyo ngumwakamvwa kuti uliikuza, alimwi lino ulimunyika kale.

4 Nibana bangu bayandika, muli bakwaLeza, alimwi mwakabazunda, nkaambo ooyo ulimulindinywe mupati kwiinda ooyo ulimunyika. 5 Nkikaako mbanyika, nzibaamba nzyanyika, mpawo nyika ilabaswiilila. 6 Tuli bakwaLeza. Kufumbwa uzi Leza ulatuswiilila, alimwi ooyo utali waLeza tatuswiilili pe. Acheechi tuluuziba Muuya wakasimpe amuuya walweeno.

7 Nimuyandwa, ngatuyandane, nkaambo luyando luzwa Leza, alimwi ooyo uyanda ulizyedwe kwaLeza alimwi ulimwizi Leza. 8 Ooyo utakwe luyando tamwizi pe Leza, nkaambo Leza nduyando. 9 Muli eechi luyando lwaLeza lwakachitwa kuti luboneke akati kesu, kuti Leza wakatuma Mwana wakwe Mulombe umwi luzutu munyika, kuchitila kuti tukapone mukwiinda mulinguwe. 10 Muli eechi muuli luyando lwakasimpe, peepe kuti twakayanda Leza pesi kuti wakatuyanda akutuma Mwana wakwe Mulombe kuti abe chipayizyo chazibi zyesu.

11 Nimuyandwa, mbukunga Leza wakatuyanda oobo, iswe aswebo tweelede kuyandana. 12 Taakwe muntu walinabona Leza pe, kuti twayandana, Leza ulakkalilila mulindiswe alimwi luyando lwakwe luliluleme mulindiswe.

13 Acheechi tulizi kuti tulakkalilila mulinguwe alimwi alakwe mulindiswe, nkaambo wakatupa Muuya wakwe. 14 Alimwi twakabona akwaamba kuti Taata wakatuma Mwana wakwe Mulombe mbuli Mufutuli wanyika. 15 Kufumbwa uzumina kuti Jesu Mwana Mulombe waLeza, Leza ulakkalilila mulinguwe, alimwi alakwe muliLeza. 16 Aboobo tulizi akusyoma luyando Leza ndwalaalo kulindiswe.

Leza nduyando, alimwi ooyo ukkalilila muluyando ulakkalilila muli Leza, mpawo Leza ulakkalilila mulinguwe. 17 Muli eechi luyando lulazuzikizigwa andiswe, kuti tukabe abusichaamba nkaambo kabuzuba bwalubeta, nkaambo mbuli mbwali boobo andiswe mbutubede munyika eeyi. 18 Taakwe kuyoowa pe muluyando, pesi luyando lwakasimpe lulatanda buyoofu. Nkaambo kuyoowa kuli achakuchita achisubulo, alimwi kufumbwa uyoowa taluleme pe muluyando.

19 Tulayanda, nkaambo Leza wakaba mutaanzi kutuyanda. 20 Kuti umwi waamba kuti, "Ndilamuyanda Leza," mpawo kasula munyina wakwe, mubeji, nkaambo kufumbwa utayandi munyina wakwe ooyo ngwakabona, teenga ulayanda Leza pe ooyo ngwatabwene. 21 Alimwi ooyu mulawu ngutulaawo uzwa kulinguwe, wakuti ooyo uyanda Leza uleelede ayande munyina wakwe lubo.