1 Aboobo ngamusowe zyoonse zisofweede akoonse kweena akuwupawupa abbivwe akuvwiya koonse. 2 Mbuli bana bavwanda, amuyandisye makupa achoonzyo amuuya, kuti angawo mukakomene mulufutuko, 3 Nkaambo mwakalabila kale bubotu bwaMwami.

4 Ngamuze kulinguwe, kuli ooyo musemo upona, wakakakwa abantu pesi kubusyu bwaLeza wakasalwa alimwi muyandisi, 5 alimwi mbuli misemo ipona amuyakwe kuti mube ŋanda yaMuuya, mukabe mbuli nkamu yabapayizi basalala, mukape zipayizyo zyamuuya zitambulika kuli Leza mukwiinda muli Jesu Kkirisitu, 6 mbuli mbukubede mumalembe kuti,

"Amulange! Ndabikka musemo muZiyoni,

musemo waŋanda usalidwe alimwi muyandisi loko,

mpawo ooyo usyoma mulinguwe takoyoofwisigwa bweme pe."

7 Nkikaako kulindinywe nimusyoma, muyandisi, pesi kulibaabo batasyomi,

"Chiyako eecho bayaki nchibakakaka

chaba musemo mupati muyandisyi waŋanda,"

8 alimwi,

"Chiyako eecho chiyoochita bantu kuti bakalebwe,

musemo eecho chiyoochita bantu kuti bakawe."

Balalebwa nkaambo kakutalemeka ijwi, mbuli mbubakali bambilidwe kuti bachite.

9 Pesi mulimusyobo usalidwe, bapayizi babwami, muli nyika isalala, bantu baLeza, kuti mukaluule milimu igambya yayooyo wakamwiita kuzwa mumudima kuya mumumuni wakwe ugambya. 10 Muchiindi chayinda teemwakali bantu baLeza pe, pesi lino muli bantu baLeza, chiindi chakayinda teemwakali tambwide luse pe pesi lino mwatambula luse.

11 Nimuyandwa, ndamusungwaazya mbuli beenzu abanakweenda munyika eeyi kuzwa kuzisusi zibi zyamubili eezyo zyeeta nkondo kumuuya wanu. 12 Ngamupone munzila ilikabotu akati kabaabo batazi Leza, kuchitila kuti ambweni ngabalaambula bubi atala andinywe, ambweni ngabalabona milimu yanu mibotu mpawo bakalumbayizye Leza mubuzuba oobo mbwayoliboniya.

13 Amulibombye nkaambo kaMwami kumuntu woonse uli mubweendelezi bwabantu, nikuba kumwaami wachisi, 14 nikuba kubeendelezi mbakasala mbuli batumidwe anguwe kukupa chisubulo kulibaabo babisya akulumbayizya aabo bachita kabotu. 15 Nkaambo nkuukuyanda kwaLeza, kuti mukuchita kabotu mukawumuzye bantu bafubafuba batazi. 16 Ngamupone mbuli bantu baangunukide, pesi mutabelesyi kwaangunuka kwanu kukuvumba bubi, pesi ngamupone mbuli balanda baLeza. 17 Mulemeke bantu boonse. Muyande babunyokwe. Muyoowe Leza. Mulemeke mwami.

18 Inywe nibalanda, ngamulifwiinsye kulibasimalelo banu alulemeko loonse, peepe luzutu kuli bali abuuya abali amoyo mubombe, pesi alubo aabo bali abukali. 19 Nkaambo umwi ulalumbwa kuti, kabikkide mizeezo yakwe kuli Leza, ulakakatila kumachise nikuba napenzegwa zitaluleme. 20 Nkaambo ujana mpinduunzi kuti, wachita chibi mpawo wawumwa ankaambo kanchicho kukakatide? Pesi kuti wachita chibotu mpawo wapenzegwa ankaambo kanchicho kukakatide, ulijisi kulumbilizigwa aLeza. 21 Nkaambo kuli cheechi mwakayitwa, mpawo Kkirisitu alakwe wakapenzegwa ankaambo kanu, kamusiila chikozyanisyo, kuti mutobele muntaamo zyakwe. 22 Tachitide chibi pe, taakwe manwa pe akajanwa mumulomo wakwe. 23 Eelyo nibakali kumutukila, taakwe naakabatukila pe mukubweedezya, naakapenzegwa taakwe naakabayosezya pe, pesi wakasyoma kuliyooyo ubeteka munzila iluleme. 24 We lwakwe wakanyampula zibi zyesu mumubili wakwe achisamu*, kuti tukafwe kuchibi mpawo tupone mubusalali. Azilonda zyakwe mwakaponesegwa. 25 Nkaambo mwakalikusweeka mbuli mbelele, pesi lino mwabweeda kuMweembeli aSikulanga myuuya yanu.