1 Ndime Pita, mutumwa waJesu Kkirisitu,

Kuli banakweenda bamuSanseene muzilikiti zyaPontasi, Galatiya, Kkapadosiya, Eziya akuBbitiniya, 2 basalidwe akubikkwa aLeza Taata alimwi bakasalazigwa aMuuya kuti balemeke Jesu Kkirisitu alimwi nkaambo kakunsansiilwa abulowa bwakwe,

Luzyalo aluumuno ngaluvule kulindinywe.

3 Ngalumbwe Leza aWisi waMwami wesu Jesu Kkirisitu! Aluse lwakwe lupati twakazyalwa bupya kubulangilizi bwakupona mukwiinda mukubuka kwaJesu Kkirisitu kuzwa kubafu, 4 alimwi mulukono lutanyonyooki pe, lutakwe kampenda, alimwi lutakulumpali pe, lubambilidilwe ndinywe kujulu, 5 inywe nimukwabilidwe mukwiinda munguzu zyaLeza mukwiinda mulusyomo nkaambo kalufutuko luyubunidwe kale kuchiindi chakumamanino.

6 Muli cheechi amubotelwe, nikuba lino muchiindi chiniini mweelede kuyopenzegwa mumasukuusyo asiyenesiyene, 7 kuchitila kuti lusyomo lwanu lwachoonzyo, lubotu kwiinda ingolide oolo nikuba lulaloba lulayeezyegwa amulilo, lulaliboniya mukutembawula amubulemu akululemeko kukuyubununwa kwaJesu Kkirisitu. 8 Kamutamubwene pe, mulamuyanda, nikuba kuti lino tamumubwenye mulasyoma mulinguwe alimwi mulabotelwa kutaambiki alukondo lusumpukide, 9 nkaambo mujana mpindu yalusyomo lwanu oolo luli lufutuko lwamyuuya yanu.

10 Atala alufutuko oolu basinsimi bakasinsima atala aluzyalo oolo lweelede kuba lwanu bakafunkulula akuyanduulisisya, 11 bakayanduulisisya kuti muntu uli biyeni nikuba kuti nchiindinzi eecho chakaambwa aMuuya waKkirisitu mulimbabo nibakali kwaamba atala akupenzegwa kwaKkirisitu abulemu oobo bwakali kutobela. 12 Chakayubununwa kulimbabo kuti teebakali kulikutawukila lwabo pesi inywe, muzintu zyakaambwa kulindinywe abaabo bakakambawuka makani mabotu kulindinywe mukwiinda muMuuya Usalala wakatumwa kuzwa kujulu, zintu eezyo baangelo zibalangilila.

13 Nkikaako ngamuchenjele kumizeezo yanu, mululame, amubikke bulangilizi bwanu buzwide atala aluzyalo oolo luchiza kulindinywe kukuyubununwa kwaJesu Kkirisitu. 14 Mbuli bana baswiilila, mutaponi muziyandisyo zyanu zyabubi zyakale eezyo zyakutaziba Leza, 15 pesi mbuli ooyo wakamwiita ulasalala, amusalale anywebo mukuchita kwanu koonse, 16 mbuli kuti kulilembedwe kuti, "Amusalale, nkaambo ime ndilasalala."

17 Alimwi kuti nimukomba kamumwiita kuti nguTaata ooyo ubeteka umwi awumwi chakutasaluuzya mukwiinda munchito zyakwe, ngamupone chakuyoowa chiindi choonse banakweenda munyika. 18 Mulizi kuti mwakanununwa kuzwa munzila zibi nzimwakakona kuzwa kuli bamawuso, peepe azintu zibola zilimbuli insiliva angolide, 19 pesi abulowa buyandisi bwaKkirisitu, buli mbuli oobo bwanwana wambelele butakwe kampenda nikuba kabata. 20 Wakabikkwa kale nyika kiitanalengwa pesi wakayubununwa kumamanino achiindi nkaambo kanu. 21 Mukwiinda mulinguwe mujisi busichaamba muli Leza, wakamubusya kuzwa kubafu mpawo wamupa bulemu, kuchitila kuti lusyomo lwanu abulangizi bube muli Leza.

22 Kamuli mwakasalazya myuuya akuswiilizya kwanu kukasimpe nkaambo kaluyando lwabakwesu lwachoonzyo, ngamuyandane chakumaninina kuzwa kumoyo. 23 Mwakazyalwa bupya, peepe ambuto ibola pesi eeyo itaboli, mukwiinda mujwi lipona akukkalilila lyaLeza, 24 nkaambo malembe aamba kuti,

"Bantu boonse balimbuli sokwe

alimwi bulemu bwalyo buli mbuli malubaluba asokwe.

Sokwe lilayuma, mpawo malubaluba alaloka,

25 pesi ijwi lyaMwami lilakkalilila kwalyoonse."

Ijwi eeli ngiimakani mabotu akakambawukwa kulindinywe.