1 Lino amuswiilile, inywe nibavubi, ngamulile akoomoka nkaambo kamapenzi ayoomusikila. 2 Buvubi bwanu bwakabola alimwi zisamo zyanu zyakaligwa amunanze. 3 Ingolide ansiliva zyanu zyaba angula, alimwi ngula yazyo njiiyooba kamboni atala andinywe alimwi iyoolya mibili yanu mbuli mulilo. Mwakalibambila buvubi bwanu kumazuba akumamanino aaya. 4 Amulange! Impindu yabasikubeleka aabo bakatebula myuunda yanu, eeyo njimutakwe mwakaliya, balalila, alimwi kulila kwabasikutebula kwasika kumatwi aMwami Singuzu. 5 Mwakapona chakukkalikana anyika amubuvubi, mwaneneesya myoyo yanu mwaba mbuli munyama ubambilidwe kufundwa. 6 Mwakapa mulandu akujeya muntu ululeme, taakwe naakamukakila pe.

7 Nkiikako, nibakwesu, mube amoyo mulamfu, , mane kukuboola kwaMwami. Ngamulange, mulimi ulalindila muchelo mubotu waanyika, kali amoyo mulamfu kuli nguwo mane ukajane imvula ntaanzi ayakumamanino. 8 Inywe alanu mube amoyo mulamfu. Ngamuyake myoyo yanu, nkaambo kuboola kwaMwami kuli afwiifwi.

9 Nibakwesu, mutanyontooki, kuli umwi awumwi, kuti mutakabetekwi; ngamulange, mubetesi uliimvwi kumulyango. 10 Nibakwesu, amuyeeye basinsimi aabo bakaambula muzina lyaMwami, mbuli chitondeenzyo chakupenzegwa amoyo mulamfu, 11 Ngamulange, tubaamba kuti balasekelela aabo bakakakatila. Mwakalumvwa lukakatilo lwaJobbu, alimwi mwakaabona mabambe aMwami, Mwami mbwakali aluzyalo aluse.

12 Nibakwesu, atala azyoonse, mutakonki pe, nikuba atala ajulu nikuba atala anyika nikuba kufumbwa chikonke chilibuti, pesi ngamubone kuti "iiyi" wanu abe iiyi mpawo "peepe" wanu abe peepe, kuchitila kuti mutakabi amulandu.

13 Kuli umwi na akati kanu ulimumapenzi? Mumuleke akombe. Kuli umwi na ubotelwa? Ngalumbayizye akwiimba. 14 Mpali na akati kanu uchiswa? Ngayite baalu bambungano, mpawo bamukombele, bamunanike mafuta muzina lyaMwami, 15 alimwi inkombyo yalusyomo ilamuponiya muntu uchiswa, mpawo Mwami ulamubusya, alimwi kuti wakali wachita zibi, uyoolekelelwa. 16 Nkikaako mulyaambilile zibi zyanu kuli umwi awumwi, mpawo mukombelane, kuti mukapone. Inkombyo yamuntu ululeme ili anguzu mpati mukubeleka kwayo. 17 Elayija wakali muntu mukulengwa mbuli ndiswe alimwi wakakomba kapati kuti imvula itawi, alimwi kwaminyaka itatu amyeezi ilimusanu awumwi imvula taakwe niyakawa pe anyika. 18 Eelyo wakakomba lubo mpawo julu lyakawisya mvula, alimwi inyika yakazyala muchelo.

19 Nibakwesu, kuti umwi akati kanu waleya kuzwa kukasimpe mpawo umwi wanu wamuboozya, 20 ngamuzibe kuti, kufumbwa uboozya sizibi kuzwa kukulubizya kwakwe uyoofutula muuya wakwe kuzwa kulufu alimwi uyovumba zibi zyiingi.