1 Nibakwesu, mutatondeezyi lusalulo mbuli mbumujisi lusyomo lwaMwami wesu Jesu Kkirisitu, Mwami wabulemu. 2 Nkaambo kuti muntu uli anweenwe zyangolide azisamo zyeebeka waza mumbungano yako, amuntu muchete ulaazisamo zidelukide alakwe wanjila, 3 alimwi waswiilizya ooyo usamide zisamo zyeebeka mpawo wati, "Kkala achuuno eechi chibotu," kakuli wati kumuntu muchete, "Imikila aawo," nikuba, "Kkala aansi kumawulu aangu," 4 teemwasaluuzyana na akati kanu, akuba babetesi amiyeeyo yabubi?

5 Nibakwesu nimuyandwa, Amuswiilile. Leza taakabasala na aabo bachete munyika kuti babe bavubi mulusyomo akukona bwami oobo mbwakasyomezya kulibaabo bamuyanda? 6 Pesi inywe mwasampawula muntu muchete. Teesi bavubi na bamudyamizya, teembabo na bamutola munkuta? 7 Teembabo na basampawula izina lilemekwa lyayooyo nkumubede?

8 ✝ Kuti chachoonzyo mwazuzukizya mulawu wabwaami, mbuli mumalembe, "Uyooyanda nguyakilene aawe mbuli lwako," Wachita kabotu. 9 Pesi kuti watondeezya kusalulana, wachita chibi, alimwi watyola mulawu mbuli basikubisya. 10 Nkaambo kufumbwa ubamba milawu yoonse pesi wakachilwa muli umwi waba amulandu kuli yoonse. 11 ✝ Nkaambo ooyo wakaamba kuti, "Utachiti bwaamu," wakaamba alubo kuti, "Utajeyi." Kuti teewachita bwaamu pesi wajeya, waba sikutyola mulawu. 12 Aboobo mwambuule alimwi aboobo muchite mbuli baabo bayobetekwa aansi amulawu walwangunuko. 13 Nkaambo lubeta talukwe luse kuli ooyo utatondezezye luse, kakuli luse nduyendelezya atala alubeta.

14 Nibakwesu, nimpindunzi njajana, kuti muntu waamba kuti ulijisi lusyomo pesi katakwe milimu? Lusyomo lwakwe ngalulamufutula na? 15 Kuti mukwesu nikuba muchizi wabula chisamo achakulya chabuzuba abuzuba, 16 mpawo umwi akati kanu waamba kuti kulimbabo, "Mweende muluumuno, mukasaalilwe akukkuta," kamutabapede pe zintu ziyanda mibili yabo, zipa mpinduunzi? 17 Aboobo lusyomo aluliikke, kuti kalutajisi milimu, lulifwide.

18 Pesi umwi uyooti, "Ujisi lusyomo alimwi ime ndijisi milimu." Nditondeezye lusyomo lwako lutajisi milimu pe, mpawo me amilimu yangu ndilakutondezya lusyomo lwangu. 19 Usyoma kuti Leza ngumwi. Wachita kabotu. Nikuba basikazwa balasyoma alimwi balakankama. 20 Iwe numufubafuba, ulayanda na kutondeezegwa, kuti lusyomo lutajisi milimu talukwe lugwasyo pe? 21 Abburahamu taata wesu teewakalulamikwa amilimu na, naakapeda mwana wakwe Ayizekki achipayililo? 22 Wabona kuti lusyomo lwakali kweenda aamwi amilimu yakwe, alimwi lusyomo lwakazuzukizigwa amilimu, 23 alimwi malembe akazuzukizigwa aamba kuti, "Abburahamu wakasyoma Leza, alimwi wakayitwa mbuli ululeme," mpawo wakategwa mweenzunyina waLeza. 24 Mwazibona kuti muntu ululamikwa amilimu peepe alusyomo aluliikke.

25 Alimwi munzila njiyeeyo alakwe Rahabbu sibwaamu teewakalulamikwa amilimu na aawo naakatambula batumwa akubasunsika kunzila imbi?

26 Nkaambo mbuli mubili utajisi muuya ulifwide, aboobo lusyomo lutajisi milimu lulifwide.