1 Lino Muuya waamba antanganana kuti muchiindi chakumamanino bamwi bayoozwa kulusyomo akutobela myuuya yalweeno anjiisyo zyabasikazwa, 2 mukwiinda munjiisyo zyakuupawupa zyababeji bali amyoyo mbuli bakawumpwa alubulo lupya, 3 bakasya bantu kukwataana akulesya zyakulya eezyo Leza nzyakalenga kuti kazitambulwa akulumba abaabo basyoma akuziba kasimpe. 4 Nkaambo choonse chintu chakalengwa aLeza chilikabotu, alimwi taakwe chiyeelede kukakwa kuti kachili chatambulwa akulumba, 5 nkaambo eelyo chinooli chasalazigwa ajwi lyaLeza ankombyo.

6 Naa wabikka malayilile aaya kunembo lyabakwesu, uyooba simulimu mubotu waKkirisitu Jesu, wakakomezegwa amajwi alusyomo anjiisyo imbotu njimwakatobela. 7 Utabi azyakuchita ansyomo zitali zyabunaLeza alimwi ansyomo zyabufubafuba. Uliyiisye mubunaLeza. 8 Nkaambo kuyiisya mubili kulagwasya buniini biyo, buleza mbupati munzila yoonse, mbuli mbuchinyampwide chisyomezyo chabuumi bwalino alimwi alubo bwabuumi buchiza. 9 Kwaamba ooku nkwachoonzyo alimwi kuleelelwa kutambulika zizwide. 10 Nkaambo kacheechi tuliikuzuzaana akudunamina, nkaambo tuli abulangilizi bwesu bubikkidwe ali Leza muumi, Mufutuli wabantu boonse, kapati kuli baabo basyoma.

11 Kulayilila akuyiisya zintu eezi. 12 Kutabi umwi uubawusya bukubusi bwako, pesi ube chitondezyo kubasyomi mukwaambula amukuloma, muluyando, mulusyomo, mukusalala. 13 Mane ndikaboole, sungwaala kukubalwa kwalugwalo antanganana, kukusungwaazya basyomi akukuyiisya. 14 Utalekeleli chipo nchulaacho, nchwakapegwa mukwiinda mukwaambuula kwabusinsimi aawo inkuta yabaalu niyakabikka maanza aabo alinduwe. 15 Chita milimu eeyi, ulipede kulinjiyo, kuchitila kuti boonse babone kuzwidilila kwako. 16 Ulilingule anjiisyo yako; jatisisya kuzintu eezi, nkaambo akuchita oobo uyoolifutula abakuswiilizya.