1 Utakalalili munene pesi mwaambile mbuli mbuchita kuli wuso; ujate baalumi bakubusi mbuli bakulana bako, 2 banakazi bakakomena mbuli bamanyokwe, banakazi bakubusi mbuli bachizi, mubusalali boonse.

3 Mulemeke bamukabafu aabo bali bamukabafu choonzyo. 4 Kuti mukamufu kali abana nikuba bazukulu, mubaleke lutaanzi bayiiye mulimu wabo wabukombi kumpuli yabo alimwi balumbule bazyali babo mbuli mbubakabalela; nkaambo eechi chilatambulika kubusyu bwaLeza. 5 Ooyo mukamufu wachoonzyo, alimwi ucheede aliikke, kabikkide bulangilizi bwakwe kuliLeza akwiinkilila anembo mukukumbila ankombyo mansiku asikati; 6 pesi mukamufu ooyo uyandisya zyakulibotezya ulifwide nikuba kachipona. 7 Balayilile mabambe aaya, kuchitila kuti kutabi upa mulandu. 8 Kuti uumwi katasanini bakunzubo zyakwe, alimwi kapati bakumpuli yakwe, wakaka lusyomo alimwi wabija kwiinda utasyomi.

9 Kutabi mukamufu ulembwa mumweelwe wabamukabafu, kunze akuti kalaaminyaka iyinda makumi musanu akkumi limwi, kanooli wakali mwanakazi wakali kwetwe lumwi, 10 alimwi weelede abe ampuwo mbotu kumilimu yakwe, kali uumwi wakakomezya kabotu bana bakwe, usamawusya beenzu, usanzya mawulu abasalali, ugwasya bali mumapenzi, alimwi ulipeda kukuchita chibotu munzila yoonse.

11 Pesi mukake kulemba bamukabafu bakubusi; nkaambo kuti ziyandisyo zyabo zyamubili zyabachita kuti bayande kukwatwa, balamusiya Kkirisitu akuyanda kukwatwa, 12 alimwi aboobo balalyeetela mulandu wakutyola chizuminano chabo chitaanzi. 13 Kwataba oobo, balayiiya kuba batolo, beendenda kuŋanda akuŋanda, alimwi peepe batolo luzutu pesi balavwiya akunyonganya, kabaamba eezyo nzibatayelede kwaamba. 14 Aboobo ndilati bamukabafu bachili bakubusi bakwatwe, bazyale bana, beendelezye ŋanda zyabo, alimwi batapi mweenya kuli sinkondoma kuti ataambuuli bubi atala andiswe. 15 Nkaambo bamwi bakatobela Satani kale. 16 Kuti kakuli mwanakazi usyoma kali anzubo zyakwe zilaabamukabafu, ngabagwasizye; imbungano tiiyelede kulemenwa pe, kuchitila kuti ikonzye kugwasizya aabo bamukabafu bachoonzyo.

17 Baalu bambungano beendelezya kabotu beelede kulemekwa zyiindilide, kapati aabo bajisi mulimu wakukambawuka akuyiisya; 18 ✝ nkaambo imalembe aamba kuti, "Utamwaangi mulomo musune kuti kawulyatawula zilyo," alimwi, "Simulimu weelede kujana muholo wakwe." 19 ✝ Utazumini kufumbwa mulandu utamikizigwa mwaalu wambungano kunze abukamboni bwabantu babili nikuba batatu. 20 Mbuli kuli baabo bakakatila muchibi, bakalalile kunembo lyabantu boonse, kuchitila kuti bamwi boonse bayoowe.

21 Kunembo lyaLeza alya Kkirisitu Jesu abaangelo basale ndamulayilila kuti muchite malayilile aaya kakutakwe kusalula, mutachiti chintu kufumbwa akusalula. 22 Mutafwambani kubikka maboko, nikuba kulidilana muzibi zyabamwi; mulibambe kamusalala. 23 Utanywi meenda luzutu, pesi ubelesye wayini muche nkaambo kabula bwako akuchiswa kwako lyoonse.

24 Zibi zyabamwi bantu zilaboneka antanganana, zibazulida kulubeta, pesi zibi zyabamwi ziboneka muchiindi. 25 Aboobo alubo milimu mibotu ilaliboniya; alimwi nikuba kuti ngateembubo, tayikkalilili pe kayisisikene.