1 Nibakwesu, lino atala akuboola kwaMwami wesu Jesu Kkirisitu akubunganisigwa kwesu kuti tukamutambule, tulamukumbila, 2 kuti mutafwambani kuyoowa nikuba kupengaana, nikuba amuuya nikuba ajwi, nikuba alugwalo lubaanga luzwa kulindiswe, lwaamba kuti buzuba bwaMwami bwasika. 3 Kutabi nikuba muntu umweena nikuba munzila ilibiyeni; nkaambo buzuba oobo tabukwe kuyooza pe, kunze kwakuti mupapi akaze lutaanzi, alimwi muntu ukompeme ayubununwe, mwana walunyonyoono, 4 ukazya akulisumpula atala azintu zyoonse zitegwa leza nikuba chikombwa, kuchitila kuti akabweze chuuno chakwe muŋanda yaLeza, kalyaamba kuti nguLeza.

5 Tamuyeeyina kuti nindakachili andinywe ndakamwaambila eechi? 6 Alimwi mulichizi eecho chilookumukasya lino kuchitila kuti akayubununwe muchiindi chakwe cheelede. 7 Nkaambo nsiinswa yabukompami iliikubeleka kale; luzutu ooyo uyikasya lino uyoochita boobo mane akazwe munzila. 8 Eelyo alimwi ooyo mukompami uyooyubununwa, alimwi Mwami Jesu uyoomunyonyoona aluyooyo lwamulomo wakwe akumunyonyoona abulemu bwakuboola kwakwe. 9 Kuboola kwawukompeme amulimu waSatani kubelesya nguzu zyoonse azitoondezyo zyakulisumpula amalele, 10 alimwi alweeno loonse lwabubi lwabaabo bayoonyonyoonwa, nkaambo bakakaka kuyanda kasimpe alimwi kuti bafutulwe. 11 Nkikaako Leza uyoobatumina nguzu zyalweeno, ziyoobachita kuti basyome zyakubeja, 12 kuchitila kuti boonse bakapegwe mulandu aabo batasyomede kasimpe pesi bakali kubotelwa mububi.

13 Nibakwesu nimuyandwa aMwami, tweelede kupa kulumba kuli Leza lyoonse nkaambo kanu, Leza wakamusala kuzwa kumatalikilo kuti mufutulwe, mukwiinda mukusalazigwa aMuuya amukusyoma mukasimpe. 14 Kuli cheechi wakamwiita mukwiinda mumakani mabotu eesu, kuchitila kuti mukajane bulemu bwaMwami wesu Jesu Kkirisitu. 15 Nkikaako bakwesu, ngamwimikile nji mpawo mujatisisye kuziyanza nzitwakamuyiisya, nikuba ajwi lyamulomo nikuba alugwalo.

16 Lino Mwami wesu Jesu Kkirisitu lwakwe, aLeza Taata wesu, wakatuyanda aluzyalo lwakwe wakatupa kuumbuluzigwa kutamani abulangilizi bubotu, 17 asungwazye myoyo yanu kumilimu yoonse mibotu njimuchita.