1 Nibakwesu, kumamanino, mutukombele, kuti ijwi lyaMwami lyeendelele kunembo chakufwambana akulemekwa, mbuli mbulyakachita akati kanu, 2 alimwi kuti tukavunwe kuzwa kubusofwazi abantu babi; nkaambo teesi boonse pe bali alusyomo.

3 Pesi Mwami ulisyomekede; uyoomusimya alimwi akumukwabilila kumubi. 4 Alimwi tujisi busichaamba muMwami atala andinywe, kuti muliikuchita alimwi muyoochita zintu nzitumulayilila.

5 Mwami alulamike myoyo yanu kuluyando lwaLeza akukukakatila kwaKkirisitu.

6 Nibakwesu, lino tulamulayilila, muzina lyaMwami wesu Jesu Kkirisitu, kuti musosoloke kuzwa kumukwesu upona mubutolo amuli ziteendelani aziyanza eezyo nzimwakatambula kuzwa kuli ndiswe. 7 Nkaambo inywe lwanu mulizi mbumweelede kutwiiya; teetwakali batolo pe nitwakali andinywe, 8 teetwakalya chakulya chawumwi katutaliyide pe, pesi twakabeleka amachise akuminwa sikati amansiku, kuti tutalemezyi naba umwi akati kanu. 9 Tatwaambi kuti tatukwe cheelelo kulugwasyo oolo, pesi twakamupa kuti kube chitondeezyo chakutobela. 10 Nkaambo nikuba nitwakali andinywe, twakamupa mulayizyo ooyu: Kuti kufumbwa umwi utayandi kubeleka, atalyi.

11 Nkaambo tumvwa kuti bamwi akati kanu bapona mubutolo, batayandi kubeleka, kabayanda kunjilila mumilimu yabamwi. 12 Lino bantu baliboobo tulabalayilila akusungwazya muMwami Jesu Kkirisitu kuti bachite mulimu wabo muchuumunizi akujana kupona kwabo.

13 Pesi bakwesu, mutakatali pe kuchita kabotu. 14 Kuti umwi wakaka kuswiilila nzitwaamba mulugwalo oolu, mumuchenjelele muntu ooyo, alimwi mutabi achakwiita anguwe, kuti abe abweeme. 15 Mutamulangi mbuli sinkondonyokwe pe, pesi mumuchenjezye mbuli mukwesu.

16 Lino Mwami waluumuno lwakwe amupe luumuno kuzyiindi zyoonse munzila zyoonse. Mwami abe andinywe moonse.

17 Ime, Pawulu, ndilemba injuzyo eeyi aluboko lwangu. Eechi niimpa mumagwalo aangu woonse; niinzila njindilemba aayo.

18 Luzyalo lwaMwami wesu Jesu Kkirisitu lube andinywe moonse.