1 ✝ Aboobo kuti kakuli kusungwazigwa muli Kkirisitu nikuba kumbulizigwa kuzwa kuluyando nikuba mubulidilani muMuuya nikuba kufwidilana nsoni aluse, 2 amukazuzikizye lukondo lwangu akuba amuzeezo uumwi, kamujisi luyando lumwi, kamuzwide muuya uumwi amuzeezo uumwi. 3 ✝ Kutabi nzimuchita abusindya nikuba kulikankayizya, pesi mukulibombya amulange bamwi kabalimbubo kwiinda ndinywe. 4 Kutakabi naba uumwi ulilanga lwakwe luzutu, pesi alubo anzibayanda bamwi. 5 ✝ Ngamube amuzeezo ooyu akati kanu, ooyu wakali muli Kkirisitu Jesu,

6 ooyo, nikuba kuti wakali muchiimo chaLeza,

takukwe naakayanda kweelana aLeza nchiichintu nchitweleede kujatisisya,

7 pesi wasiya zyoonse,

wakabweza chiimo chabulanda*, kazyedwe muchiimo chabantu.

8 Alimwi wakajanwa muchiimo chamuntu wakalifwinsiya mpawo wakaswilila mane kuyoosika kulufu,

nikuba lufu achiingano.

9 ✝nkaambo kaako Leza wakamusumpula loko

wamupa izina lyiinda mazina woonse,

10 kuti muzina lyaJesu,

mazwi woonse ayofugama,

kujulu aanyika akunsi anyika,

11 alimwi ndimi zyoonse zikakuzumine kuti Jesu Kkirisitu nguMwami,

kubulemu bwaLeza Taata.

12 Nkikaako, nibayandwa, mbuli mbumuswiilila lyoonse, peepe nindiliwo luzutu pesi lino kapati ninditawo pe, amubeleke lufutuko lwanu mukuyoowa amukulifwiinsya; 13 ✝nkaambo nguLeza ubeleka mulindinywe, akumuchita kuti muyandisye akuchita chibotu eecho nchayanda.

14 Amuchite zintu zyoonse kamutakwe lungungu nikuba kukazyaniya, 15 ✝ kuti mube batakwe kampenda alimwi baluleme, bana baLeza batakwe kampenda akati kabaabo bakompeme izyalani lipilingene, akati kabo inywe nimumweeka mbuli nyenyeezi munyika, 16 kamujatisisya ijwi lyabuumi, kuchitila kuti mubuzuba bwaKkirisitu ndikakube amantukwe kuti tendakachijana chabuyo nikuba kubeleka chabuyo pe.

17 Nikuba kuti ndabbomweedwa achipayililo mbuli chipo chakunywa chipayililwa nkaambo kamulimu walusyomo lwanu chipayililwa kuli Leza, ndilakondwa akubotelwa aamwi andinywe moonse. 18 Mbumbubo anywebo mweelede kukondwa akubotelwa andime.

19 Ndilabulangilizi muMwami Jesu kuti nditume Timoti kulindinywe akufwaambana, kuchitila kuti ndikasungwazigwe nindakamvwa amakani aanu. 20 Tandikwe ulimbuli nguwe pe, mukozu wachoonzyo uyeeya atala andinywe. 21 Bamwi boonse bayanda kulilanga lwabo beni, peepe eezyo zyaJesu Kkirisitu. 22 Pesi mulizizi kale Timoti mbwapona kabotu, mbuli mwana awisi mbwakabeleka andime mumakani mabotu. 23 Nkikaako ndili abulangilizi bwakumutuma akufwambana mbuli mbunditabone kuti zilandeendela biyeni; 24 alimwi ndilasyoma muMwami kuti mukayindi kaniini ndilaboola andime.

25 Ndayeeya kuti kuleelede kutuma Epafiroditasi mukwesu simulimuma alimwi silumambama alimwi mutumwa wako asimulimu kuli nzindiyanda, 26 nkaambo wakali achiyandisyo chakumubona moonse, alimwi wakawusa nkaambo mwakamvwa kuti wakali kuchiswa. 27 Nichoonzyo wakali kuchiswa, afwiifwi akufwa. Pesi Leza wakamufwida luse; kuteensi alinguwe luzutu pesi akulindime lubo, kuchitila kuti nditabi amawuse atala amawuse. 28 Ndili achiyandisyo chakumutuma lubo we, nkikaako, kuti mukabotelwe mwaakumubona lubo, kuti alimwi kucheye kulikatazya kwangu. 29 Aboobo amumutambule alukondo loonse muMwami; alimwi mulemeke bantu baliboobo, 30 nkaambo wakali waamba kufwa nkaambo kamulimu waKkirisitu, katakata buumi bwakwe kuti amane ooyo mulimu wanu ngumwakakachilwa kuchita kulindime.