1 Nibakwesu, kumamanino, amubotelwe muMwami. Kumulembela zintu zikozyeene tee penzi pe kulindime, alimwi kulindinywe ndugwasyo kuti ndizichite.

2 Amuchenjelele aabo bantu bali mbuli bankala, amuchenjele basimuchita zibi, amuchenjele bayungi bamubili. 3 ✝ Nkaambo tuli abupalulwe bwakasimpe, aabo bakomba Leza mumuuya, abulemu muliKkirisitu Jesu, mutabi akulikankayizya mumubili. 4 ✝ Nikuba kuti ambebo ndilijisi kulikankayizya mumubili. Kuti kakuli uumwi muntu uyeeya kuti ulaanzila yakulikankayizya mumubili, ime ndiliyindilide: 5 Ndakapalulwa mubuzuba bwamusanu aatatu, muchiyanza chabantu baIzirayeli, wamukowa waBbenjamini, alimwi ndili muHebburu wakazyalwa abaHebburu; mukujata zyamulawu ndili muFarisi, 6 mbuli kukulipeda ndili sikupenzya wambungano, mukuchita bululami buli aansi amulawu butakwe kampenda pe. 7 Pesi kufumbwa zintu zyoonse zyakali kundipa mpindu, zyakaba zyabuyo nkaambo kaKkirisitu. 8 Atala zeezi zyoonse zyakaba zyabuyo, nkaambo kaluzibo lwindilide lwakuziba Kkirisitu Jesu Mwami wangu. Nkaambo kakwe ndakasweekelwe zintu zyoonse, akuzibona kazili masifwisifwi, kuchitila kuti ndijane Kkirisitu 9 akuti ndijanwe mulinguwe, kanditakwe bululami bwangu ndimwini, oobo buzwa kumulawu, pesi oobo buli mukwiinda mulusyomo lwaKkirisitu, abululami buzwa kuli Leza mukwiinda aboobo buli mulusyomo; 10 kuti ndikamuzibe anguzu zyakubuka bwakwe, alimwi tukakonzye kwabilana mumapenzi aakwe, akuba mbuli nguwe mulufu lwakwe, 11 kuchitila kuti muli iimwi nzila ndikaakujane bubuke kuzwa kubafu.

12 Teensi kwaamba kuti ndachijana kale eechi, nikuba kuti ndililuleme kale; pesi ndidunaminina kuti chibe changu eecho Kkirisitu nchakandijanina. 13 Bakwesu, nsili kulituntuzya kuti ndakazichita kale ime lwangu; pesi chintu chimwi nchindichita, kuluba zilimusule alimwi akudunaminina kunembo kuzintu zilikunembo, 14 Ndiladunaminina mpalamo yampindu yalwiito lwaLeza lwangu lwakujulu muliKkirisitu Jesu.

15 Amuleke aabo besu bakakomena mumuuya babe amuzeezo uumwi; nikuba kuti balaaba ayiimwi mizeezo isiyene abamwi, Leza ulamuyubunwida eecho anywebo. 16 Atujatisye kukasimpe luzutu kuli eecho nchitwakajana.

17 ✝ Bakwesu, amube antoomwe andime mukundiiya, alimwi mwiiye aabo bapona mbuli ndinywe balaachitondeezyo chabuumi mbutupona. 18 Nkaambo bayiingi, aabo mbindakamwaambila kayiingi alimwi lino nikuba ndilikumwaambila kandili amisozi, bapona mbuli basinkondonyina bachiingano chaKkirisitu. 19 Alimwi mamanino aabo ndunyonyooko, leza wabo mbula, alimwi bapa bulemu bwabo masampu aabo, mizeezo yabo ilikumisalo yaansi anyika. 20 Pesi bukkale bwesu buli kujulu, alimwi kuzwa muli mbubo tulabulangilizi bwaMufutuli, Mwami Jesu Kkirisitu, 21 ✝ ooyo uyoosandula mibili yabo ikompeme, kuti ukabe mbuli mubili wakwe wabulemu, mukwiinda munguzu zimukonzezya, nikuba kweendelezya zintu zyoonse kulinguwe.