ప్రక 10

దేవ్ను దూత అజు న్హాను పుస్తక్‍

1 కువ్వత్‍వాలొహుయాతె అలాదుదూత స్వర్గం మతూ ఉత్రిన్‍ ఆవనూ దేక్యొతొ. ఇను మబ్బునా పేరాకీన్‍ థొ, ఇను ముడ్క్యా ఫర్‍ మబ్బును బాణం థూ; ఇను మోఢు సూర్యూడ్‍ను బింబనితరా ఇనుపాదాల్‍ ఆగ్ను స్తంభల్నితరా థూ. 2 ఇను హాత్మా చొఢాయిన్‍ఛాతె ఏక్‍ న్హాను పుస్తక్ థూ. ఇను ఇను కవ్వాత్‍ను పాదంనా జమీన్‍ఫర్‍ మ్హేందిన్, 3 సింహం చిగ్రాతిమ్ మోటు ఆవాజ్‍తి ఆర్భటించే. ఇను ఆర్భటించుతెదె హాఃత్‍ ఇజ్లియా ఇవ్నూను ఆవాజ్‍ బోలు. 4 యోహాఃత్‍ ఇజ్లియా బోల్యొతె సంగతుల్‍నా ఛాపొనాకొ, ఇనా లిఖ్కొన కొకరీ స్వంర్గం బోలను హఃమ్జొ.

5 బుజు ధర్యావ్‍ ఉప్పర్‍ జమీన్‍ ఉప్పర్‍ ఉబ్రీన్‍ ర్హవమా మే దేక్యొతె యో దూత ఇను ఖవ్వాత్‍ను ఆకాష్‍ ఉప్పర్‍ పాడిన్‍ 6 స్వర్గంనా ఇన్మా ఛాతె ఇనబీ, జమీన్‍ ఇన్మా ఛాతె యినా, ధర్యావ్‍నా ఇన్మా ఛాతె యినా సృష్టించీన్‍, యుగ యుగాల్‍ జీవిన్ఛాతె ఇనాతోడు కరి ఒట్టు బేందిన్‍ అజు ధ్యేర్‍ హుసెకొయిని దూత బోల్యు. 7 పన్కి హాఃత్‍ మనూ దూత బోలతె ధన్‍మా ఇను పుంగి వాజడమా, దేవ్‍ ఇను దాసుల్నా ప్రవక్తల్నా బోలుతె సువార్తనా ప్రకారమ్‍ దేవ్ను మర్మమ్‍ సమాప్త హుసెకరి బోల్యు.

8 తెదె స్వర్గంమాతూ మే క్హంజొతే ఆవాజ్‍ అజు మారేతి వాతే బోల్తూజయిన్‍ ధర్యావ్ ఉప్పర్‍ జమీన్‍ ఉప్పర్‍ ఉబ్రీన్‍ ఛాతె యో దూతను హాత్‍మా కడ్డాయిన్‍ఛాతె యో న్హాను పుస్తక్ లీలకరి బోలను హమ్జొ.

9 మే యో దూతను కనా జైయిన్‍ ఆ న్హాను పుస్తక్ మన దాకరి బోలమా ఇను ఇనా పల్లీన్‍ ఖైనాక్‍, యో తారు పేట్నా కఢు హుసే పన్కి తారు మోఢనా షేత్‍తరా మధురం తూ ర్హాసె కరి మారేతి బోల్యొ.

10 తెదె మే యో న్హాను పుస్తక్ దూతను హాత్‍ మతూ లీలిన్‍ ఖైనాక్యొ; యో మార మోఢనా షేత్ని తరా మధురం తరా థూ పన్కి మే యినా ఖైనాకనా పాసల్‍ మారు పేట్నా కఢు హుయుతు. 11 తెదె ఇవ్నె తూ అద్మినా గూర్చీన్, జనంనా గూర్చీన్‍, యో ఆ భాష వాతె బోలతె యినా గూర్చీన్, కెత్రూకి అద్మి రాజనా గూర్చీన్ అజు ప్రచారంకరను ఖచ్చితంకరి మారెతి బోల్య.