ప్రక 18

బాబిలోను పఢిజావను

1 ఇన పాసల్తి మోటు అధికారం హుయూతె అజేక్‍ దూత స్వర్గంమతూ ఉత్రీన్‍ ఆవనూ దేఖ్యొతొ. ఇను మహిమను బారెమా జమీన్‍ మోత్తం ప్రకాషించు. 2 ఇను మోటు స్వరంతి ఛిక్రీన్‍ అంబోల్యు మోటుబబులోన్‍ పాడిగయు యోబాయ్కొ కూలిగయు. యోదయ్యాల్నా జివ్వానుజొగొబి, హరేక్‍ దుష్టాత్మానాబి ఢర్‍లాగ్సె, దుష్టాత్మానాబి అసహ్యంహుయూతె హరేక్‍ జిన్వార్‍నా జీవను పట్టుబి, హుయు. 3 కింకతొ సమస్తహుయూతె*18:3 మూలభాషమా దేహ్‍ః అద్మియేబి మోహోద్రేకం*18:3 మూలభాషమా జాహఃత్‍ వ్యభిచార్ను ఆహ్ఃహుయుతె ఇనూ వ్యభిచారంను దారుబి పీన్‍ పడిగయు, ధర్తినురాజా ఇనేతి వ్యభిచార్‍కర్యు, జమీన్‍మాఛాతె రాయభారివాలు ఇనూ సుఖభోగాల్నూటేకె ధన్వాలు హుయు.

4 బుజు అజేక్‍ ఆవాజ్‍ స్వర్గంమతూ అంనింతరా బోలమా హఃమ్జొ మారు అద్మియే,

తుమె ఇనూ పాప్‍మా భాగ్‍నొకొహువొతింబి,

ఇనూ తెగుల్మాబి కెహూబి తుమ్నా నాఆవునూతింబి ఇనా బెందీన్‍ ఆవొ.

5 ఇనూ పాప్‍ ఆకాష్‍తోడి అందీన్‍ ఛా,

ఇనూ నేరంనా దేవ్ హఃయల్‍ కర్లీన్‍ ఛా.

6 యొ దిదుతెతిమ్మస్‍ ఇనా దెవొ;

ఇనూ కామ్నుతిమ్‍ ఇనా జాహఃత్‍ కరొ;

యో మలాయుతె థాలిమా ఇనటేకె బేయింతల్‍ మలాయిన్‍ బేందొ.

7 యో మే రాణినితరా బేహఃవాలి, మే విధవరాల్‍ కాహె,

దుఃఖంనా దేఖిసిష్‍ దేఖిష్‍ కొయినికరి,

ఇను దిల్మమా సోచొలీది అనటేకే,

యొ ఇనుయో కెత్రెకి గొప్పకర్లీన్‍,

సుఖ భోగాల్నా అనుభవించికి ఎత్రేస్‍ వేదననా దుఃఖంనా ఇనా కరొ.

8 అనటేకే ఎక్కస్‍ ధన్నె ఇనూ తెగుళ్‍,

కతొ మర్రణ్‍బి‍ దుఃఖంబి ఖాళ్‍బి ఆవ్సె;

ఇనా న్యావ్‍ కరూకరతె దేవ్‍హుయోతె ప్రభూ,

కువ్వత్‍ వాలొ అనటేకే యోఆగ్తహాతె పూరా బాలినాకిదిసె.

9 ఇనేతి వ్యభిచార్‍ కరీన్‍ సుఖభోగాల్నా అనుభవించుతె ధర్తీను రాజాబి ఇను బాధదేఖీన్‍ ఢర్తూహుయీన్‍ దూర్ ఉబ్రీన్‍ ఇను బలిజంకరతెదువ్వొనా దేఖ్యతెదె ఇనూ విషయంతీ ఛాతి కూటిలేతూహుయీన్‍ రొవ్తూ 10 అయ్యో, అయ్యో బబులోన్‍ మోటు నంగర్, కువ్వత్‍హుయుతె నంగర్‍, ఎక్కస్‍ నిమిషంమా తునా న్యావ్‍ ఆయు కాహెనాకరి బొల్లిసె.

11 మలక్మాను దంధొకరవాలుబి, యోనంగర్నా ఇవ్ను రాచునా లెవ్వాలుకొయినికరి దేఖీన్‍ రొవ్తూ, 12 కతొ ఇవ్ను రాచు ఘేణు రూపు రత్నాల్‍నా ముత్యాల్నా సన్నపును నారను లుంగ్డనా బైంగని రంగ్ను లుంగ్డా సాదాలుంగ్డా ల్హొయ్‍ను వర్ణనులుంగ్డా కెత్రూకి రాచునాబి, 13 హరేక్‍ రకంహుయూతె దబ్బమ్రానునా హరేక్‍ రకంహుయూతె దాత్ను రాచునా, ఘనూ మోల్‍హుయూతె లాక్డి పితల్ను ల్హొడు చలువనుపత్రొ కెత్రుకిహుయూతె ఇనేతి బనాయుతె హరేక్‍ విధంహుయూతె రాచునాబి, లపాడకొయింతె చెక్క ఓమము దువ్వొనుధవ్లత్‍ అత్తర్ సాంబ్రాణి అంగూర్ను రహ్, తేల్‍, కవ్లూఆటొ, ఘౌబి, గయ్యే, భోక్డా, మ్హేండా కెత్రూకి ఇనా, ఘోడనబి రథములనబి దాసుల్నా అద్మియేను జాన్‍నాబి అద్మియేను జాన్నా హంకెతూ కోన్బి లిసేకొయిని; 14 తారు జాన్నబి లాడ్‍హుయుతె ఫల్ తునా బెందీన్‍ గయూ, వ్యర్థంహుయూతె హాఃరుబి దివ్యహుయూతె హాఃరుబి తునా మలకొయింతిమ్‍ నాష్‍హుయుగు. యోహంకెతూ దెఖ్కాసేష్‍ దెఖ్కావ్సె కొయినికరి బొల్లెతుహుయీన్‍, ఇనాగూర్చి దుఃఖపడ్చె. 15 యోపట్నంహాతె దవ్లత్‍ వాలుహుయూతె రాచునూ దంధొకరవాలు రోవ్తూహుయీన్‍, దుఃఖపడ్తూ. 16 అయ్యో, అయ్యో, సన్నపును నారనులుంగ్డనా బేంగణిల్హొహినువర్ణంనూ లుంగ్డనా పేర్లిన్‍, ఘేణుతి రత్నాల్‍తీ ముత్యాల్తి అలంకరిచురాక్యుతె మోటునంగర్‍, అత్రె ఐష్వర్యం ఎక్కస్‍ సెకండ్‍మా ఖర్రాబ్ ‍హుయూగుని కరి బొల్లెతూహుయీన్‍, ఇనూ బాధనా దేఖీన్‍ ఢరీజైయీన్‍ దూర్‍ ఉబర్సె. 17 హరేక్‍ నావనా చలావాలొబి, కెజ్గహుయ్తోబి ప్రయాంకరతె హర్యేక్‍ జనూబి, ఝాజ్‍వాలుబి, ధర్యావ్ను ఉప్పర్‍ కామ్‍కరీన్‍ జింకరతె హాఃరుబి దూర్తి ఉబ్రీన్‍ 18 బలుకరతె ఇనూ దువ్వోనా దేఖిన్‍; ఆ మోటుపట్నంతీ సమానాహుయూతె కెహూకరి బొల్లెతూ ఛిక్రాన్‍బేందీన్‍, 19 ఇవ్ను ముఢ్క్యాఫర్‍ దుమ్మునాఖిలీన్‍ రోయిన్‍ దుఃఖ్‍హోతూ అయ్యో, అయ్యో, ఆమోటునంగర్; ఇన్మా ధర్యావ్ను ఉప్పర్‍ ఝాజ్‍ ర్హవ్వాలు అక్కూజనూ, ఇనకనా జాహఃత్‍ ఖర్చునాబారెమా దవ్లత్‍ వాలుహుయు; యో ఏక్‍ నిమిషంమా ఖర్రాబ్‍ హుయుగూనీ కరి బల్లెతూహుయీన్‍ ఛిక్రాన్‍ మ్హేందుకరా.

20 స్వర్గంమా, దేవ్ను లఢ్కా, అపొస్తుల్‍వాలా, ప్రవక్తల్‍వాలా, ఇనాగూర్చి ఆనందించొ, కింకతొ ఇనవల్లా తుమ్నా హుయుతె న్యావ్నాబదుల్‍ దేవ్‍ యోనంగర్నా న్యావ్‍ తీర్చిరాక్యోస్‍.

21 పాసల్తి బలిష్ఠు హుయోతె ఏక్‍ దూత మోటు ఫరాయేతె ఉక్లినుబండొ పాఢీన్‍ ధర్వావ్మా నాఖిదీన్‍ అమ్నితరా మోటు నంగర్‍హుయూతె బబులోన్‍ జల్‍దీతి దక్లాయ్‍జైయిన్‍ అజు కెదేబి దెఖ్కావ కొయింతిమ్‍జాసె. 22 తారు దందొకరవాలు జమీన్ఫర్‍ మోటా ప్రభువుహుయీన్‍ థూ; అద్మిహాఃరుబి తారు మాయతంత్రాల్నాహాతె మోసంహుయుగు. 23 తారు దందొకరవాలు జమీన్ఫర్‍ మోటా ప్రభువుహుయీన్‍ థూ; అద్మిహాఃరుబి తారు మాయతంత్రాల్నాహాతె మోసంహుయుగు; అనటేకే వైణికులయొక్కబి, గాయకులయొక్కనబి, పిల్లనగ్రోవి ఫూకతె ఇవ్నాబారెమాబి, పుంగి ఫూకతె ఇవ్నాబారెమాబి ఆవాజ్‍ అజు కెదేబి తుమారమా హఃమ్జావ్సెకొయిని. బుజూ కెహూ సిల్పిహుయూతె కరవాలు సిల్పి కోన్బి తారమా కెత్రెబి దెఖ్కావ్సెకొయిని, ఫరతె ఆవాజ్‍ అజు కెదేబి తారమా హఃమ్జావ్సెకొయిని, దివ్వొను ఉజాలు తారమా హంకెతూ జంకనూస్‍ జంక్చెకొయిని, య్హాను నౌవ్రొను ఆవాజ్బి య్హాను నౌరిను ఆవాజ్బి తారమా అజు కెదేబి హఃమ్జావ్సేకొయిని కరి బోల్యు.

24 బుజు ప్రవక్తల్‍తీబి దేవ్ను లఢ్కతీబి, జమీన్‍ఫర్ కత్రాయుతె ఇవ్నహాఃరను బారెమాబి ల్హొయి యోనంగర్మా దెఖ్కాయుకరి బోల్యు.