Êxodo 18

యిత్రో మోషేనా మలను

1 యెహోవా ఇష్రాయేల్ అద్మియేతి ఐగుప్తు మాతు బాదర్ లాయోతె హాఃబర్, మోషేనా, ఇను అద్మియేహుయుతె ఇష్రాయేలీయుల్నా హుయుతె అక్కు మిద్యానుమా యాజకుడ్ హుయుతె మోషేను మామో యిత్రో హాఃమ్జో. 2 మోషేను మామో యిత్రో మోషే ఇనకన బోలిమొక్ల్యొతె మోషేని బావణ్ సిప్పోరానా, 3 యో బే జణ ఛియ్యాన కేడెలీన్ మోషే కన నిక్ల్యొ. ఇన్మా ఏక్జణు నామ్ గెర్షోమ్. షానకతొ మోషే "మే అలాదు దేహ్ఃమా అలాదు వాలొ" కరి బోల్యొ. 4 బెమ్మాను వాలను నామ్ ఎలియాజరు. షానకాతో "మారు భానొ భా దేవ్ మన మద్దత్. యో ఐగుప్తురాజొను తల్వార్ మతూ మన బచ్చాడ్యొ" కరి యో బోల్యొ. 5 మోషే మామో యిత్రొ ఇను బే ఛియ్యాన ఇను బావన్నా కేడెలీన్ ఝాడిమా దేవ్ను పాహ్డ్ కనా ర్హయోతె మోషే కన ఆయో. 6 "తారు మామోహుయోతె యిత్రో కరి మే తారి బావణ్, ఇనకేడె మలీన్ ఇను బే ఛియ్యావ్నా తారకన ఆంకరియేస్" కరి మోషేనా ఖబర్ మొక్ల్యా. 7 మోషే ఇను మామోన హాఃమే గయో. ఇనా హాఃలామ్ కరీన్ బుచ్చాదిదో. ఏక్నాయేక్ అష్యల్ ఛాన మాలంకరీన్ డేరకనా ఆయా. 8 బాద్మా యెహోవా ఇష్రాయేల్ అద్మియే బణే ఐగుప్తురాజోనా, ఐగుప్తీయుల్ కర్యుతె వాట్మా ఇవ్నా హుయుతె మీన్హాత్ ఇన మాతు యెహోవా హామ్న చుఖ్యోతె హాఃబర్ మోషే ఇను మామోన వివరంతీ బోల్యొ . 9 యెహోవా ఐగుప్తీయుల్ హాత్ మాతు చుక్కావమా ఇష్రాయేల్ అద్మియేనా కర్యుతె అష్యాల్ హాఃమ్జిన్ యిత్రో ఖుషిహుయో. 10 యిత్రో "ఐగుప్తీయుల్ హాత్ మాతు, ఐగుప్తురాజోను హత్ మాతు తుమ్నా చొడాయిన్, ఐగుప్తీయుల్ హేట్ బానిసమ్ మాతు ఆ అద్మియేనా చొఢాయోతె యెహోవానా స్తుతి హువ్వదా. 11 యెహోవాస్ మిగ్లితె దేవ్తీబి మహాన్ వాలొ హాంకె మన మాలంహుయు. షానకతో ఇష్రాయేల్ బణే హాంకర్తి ర్హాయుతె ఐగుప్తుల్ వాలనా కంతు యో ఇను అద్మియేనా బచ్ఛాడ్యో" కరి బోల్యో. 12 మోషే మామో యిత్రో హోమబలి, అలాదు బలియే దేవ్నా దిదో. అహారోన్, ఇష్రాయేల్ను మోట్టా అద్మియే మలీన్ దేవ్ను సన్నిధిమా ఖాణు ఖాద్యా.

న్యావ్ కరవాలన ఉబ్బారి కాడను

13 మోషే బుజేక్ ధన్నే అద్మియేనా న్యావ్ కరనటేకె బేఖ్యొ. వ్హానేతు హాఃమ్జెథోడి అద్మియే మోషేకన ఉబ్రీన్ థూ. 14 అద్మియేనా మోషే కరుకరాతే హాఃరు యిత్రో దేఖ్యొ. యో మోషేతి "థూ ఆ అద్మియేనా కరుకురాతే షాత్? వ్హానేతు ధరిన్ హాఃజెథోడి థూ ఎక్కస్ జణొ బేసిన్ ర్హయుతో బచ్ఛుతె ఇవ్నె హాఃర తారు అగల్ బగల్ ఉబ్రీన్ ర్హావను సాత్?" కరి పుఛ్చాయో. 15 అనటేకె మోషే ఇనొ మామోతి "దేవ్న న్యావ్ మాలంకరనటేకె ఇవ్నె మారకన ఆవ్సె. 16 ఇవ్ను ఇచ్మా కెహుబి లడ్డాయే ఆయుతో ఇను పరిష్కార్‌టేకె మారకన ఆవ్సె. మే ఇవ్నా న్యావ్ కరీన్, దేవ్ను చట్టంనా, ఇను ధర్మషాష్ర్త నియమాల్నా ఇవ్నా మాలంకరయిస్." కరి బోల్యొ 17 అనటేకె మోషే మామో ఇనేతి "థూ కరుకరాతె కామ్ అష్యల్ కాహే. 18 అం కర్యొతో థూ తారేతి ఆ అద్మియేనా మహ్ఃలాయ్‌ జైయిన్ కంజోర్ హుయిజాసు. థూ ఎక్కస్ జణొ యో కామ్ కరిష్‌ కొయిని. యో తున ఘణు మిన్హత్ తరా ర్హాసె. 19 మారు వాత్ హాఃమ్జ్. మే తున ఏక్ హూఃజ్ బోలుస్. దేవ్ తారకేడె ర్హాసే. థూ దేవ్నా హాఃమె ఆ అద్మియేనా బణె ఉబ్రీన్ ఇవ్ను లడ్డాయే దేవ్ను సన్నిధిమా లీలిన్ ఆవ్ను. 20 అద్మియే దేవ్ను చట్టాల్ ధర్మషాస్ర్త నియమాల్ బోల్ను. ఇవ్నె ఛాల్నుతె వాట్మా, కర్నుతె కామ్యే ఇవ్నా మాలంకరావ్ను. 21 థూ అద్మియేహఃరమా దేవ్ను బణే ఢర్తా ర్హాయిన్, హాఃచ్ఛి బణే ఆహ్ఃతి ర్హాహిన్ ఫైసా ఖవ్వాలు కాహేతె అద్మియేనా తయార్ కర్లేను. ఇవ్నా న్యావ్ కరవాలు తరా బణాయో. హజార్ అద్మియేనా ఏక్జణు, హోః అద్మియేనా ఏక్జణు, అఢైయిహ్ః అద్మియేనా ఏక్జణు, ధహ్ః అద్మియేనా ఏక్జణుతిం ఇవ్నా నియమించొ. 22 ఇవ్నె హాఃరు వహాఃత్మా అద్మియేనా న్యావ్ కర్సే. పరిష్కారమ్ ఉవ్వకొయింతె ముష్కిలేస్ తారకన లీలిన్ ఆవ్సే. న్హాన్నాను జఘణ ఇవ్నేస్ పరిష్కార్ కర్సే. ఇంనితరా ఇవ్నె తారు భోజన్ భాగ్ హుయుతో తున హాల్కు హుసే. 23 దేవ్ అమ్‌ కరనటేకె తున ఒప్పిలిదోతొ, తారు కామ్ హాల్కు హుసే. ఆ అద్మియే హాఃరు ఇవ్ను ఘేర్నా సమాధానంతి జాసే" కరి బోల్యొ. 24 మోషే ఇను మామోను వాత్ హాఃమ్జిన్ యో బోల్యుతె హాఃరు కర్యొ. 25 ఇష్రాయేల్ హాఃరన తాఖత్ ఛాతె అద్మియేనా ఏర్పచిలీన్, హజార్ అద్మియేనా ఏక్జణ, హోః అద్మియేనా ఏక్జణు, అఢై ఈహ్ః అద్మియేనా ఏక్జణు, ధహ్ః అద్మియేనా ఏక్జణు తరా న్యాయ్ కరవాలతిం తయార్ కరీన్ ఇవ్న అద్మియే ఫర్ అధికారం దిదో. 26 ఇవ్నె కెదేబి అద్మియేనా న్యావ్ కరవాల థా. ఇవ్నె కఠిన్ను లఢాయేనా మోషేకనా లాయ, న్హాను లఢాయేనా తుమే న్యావ్ కర్యొ. 27 బాద్మా మోషే ఇను మామోన బోలిమొక్లమ యో ఇను దేహ్ఃన గయో.