Êxodo 39

యజాకుల్నాటేకె లుంగ్డా తయార్ కర్ను

1 యెహోవా మోషేన ఆజ్ఞా బోల్యోతిం పరిషుద్ధజోగోమా అహరోను కరతే సేవను నిమిత్తమ్ పాణి రంగ్ను డోరియే, బెమగణ్ను రంగ్ను ఢోరియే, లాల్ రంగ్ను డోరియే సేవ లుంగ్డా కాతో అష్యాల్ను లుంగ్ఢా షివ్యా. 2 అజు యో ఘేణతి, పాణి రంగ్ను డోరియే, బెమగణ్ను రంగ్ను డోరియే, లాల్ రంగ్ను డోరియే బరిక్ నారతి ఏఫోద్ను కర్యో. 3 పాణి రంగ్ను డోరియే, బెమగణ్ను రంగ్ను డోరియే, లాల్ రంగ్ను డోరియే, బరిక్ నారతి చాతుర్ కామ్వాలు నాఖానటేకె ఘేణును రేకుల్ తరా మారిన్ యో ఢాలిను తరా కత్ర్యూ. 4 ఇన బే భావ్డను కరిన్ బే కనారిమా ఉబ్రారి రాక్యో. 5 ఇనఫర్‌ ఘేణను పాణిను రంగ్ను ఢోరియే, బేంగణ్‌ రంగ్ను ఢోరియే, లాల్ రంగ్ను ఢోరియే, బారిక్ నారొతి లప్టుయుతె కుప్సురాత్ను షీయుతె ఏక్సేహుయిన్ బేబాజు షీవ్యా. ఇమ్‌ యెహోవా మోషేన ఆజ్ఙదిదొ. 6 అజు ఘేణను కనారిన లాగడ్యుతె హార్యు ఫత్రా తయార్ కరిన్. ఇష్రాయేల్ ఛియ్యాను నామ్ కేదెబి ర్హావతిమ్ ఛాపోను రూప్మా చెక్యా. 7 యో ఇష్రాయేలీయుల్నా హాఃయల్ హుయుతె ఏఫోదు భావ్ఢా ఫర్ ఇన ర్హాక్యో. అమ్‌ యెహోవా మోషేన ఆజ్ఙ దిదొ.

ఛాతిను పతకమ్

8 అజు యో ఏఫోదు కామ్ తార ఘేణతి పాణి రంగ్ను డోరియే, బెమగణ్ను రంగ్ను డోరియే, లాల్ రంగ్ను డోరియే, బరిక్ నారతి బోమ్మల్ కామ్ తార పతకమ్నా కర్యో. 9 యో లాంభు ఏక్ బిల్ ఛాత్, ఛౌవ్డు ఏక్ బిల్ ఛాత్. యో పతకాన్నా బిట్కి మర్యుతెదే యో ఛార్ బాబు తరా థూ. 10 ఇవ్నే ఇనమా ఛార్ పంక్తుల్నా రత్నంనా లగాడ్యు. మాణిక్య, గోమేధికమ్, మరకతంను హుయుతె పంక్తి మొదుల్ను; 11 బెమ్మను పంతిమా పద్మరాగం, నీలం, ధన్ నికతెను ఉజాళుతరా మణుల్ ఛాతె రత్నాల్, 12 తీన్మను పంతిమా గారుత్మతకం, యష్మురాయి, ఇంద్రనీలాలను రత్నాల్, 13 ఛార్మను పంతిమా లాల్ రంగ్ ఫత్రో, సులిమాని ఫత్రో, సూర్యను ఉజాళు ఛాతె రత్నాల్ క్రమ పద్ధతితో లాగడ్యు. 14 యో రత్నల్ ఇష్రాయేలీయుల్ నామ్ను ప్రకార్, భార ఛాపో తార చెక్యుతె ఇవ్ను నామ్ ప్రకార్, భార గోత్రముల్ నామ్ ఏక్యేక్ ఫర్ ఏక్యేక్ నామ్ చెక్కయు. 15 అజు ఇవ్నే యో పతకమున్నా అష్యాల్ను ఘేణుతి సీవ్యుతె కామ్ హుయుతె చైన్నా కర్యా. 16 ఇవ్నే బె ఘేణు రింగియే కరిన్ యో బె రింగియేనా పతకపు బె కానరిన ర్హాకిన్. 17 సీవ్యుతె యో బె ఘేణను చైన్ పతకపు కానరిన బె రింగియే న్హాక్యా. 18 సీవ్యుతె యో బే చైన్ను కానరిన యో బే కానరిన లాగడిన్ ఏఫోదు భావ్ఢాను ఫర్ ఇన హాఃమే రాక్యా. 19 అజు ఇవ్నే బే ఘేణు రింగియేన కరిన్ ఏఫోదు హాఃమే ఛాతే పతకపు మైయి కనారిన ఇను బే కనారిన ఇన నాక్యా. 20 అజు బే ఘేణను కొంకియే కరిన్ ఏఫోదు విచిత్రహుయుతె కంబర్ను కట్టున ఉఫర్ ఇను బేమాను మాలయుతె హాఃమే ఇన హాఃడక్, ఏఫోదు బెంమ్మాను భావ్డను కాండమ్నా హేట్ను భాగ్మా నాక్యా. 21 యో పతకమ్ ఏఫోదు విచిత్రహుయుతె అల్లికను కట్టుఫర్ ర్హావతిమ్ యో ఏఫోదుమాతు మేందిన్ జావ్వకొయినితిం యో పతకమ్నా ఇను కొంకియేన ఏఫోదు కొంకియేన పాణిను రంగ్ను డోరియేతి బాంద్యా. ఇమ్‌ యెహోవా మోషేన ఆజ్ఞపించొ.

అలాదు యాజకుల్నా లుంగ్డా

22 అజు యో ఏఫోదు కుడ్తు కెవల్ పాణి రంగ్ను డోరితి సీవ్వాను కామ్ తార కర్యో. యో కుడ్తు ఇచ్మా ఛాతే చీలున మూచ్చిన్ ర్హాకిన్ కవచమ్ తరా తయార్ కర్యొ. 23 యో పటాకొయినితిమ్ ఇను చీలున అజుబజు ఏక్ కవచమ్ ర్హాసే. 24 అజు ఇవ్నే కుడ్తు కానరిన ఫర్ పాణి రంగ్ను డోరియే, బెంగణ్ను రంగ్ను డోరియే, లాల్ రంగ్ను డోరియే, అనార్ పంఢా కర్యా. 25 అజు ఇవ్నే అష్యాల్ను ఘేణుతి గంటో కరిన్ యో అనార్ ఫంఢాను ఇచ్మా, కాతో యో కుడ్తు కనారీన ఫర్ ఆజుబజు ఛాతె అనార్ పంఢాను ఇచ్మా యో గంటొయేనా మ్హేంద్యా. 26 యెహోవా మోషేన ఆజ్ఙాపించోతిమ్ సేవకరనటేక ఏక్యేక్ గంటోనా ఏక్యేక్ దానిమ్మ పండాన యో కుడ్తు కనారిఫర్ అస్పీష్ రాక్యా. 27 యెహోవా మోషేనా ఆజ్ఞా దిదుతిమ్ అహరోనునా, ఇను ఛియ్యావ్నాబి న్హానుషు నారొతీ వోణిన్ కామ్ కరీన్‌ కుడ్తా నాక్యు. బారిక్ నారతీ ముఢ్క్యాను చుంబ్లొ కర్యు. 28 పత్లు నారొతీ టోపియే, కుడ్తా కర్యు. 29 నీలం, ఊదా, లాల్ రంగ్తీ పేనిన బారిక్ నారొతీ నడికట్టునా అల్లను కాంనితరా కర్యా. 30 స్వచ్ఛహుయుతె ఘేణుతి పరిషుద్ధ కిరీటం జోడ్నుఱూప్మా ఏక్ రేక్ తయార్ కరీన్ యెహోవా మోషేనా ఆజ్ఞదిదోతె ఇమ్మస్ ఇనఫర్ యెహొవా పరిషుద్ధుడ్ కరి ఛాపోతరా లిఖ్కాయు. 31 యో ముద్రనా మాథునుపాకనా లగాఢీన్ ర్హానుతిమ్ నీలం రంగ్ను దాగొతీ బాంద్యు. ఆ అక్కూ యెహోవా మోషేనా ఆజ్ఞదిదోతిమ్ కర్యు.

కామ్ ఖతం కర్ను

32 ప్రత్యక్చమ్ను ఢేరమా మందిర్ను కామ్ హాఃరు ఖాతంహుసే. యెహోవా మోషేన ఆజ్ఞాపించోతె ప్రకార్ మాస్ ఇష్రాయేలీయుల్ కర్యా. 33 తెదె ఇవ్నె మందిర్నా ఢేరన ఇను రాచ్ఛు హాఃరు ఇను కొంకియే, పలకల్, అడ్డు లాక్ఢి, స్తంభాల్, దిమ్మల్బి, 34 లాల్ రంగ్ న్హాక్యుతె మ్హేండను చాంబ్డును ఉప్పర్ను తెర, గండు మాస్లు చాంబ్డును ఉప్పర్ను తెరల్, 35 సాబుత్ మందసమ్ను ఇను - లాక్ఢి, గోర్నుపీఠమ్, 36 బల్లన, ఇను రాచ్ఛు హఃరు, సన్నిధి రోటా, 37 పవిత్రహుయుతె దివ్వొను ఝాడు, ఇను దివ్వొయే, దివ్వొయేను వరసా, ఇను హాఃమన్ దివ్వొబాలనటేకె తేల్, 38 ఘేణను వేదిక్, అభిషేకంను తైలం, పరిమళ దువ్వొను ద్రవ్యమ్, వేదిక ధర్వాజునా పడ్దొ, 39 పీతల్ను బలిపీఠమ్ ఇన రాహితె పీతాల్ను జల్లెడి, ఇను డొవ్వతె లాక్డా, ఇను హాఃమాన్‌ మొత్తం, మోటు హండ్కు ఇను పీటా, 40 బల్డొను పడ్దొ ఇను స్తంభాల్నా ఇన దిమ్మల్నా బల్డో ధర్వాజు తెరనా ఇను ఢోరియే ఇను మేకే ప్రత్యక్చమ్ను ఢేరమా మందిర్ సేవనటేకె రాఛ్చు హాఃరు, పరిషుద్ధ జొగొమా, 41 పవిత్ర జొగొమా సేవ కరతె యాజకుడ్ హుయుతె అహరోనునా, ఇను ఛియ్యావ్నా యాజక పరిచర్య పవిత్ర లుంగ్డా తయార్ కరీన్ యోఅక్కూ మోషేకన లీలిన్ ఆయు. 42 యెహోవా మోషేన ఆజ్ఞాపించొతిమ్ ఇష్రాయేలీయుల్ అద్మియే కామ్ అక్కూ పూర్తికర్యా. 43 ఇవ్నె కర్యుతె కామ్ అక్కూ మోషే ఏన్ కరీన్‌ దేఖ్యొ. యెహోవా ఆజ్ఞాపించొతిమ్మస్‌ ఇవ్నే ఆ కామ్ భర్తి కర్యా. అనటేకె మోషే ఇవ్నా ఆసీష్ దిదొ.