1 యెహోవా మోషేతి అంబోల్యొ. "హాదేక్ తున ఐగుప్తురాజొ దేవ్‌నితరా ఉబ్బారిరాఖ్యొ. తారొ భై అహరోన్ తారు వాతె బోలవాలొ ప్రవక్తతరా ర్హాషె. 2 మే తున బోల్యొతె హాఃరు థూ వాత్ బోల్ను. ఇష్రాయేల్ అద్మియేతి ఇను దేహ్ఃమతూ జావ్వదేనుకరి భై అహరోన్ రాజోతి బోల్సె. 3 హుయుతొ మే రాజొ దిల్న గట్టిన్ కర్సె. యో దేహ్ః కెత్రుకి అద్భుత్, హాఃనద్ క్రియల్ కరాయిస్. 4 తెదెబి రాజొ తుమారు వాత్ నా హాఃమ్జుతొ. అనటేకె మారు హాత్ ఐగుప్తు ఫర్ మ్హేందిన్ మోటొ న్యావ్ కామ్న మారు గళ్లొ కతొ ఇష్రాయేల్ హుయితె మారు అద్మియేనా ఐగుప్తు దేహ్ఃమతూ బాదర్ బులాయిస్. 5 మే ఐగుప్తుఫర్ మారు హాత్ పాడిన్ ఇవ్నమతూ ఇష్రాయేల్ అద్మియేన బాదర్ బులాయిన్ తెదె మేస్ యెహోవా కరి ఐగుప్తీయుల్నా మాలం కర్లిషె." 6 మోషేనా అహరోన్నా యెహోవా ఇవ్నా ఆజ్ఞ దిదోతిమ్‌ ఇమ్మస్ కర్యా. 7 ఇవ్నె రాజోతి వాత్ బోల్యొతెదె మోషే ఉంబర్ ఛారీహ్ః వరహ్ః, అహరోన్ను ఉంబర్ తీనుప్పర్ ఛారీహ్ః వరహ్ః.

8 యెహోవా మోషే అహరోన్‌తి అంబోల్యొ. 9 "తుమారు దేవ్ హుయుతె తాహఃత్ మాలంకరవనా కేహుబి ఏక్ అద్భుత్ దెఖ్కాడ్ కరి తుమ్నా పుఛ్చాయుతె థూ అహరోన్నా తారు హాత్ను లాక్డి దీన్ ఇన రాజోన హాఃమె నాక్ కరి బోల్. యో హాఃప్ తరా హుయిజాసె." 10 మోషే, అహరోనుల్ రాజొకన జైయిన్. యెహోవా ఇవ్న ఆజ్ఞదిదొ అహరోన్ రాజొన హాఃమె ఇను అధికారిను హాఃమె ఇను లాక్డిన నాక్యొతెదె యో హాఃప్ తరా హుయు. 11 తెదె రాజొ ఇను దేహ్ఃమతూ జ్ఞానుల్న, జాదువాలన బులాయి మంగాయో. ఐగుప్తు దేహ్ఃను జాదువాలనబి ఇవ్ను జాదును తాహాఃత్తి ఇమ్మస్ కర్యా. 12 ఇవ్నెతి హర్యేక్ జాదువాలన ఇవ్ను లాక్డియే నాక్యాతెదే యో హాఃప్‌తరా హుయు పన్కి అహరోన్ నాక్యుతె లాక్డి ఇవ్ను లాక్డియేనా గాలీల్దు. 13 హుయితో యెహోవా బోల్యొతిం రాజోనా దిల్ గాట్ హుయిగు, యో ఇవ్ను వాత్ బగల్ మ్హేందిదో.

14 బాద్మా యెహోవా మోషేతి అంబోల్యొ. "రాజోను దిల్ గట్ హుయిగు. యో ఆ అద్మియేన బోలిమొక్లాన ఒప్సెకొయిని. 15 వ్యాణెను వహఃత్‌ రాజొ నైలునధి కనారీన జాషె. తెదె థూ నధి హాఃమె ఉబ్రిన్ హాఃప్ హుయుత్ లాక్డినా ధర్లిన్ రాజొనా హాఃమె జా. 16 ఇన దేఖిన్, ‘ఝాడిమా మన సేవకరన అద్మియేనా జావ్వదాకరి’ ఆజ్ఞాపించనాబి హెబ్రీయుల్ను దేవ్ హుయోతె యెహోవా మన తారకన మొక్ల్యొ. తూ హంకెతోడి వాత్ హఃమ్జో కొయిని. 17 తెదె యెహోవా బోలుకురాతె ఆజ్ఞ సాత్కతో, హాదేక్ మారు హాత్మ ఛాతె ఆ లాక్డితీ మే కనారీను ఛాతె పాణిన మారిస్. ఆ పాణి హాఃరు ల్హోహితరా బదిలిజాషె. 18 నధిమా ఛాతె మాస్లా హాఃరు మర్జాసే. నధి గాలిజ్ వాహ్ః మార్సే. ఐగుప్తీయుల్ యో పాణి పీషెకొయిని" కరి బోల్యొ. 19 యెహోవా మోషేతి "థూ అహరోనుతి అంబోల్యొ. తూ తారు లాక్డి ధర్లిన్ ఐగుప్తును పాణి ఫర్ కతొ, ఇవ్ను నధియేనుఫర్, కాలువల్ ఫర్, గుంట ఫర్, పాణి గుంట హాఃరు ఫర్ తారు హాత్ పాడ్జొ; యో పాణి హాఃరు ల్హోయితరా హుయిజాషె; ఐగుప్తు దేహ్ః అక్కు లాక్డును తొట్టిమా, ఫత్రాను గిన్నెయేమాబి హాఃరు ల్హోయితరా హుయిగు." 20 యెహోవా ఆజ్ఞాదిదోతిం మోషే అహరోనుల్ కర్యా. రాజో, ఇను కామ్ కరవాళు దేక్తురావమా అహరోను ఇను లాక్డి ఫర్ పడిన్ నధిను పాణినా మర్యోతెదే నధి పాణిహాఃరు ల్హోయితరా హుయిగు. 21 నధిమా మాస్లా హాఃరు మర్యుగు, నదిమతూ గలీజ్ వాహ్ః మార్యు. ఐగుప్తుయుల్ను నది పాణి పియ్యాన హుయుకోయిని. ఐగుప్తు దేహ్ః అక్కు ల్హోయితరా హుయుగు. 22 హుయుతొ ఐగుప్తు జాదువాలబి ఇంమాస్ కర్యా. యెహోవా బోల్యొతిమ్‌ రాజొ అజు ఇను దిల్నా గట్ కర్లిన్ మోషే అహరోన్నా వాత్ హాఃమ్జోకొయిని. 23 హుయుతె ఇన పట్టించోకొయిని రాజొ ఇను ఖొట్టొడమా ఫరిన్ ఛాలిగో. 24 హుయుతో ఐగుప్తీయుల్ హాఃరు నదిను పాణి పియ్యాన హుయుకొయిని. అష్యల్ పాణినటేకె నధిను కనారినా ఖాడనా కోంద్యా. 25 యెహోవా నైలు నధినా మార్యొతె బాద్మా హాఃత్ ధన్ హుయు.