Êxodo 23

న్యాయ నింబంధల్

1 ఛాహడ్ను వాతే బోల్ను. అన్యాయమ్ను సాబుత్నా బోలనా హాఃరబ్ వాలతి వాత్ నామలావ్ను. 2 హాఃరబ్ను కామ్ కరతే గళ్లొతి మాలిన్ నార్హాను. న్యాయాన్నా బద్లావతే గళ్లొతి మాలిన్ న్యాయమ్ హాఃబర్మా జోట్టిను సాబుత్ నాబోల్ను. 3 ఏక్ గారిబ్ గోర్ న్యాయమ్నటేకె లాఢాయ్ కరుకురతే ఇను బణే పక్చపాతంతరా నార్హాను. 4 తారు వైరి హుయుతె ధాంఢో హో, ఘదేడో హో చుఖ్కాయుగుతొ యో తున దేఖాయుతో థూ ఖచ్చితంతి ఇన లీలిన్ అయిన్ ఇనా దేను. 5 తారు వైరిను ఘదేడొ భోజోతి హేట్ పఢీన్ ర్హావను థూ దేఖ్యొతొ ఇను బగల్తు నాజవ్వతిమ్ జల్దిజైయిన్ ఇనేతి మలీన్ యో ఘదేడోన ఛొడాన్ను. 6 దరిద్రుడ్నా న్యాయమ్ కరను హాఃబర్మా అన్యాయంనా న్యావ్ నాకర్ను 7 చ్హాడ్‌న దూర్ ర్హాను. నీతివాలొను, గలత్ కొయింతె వాలన నామార్ను. మే పాపేలన నీతివాలో తార దేఖ్యోకొయిని. 8 లంచం లేవొ నొకొ. దేఖావతే ఇనా లంచం కాణుతరా కర్సే. నీతిమంతుల్ వాతెన ఖర్రాబ్ తార ర్హాయిజాసె. 9 అలాదు దేహ్ఃవాలన ఇబ్బందల్ నాకర్ను. తుమె ఐగుప్తు దేహ్ఃమా అలాదు దేహ్ఃతరా ర్హాయకొయిన్నా. ఇవ్ను దిల్ కింరాస్కి తుమ్నా మాలమ్.

హాఃత్మను ధన్నె అజు హాఃత్మను వరహ్ః బారెమా నియమాల్

10 ఛో వరహ్ః తారు జమీన్ దున్నిన్ ఇను ఖేతార్ వాడి కర్లేను. 11 హాఃత్మాను వరహ్ః ఇన కాళితార ర్హాక్ను. తెదె తారు అద్మియేమ గరీబ్ ఖావను బాద్మా బచ్ఛుయుతె ఝాడిను జిన్వార్ ఖావజై. తారు ద్రాక్చనుతోట్ హాఃబర్మా తారు ఒలీవతోట్మా హాఃబర్మ ఇమ్మాస్ కర్ను. 12 ఛో ధన్నే తారు కామ్ కరీన్ తారు ధాంఢా, ఘదేడా, కామ్ కరవాలిను ఛియ్యా, అలాదు దేహ్ః ఆరామ్ లేవ్వతిమ్ హాఃత్మాను చుక్కె ర్హాను. 13 మే తుమరేతి బోల్యోతె హాఃరు జాత్నాతి ఛాల్ను. అలాదు దేవ్ను నామ్ నాబోల్ను. యో తారు బాకమాతు నాఅవ్వదేను.

తీన్ మహాన్ పండగా

14 వరహ్ఃనా తీన్ ఛోట్ మన పండుగా కర్ను. 15 పులవాతే రాచ్ఛు కొయినితె రొటాన పండుగానా ఆచారించ్ను, మారు సన్నిధినా ఖాళి వాత్తి నాదేఖ్వును. 16 థూ ఖేతార్ పీకాయుతె పైలు ఫల్ వాడను వహఃత్మా పండగా ఆచారించును. వరహ్ః ఆఖరిమా ఖేతార్మాతు తారు ఖేతార్ వాడి ఫల్ హాఃరు కుపో కరిన్ అద్మియే హాఃరు మాలిన్ పండగా ఆచరించ్ను. 17 వరహ్ఃనా తీన్ ఛోట్ మర్ధమనా హాఃర ప్రభుహయుతె యెహోవా సన్నిధిన దేఖావ్ను. 18 మారు బలుల్ ల్హోయినా పుల్యుతె రాచ్ఛు నాఅర్పించును. మారు పండుగామా అర్పించుతె బీసా వాన్యేథోడి నారాక్ను. 19 తారు జమిన్మా పీకాయుతె ఆగాఢిను ఫల్ దేవ్ హుయుతె యెహొవా మందిర్నా లావ్ను. బోక్డిను చెల్కాన ఇను ఆయాను దూత్తి నాఉక్లావ్ను.

ఓట్టుయ్ అజు హాఃనద్

20 హాదేక్ వాట్మా తున బచ్చాడ్యుతె మే సిద్ధపర్చోతె జోగోన తూన బులాయిన్ ఏక్ దూతన తున ఆగాఢి బొలిమొక్లిస్. 21 ఇను సన్నిధిన జాతన్తి ర్హాయిన్ వాత్ హాఃజ్ను. ఇను ఖీజ్ ఛాడవ్వనోకో. తుమారు ఇనా వ్యతిరేకంతి ఛాల్యాతో యో మాప్ కర్సేకొయిని. సానకాతో ఇనా మారు నామ్ మ్హేంద్యొ. 22 హుయితో థూ ఇను వాత్నా హాఃమ్జిన్ మే బోల్యతె హాఃరు కర్యోతొ మే తారు వైరినా వైరి, తారు విరోధుల్నా విరోధిహుయిన్ ర్హాయిస్. 23 కింకతో మారు దూత తూన ఆగాఢి జాసే, అమోరీయుల్నా, హిత్తీయుల్నా, పెరిజ్జీయుల్నా, కనానీయుల్నా, హివ్వీయుల్నా, యెబూసీయుల్నా ఇవ్నే ఛాతె దేహ్ఃనా తున బులాయిలాయిస్. మే ఇవ్నా ఖాతం కరిస్. 24 ఇవ్ను దేవతాల్ హాఃలమ్ నాకర్ను. ఇన నా పూజించును. ఇవ్ను కామ్ జోఢ్ను కామ్ కరకొయినితిమ్ ఇవ్నా ఖచ్ఛితంతి నాష్ కరిన్, ఇవ్ను బొమ్మలనా ఫోడినాక్ను. 25 తారొ దేవ్ హుయుతె యెహోవాస్ ఆరాధించును, తెదె ఇనె తారు ఖాణునా తారు పాణినా ఆసీష్ కర్సె. మే తుమారు ఇచ్మతూ రోగ్న కన్నాఖిదీష్‌, 26 తుమారు దేహ్ఃమా గర్భస్రావాల్ ర్హాషెకొయిని. లఢ్కకొయినితిం ఇవ్నె తుమారు దేహ్ఃమా ర్హాషెకొయిని. తుమె జీవ్సెతె ధన్నె హాఃరు ఖతం కర్సు. 27 మన బట్టి అద్మియే తున ఢరతిమ్ కరిస్. థూ జైయితె హాఃరు దేహ్ఃవాలన హారాయిన్ తారు హాఃరు వైరియేన తారు హాఃమేతు మీలయిలేనుతిమ్ కరిస్. 28 అజు, మోటు కందిరీగల్నా తున అగాఢి బోలిమొక్లిస్, యో తారు హాఃమేతు హివ్వియుల్నా, కనానీయుల్నా, హిత్తీయుల్నా రెప్టినాదిస్. 29 దేహ్ః హఃరబ్ హుయిన్ జాన్వారే భాడ్డిన్ తుమ్నా వైరితరా హుసే. హుయితొ ఇనా ఎక్కస్ వరహ్ఃమా ఇవ్నా రేప్టినాదిస్. 30 థూ భడ్డిన్ యో దేహ్ఃన స్వాధీనం కర్లావతోడి ఇవ్నా థోత్తొడు తుమారు హాఃమేతు రేప్టినాదిస్. 31 అజు లాల్ ధర్యావ్ మాతు ఫిలిష్తీయుల్ ధర్యావ్ తోడి, ఆఖర్ బల్డో మాతు నధితోడి తారు పొతిమేరల్నా తయార్ కరిస్, యో దేహ్ఃమా ఛాతె ఇవ్నా తారు హాత్మా దిస్. థూ తారు హాఃమేతు ఇవ్నా రేప్టిదిస్. 32 థూ ఇవ్నేతిబి, ఇవ్ను దేవతల్తిబి నిబంధన నాకర్ను. 33 థూ ఇవ్ను దేవతల్న సేవించొతో యో తున ఉరిహుషె, అనటేకె ఇవ్నె తారేతి మన విరోధంతి పాప్ కరకొయినితిమ్ ఇవ్వె తారు దేహ్ఃమా నార్హాను.