Isaías 28

యెరూషలేంనా, ఎఫ్రాయీమునా గుర్కావను

1 ఎఫ్రాయీముమా ఛాతె పీయ్యావాళన హాంకార్ను కారణంతీ ఛాతె కీరీటంవాలనా మిన్హత్‌. హుఃకాంకరతె పూల్నజోక్ను ఇవ్ను రంగ్న భూషణనా మిన్హత్. ఆ అంగూర్ను రహ్క్ బారెమా చలీగయూతె ఇవ్నె జింకరతె హర్యును లోయ మాతఫర్ ఛాతె కీరీటం. 2 హంమ్జో! షక్తిషాలి, బల్షలీ హుయుతె ఏక్జణు ప్రభూకన ఛా. యో బరప్ను గడ్డనితరా ర్హావళు. యో వినాష్కారవాళొ. తూఫన్నో జోడ్నొ. ఘణుమోటు వాయ్రోపాణి జోడ్నొ. ఇన హాతేహుః జమీన్నమార్షె. 3 ఎఫ్రాయీమ్మ ఛాతె హంకార్న కారణ్ హుయుతె కీరిటంన హేట్ కుంద్లినాక్షె. 4 హార్యు లోయను మాతఫర్ ఛాతె హుఃకాయిన్ జంకరతె పూల్ తరా ఇను అందంన వాడను ధన్ ఆవకొయింతె ఫైహ్లూ అంజూర్ను ఝాడను పండనితర ర్హాషె. అగాఢి కోణ్ దేఖిన్ యో ఇన తోడిన్ గళీలిషె. 5 త్యో ధన్నె దదాజీ యెహోవా బఛ్చుగయుతె ఇన అద్మియేనా హాఃరనటేకె అందంహుయుతె కీరిటంనితరా, అందంను రాజను ఫగ్డిహుయి ర్హాషె. 6 యో న్యావ్ బోలనటేకె న్యావ్ను పీటంఫర్ బేషిరోతె ఇన న్యావ్‍ బోలతె ఆత్మనితర, ఇను ధర్వాజకన వైరియేనా రప్టతే ఇనింతరా కువ్వత్‌ వాళనితరా ర్హాషె. 7 అజూబి పాణిన పీన్బి ద్రాక్చనూ రహ్ః పీయ్యనితర దొల్షె. దారున పీన్ లఢాయే కర్షె. యాజకుడ్ హుయోతోబి, ప్రవక్త హుయోతోబి దారుపీన్ దొల్షె. ద్రాక్చను ర్హహ్ః ఇవ్నహారౌన వషం కరి లీషె. దారుపీన్ పడ్తూ ఉడ్తూరషే. హోఃణె ఆయుతో టుముక్తూ ర్హాషె. న్యావ్ బోలానాయుతో వాతె తొత్లావ్షె. 8 ఇవ్నె ఖాణుకయితె బల్లహారఫర్ వోక్రినాక్యు. అచ్చిజగా ఎజ్గ కోదేకావ్షేని. 9 యో బుద్దీన కీనా బోధనకర్షే? సమాచార్నా కీన హాంమ్జావ్షె? దూద్ పియ్యావాళన? నైహితో ఆయాను దూద్ మేళిదేవాళన? 10 షానకతో "ఆజ్ఞన పీటె ఆజ్ఞ, ఆజ్ఞనా పీటె ఆజ్ఞ, సూత్రంనా పీటె సూత్రంతరా, అజ్గ థోడుషు, అజ్గ థోడుషునితరా ర్హాషె." కరి ఇవ్నె సోచిలీషె. 11 తెదె ఇనె హఃఛ్చిస్ ఇవ్నెతీ ఛింగావతే హోట్తీ, బాగల్ను దేహ్ః వాతెతీ వాత్ కర్షె. 12 అగాఢీస్ ఇవ్నెతి "ఆ ఆరామ్ను ధన్. హాఃతిగయుతే ఇవ్న ఆరమ్ కరదేవొ" కరిబోల్యొ. 13 ఆజ్ఞన పీటే ఆజ్ఞ, ఆజ్ఞన పీటే ఆజ్ఞ, సూత్రంన పీటే సూత్రం, అజు సూత్రంన పీటే సూత్రం, అజ్గ దారాషూ, ఎజ్గ దారాషూ.

సీయోన్నా మూలను బండొ

14 ఇనటేకె ఘేళి కాడతెవాళు, యెరూషలేంమా ఛాతె ఆ ఆద్మియేనా పాలించవాళు, యెహోవాని వాతేన హాఃమ్జో. 15 తుమె అమ్‌ బోల్య. హామే హాఃరు మరణ్తి నిబంధన కరిరాక్యాస్. నరకంతీ ఏక్ ఒప్పందం లీరాక్యస్. అనటెకె కీడ్ నాహుఃకరతె ఇమ్ ఆయుతోబి హామ్న చీమ్నారుకొయిని. షానకతో హామె ఝూటిన కన్నేకరిరాక్యాస్. మిథ్యను పీటె లపీరాస్. 16 అనా దాదజీ యెహోవా ఆం బోలుకరస్. "దేకో, మే సీయోన్మ ఏక్ పునాదినొ బండో గడిస్. యో బండో పరిషలించను. ఏక్ అచ్చో బండన నాకిస్. యొ ఘణుగట్ బండో. విస్వాస్ రాకవాళు కేదేబి షరం కోకాషేని. 17 మే న్యాయంన మోజను దబ్బనిగోణి, నీతిన ఒడంబడినిగోణి కరిస్. బరఫ్నుగడ్డ తుమారి ఝూటిను నుచ్చినాక్షె. తుమె లపిరాయతె జొగొనాబి పాణిను తుఫాన్ హొవాఢి లీషె. 18 మరణ్‌తీ తుమె కర్యురాక్యుతె నిబంధననా ఉబ్బారి నాఖిస్. నరకంతి కర్యుతె ఒప్పంధం చెల్నారు కొయిని. తుమారఫర్ తుఫాన్ పాణి ఆయుతొ తుమె తర్పడీన్‌ హుషు. 19 యో హాఃరు ఆయుతెదె తుమ్న డుబాయ్ నాక్షె. హరేక్ ధన్నె, హారేక్ రాతె యో ఆవ్షె. ఆ వార్తె తుమ్న అర్ధంహుయుతో ఘణు మోటుఢర్ లాగ్షె. 20 గోడలంబకరి హూవన మంచోబి బరాబ్బర్ కోహుషెని. వోడిలావన బూనిషబి బరాబ్బర్ కోహుషేని. 21 యెహోవా ఇను కామ్న కరావనాటేకె, ఆష్చర్యంను హుయుతె ఇను కామ్‌ కరనటేకె, మోటుకామ్ కరనవహాఃజే యో పెరాజీము పర్వత్‌ ఫర్తూ ఉట్యొతిమ్‌ ఉట్షె. గిబియోను లోయమతూ రెచ్చగొట్యొతిమ్‌ ఉట్షె. 22 ఇనటేకె పరిహాస్న నొకొకరొ. నహితొ తుమారి హంక్లి ఘణుగట్ హుషె. సైన్యంనా ప్రభువుహుయోతె యెహోవా కంతూ జమీన్ ఫర్ నాషనం హువాను వార్తే హఃమ్జో. 23 అనస్టేకె దిల్ రాఖిన్ మే బోలుతె హాఃమ్జో. అఛ్చితర మారి వాతేన హాఃమ్జో. 24 రైతు బింజోళనాఖన కెదేబి ఖేతర్న దున్నుతూస్ ర్హాషెనా? కెదేబి ఖేతర్మ మాటిన పోడ్తుస్ ర్హాషెనా? 25 యో జమీన్నా అఛ్చితరా అష్యల్ కరిన్ ఇనుబాంద్మ సోపుబింజోళన కోనాక్చెనా? జీరునా కోచిడక్షేనా? ఘౌను ఖేథర్మా , కట్టొను షేడె మర్చేన ఝాడ కోనాక్షేన? 26 ఇను దేవ్వాస్ ఇన షికాడ్యొ. ఖింకర్ను ఇన బుద్దిహుః షికాడొ. 27 జీరున మిషీన్మా నాఖిన్ కోదలౌషే కోయిని. జీరుఫర్ బండిను చక్కర్తి కోఫరావని. ఇనటేకె సోపున చువ్వతి, జీరున లాక్డతి జటాక్షేకొయిన్నా. 28 అద్మిహాఃరు రోటనటేకె ఘౌన హోఃతిన్ ఆటో బణావస్. ఇంమస్ కరి బోలీన్ ఘౌన ఆటోస్ కర్తూ కోకర్తూరైని! ఘౌన జట్కన ఘోడని బండిను చకర్నా చలావస్ పన్కి ఇన ఆటోకాడన కామెకోవాని కొయిన్నా! 29 అనబి అద్మియేనా షెననో ప్రభుహుయోతె యెహోవా షికాడు కరస్. ఇను బోధ అద్బూతంనితరా, ఇను హూఃజ్‌ స్రేష్టంతరా ర్హాషె."