ಇಬ್ರಿಯ 12

ದೇವ್ ಅಪ್ಣೊ ಬಾ

1 ಆ ಕಾರಣ್‍ಥಿ ಅತ್ರು ಸಾಕ್ಷಿಯೆವ್ನು ಮೋಟು ಝೂ಼ಂಡ್‌ ವಾದ್‌ಳಾನಿ ಘೋಣಿ ಅಪ್ಣ ಅಶ್‌ಪಿಶ್ ಕೋಂಡಿರಾಖಪರ್ ಅಪ್ಣುನ ಅಟ್‌ಖಟ್ ಕರಾಸ್ತೆ ಅಖ್ಖಾಸ್ ಭೋಜ಼್‌ನಾಬಿ, ಶುಲ್ಬಾಥಿ ವಿಲ್‌ಟೈಜಾ಼ವಾನು ಪಾಪ್ ಜಿನು ಕಾಡಿನಾಖಿ, ವಿಶ್ವಾಸ್ ಪೈದಕರಾವಳೊಬಿ, ಇನ ಪೂರ ಕರಾವಳೊಬಿ ಹುಯಿರ‍್ಹೋತೆ ಯೇಸುಪರ್ ನಜ಼ರ್ ರಾಖಿನ್ ಅಪ್ಣುನ ನೇಮಕ್ ಹುಯಿರ‍್ಹುತೆ ದವಡ್ನ ಖ್ಹಮಾಳಿ ಮಿಲೈಯೇ಼. 2 ಯೇಸು ಇನಖ್ಹಾಮ್ಣೆ ಮ್ಹೇಲಿರಾಖ್ಯೊತೆ ಖ್ಹುಶಿನಖ್ಹಾಜೆ ಖ್ಹರಮ್‌ನಾಬಿ ಖ್ಹಾಯ್‌ ಕರ‍್ಯೊಕೊಂತೆ ಶಿಲ್‌ಬೇನಿ ಮರಣ್ಣ ಖ್ಹಮಾಳಿನ್, ದೇವ್ನು ಸಿಂಹಾಸನ್ನ ಖಾವಿಬಾಜು಼ಮ ಬೆಠೋಸ್. 3 ತುಮೆ ದಿಲ್‌ಹೇಟು ನಾ ಕರಾವಾಳ ಹುಯಿನ್ ಬೇಜಾರ್ ನಾಖಾವ್ಣುತೆ ಯೇಸುನಿ ಬಾರೇಮ ಸೋಚಿದೇಖೊ. ಯೊ ಪಾಪಿಯೇವ್ ಖ್ಹಾರಾಥಿ ಕೆತ್ರೇಕ್ಕಿ ವಿರೋದ್ನ ಖ್ಹಮಾಳಿಲಿದೊ. 4 ತುಮೆ ಪಾಪ್ನ ವಿರೋದ್ನ ಲಡಾಮ ಲ್ಹೋಯಿನ ರಂಚಾ಼ಯೆತ್ರೆ ಲಡ್ಯಾಕೊಯ್ನಿನಿ. 5 ಲಡ್ಕಾವ್‍ನ ಬೋಲಾನಿತರ ತುಮುನ ಬೋಲಿನ್ ಹುಮ್ಮಖ್ಹ್‌ನಿ ವಾತೆವ್‌ನ ಭೈಕಿಗಯಕಿಶು? ಯೊ ಶಾತ್‌ಕತೊ ಮಾರ ಛಿಯ್ಯಾ ಪ್ರಭುನಿ ನಿಶತ್ ಝಿಟ್ಕಾರ್‌ ನಕೊ. ಯೊ ತುನ ಗುರ್‌ಕಾವನಿ ವಖ್ಹ್‌ತೆ ಬೇಜಾರ್ ನಕೊಕರ್. 6 ಶನಕತೊ ಪ್ರಭು ಕಿನಕಿನ ಪ್ಯಾರ್ ಕರಾಸ್ಕಿ ಇವ್ಣುನ ನಿಶತ್‌ ದೇಸ್. ಇನೊ ಛಿಯ್ಯಾನಿಘೋಣಿ ಸ್ವೀಕಾರ್ ಕರಸ್ತೆ ಹರೇಕ್‌ನಾಬಿ ದಾಬುಕ್ ದೇಸ್‌ಕರಿ ಛಾ಼.✝12:6 ಜ್ಞಾನೋಕ್ತಿ 3:11-12 7 ತುಮೆ ಅಛ್ಛಿನಿತರ ರ‍್ಹವಾನ ಖ್ಹಾಜೆಸ್ ನಿಶತ್ನ ಖ್ಹಮಾಳಿ ರ‍್ಹವೊ. ದೇವ್ ತುಮುನ ಲಡ್ಕಾಕರಿ ಚ಼ಲಾವಸ್. ಶನಕತೊ ಬಾಥಿ ಮಾರ್ ಕೊಖಾಯ್ನಿತೆ ಛಿಯ್ಯೊ ಕಿಜ್ಜಾ಼ ಛಾ಼? 8 ಅಖ್ಖಾಸ್‌ಜ಼ಣನ ಹೋಣುತೆ ನಿಶತ್‌ಮ ಭಾಗ್‌ಲ್ಯವಾಳ ನಾಹುಯುತೊ ತುಮೆ ವ್ಯಬಿಚಾರ್‌ಥಿ ಪೈದಾಹುಯ ಪಣ್ಕಿ ಇನ ಲಡ್ಕಕಾಹೆ. 9 ಆಸ್ ಕಾಹೆತೆ ಅಪ್ಣುನ ದಾಬುಕ್ ದಿದಾತೆ ಲೋಕಾನ ಆಯಬಾನ ಅಪ್ಣೆ ಮರ್ಯಾದಿ ದಿಯೇಸ್ನಿ. ಇಮ್ಮಸ್ ಅಪ್ಣ ಆತ್ಮವ್‌ನ ಬಾ ಹುಯಿರ‍್ಹವಾಳನ ಅಪ್ಣೆ ಬಿಜೂ಼ಬಿ ಜಾ಼ಖ್ಹತ್ ಅಧೀನ್‌ಹುಯಿನ್ ಬಚಿನಾರ‍್ಹೇವ್ಣು ಕಿಶು? 10 ಅಪ್ಣ ಲೋಕಾನು ಬಾಯಿವ್ಣೆ ಇವ್ಣ ದಿಲ್ಮ ಬರಬರ್ ದೆಖಾವಸ್ತೆ ಇಮ್‌ ಥೋಡ ದನ್ ಅಪ್ಣುನ ದಾಬುಕ್ ದಿದು. ಕತೋಬಿ ದೇವ್ನೆ ಇನಿ ಪರಿಶುದ್‌ಮ ಅಪ್ಣೆ ಭಾಗ್‌ವಾಳ ಹುಯಿರ‍್ಹೇವ್ಣುಕರಿ ಅಪ್ಣ ಅಛ್ಛಾ಼ನ ಖ್ಹಾಜೆಸ್ ದಾಬುಕ್ ದೇಸ್. 11 ಖಿವು ನಿಶತ್‌ಬಿ ಯೊ ವಖ್ಹತ್‌ಮ ಖ್ಹುಶಿಥಿ ದೆಖಾವಕೊಂತೆ ದುಖ್‌ನಿಘೋಣಿಸ್ ದೆಖಾವಸ್. ಕತೋಬಿ ಅಛ್ಛಿನಿತರ ರ‍್ಹವಾನ ರುಡಿರಾಖವಳು, ಖ್ಹಾಮ್ಣೆ ಸಮಾಧಾನ್ ರ‍್ಹವಾನು ನ್ಯಾಯನು ಫಲ್ನ ಲೇಸ್.

ಝೇತಾವ್ಣಿ ಅಜು಼ ಖ್ಹೂಜ಼್

12 ಇನಖ್ಹಾಜೆ ಝೂ಼ಟ ಪಡಿಜಾ಼ವನ ಹಾತ್ನ ಕಾಪಾಸ್ತೆ ಗುಡ್‌ಘ್ಯವ್‌ನ ತಾಖತ್ ಕರ್ಲೆವೊ. 13 ತುಮೆ ಚಾ಼ಲಾನಿ ವಾಟ್ನ ಖ್ಹತ್ತಡ್‍ ಕರಿಲೆವೊ. ತದೆ ಲಂಗ್ಡಾವ್ನೊ ಗೋಡೊ ಮಚ಼ಕ್ಷೆಕೊಂತೆ ಅಛ್ಛುಉಷೆ. 14 ಅಖ್ಖಾನಿ ಜೋ಼ಡ್ಮ ಸಮಾಧಾನ್‌ಥೀಬಿ ಜಿವ್ಣುಕರಾನ ಅಜು಼ ಸಮಾಧಾನ್‌ಥಿ ರ‍್ಹವಾನ ಕೋಶಿಶ್ ಕರೊ. ಪರಿಶುದ್ಧಕೊಂತೆ ಕೋಣ್‌ಬಿ ಪ್ರಭುನ ದೇಖಾನ ಕೊಹೊಯ್ನಿ. 15 ತುಮಾರಮ ಕೋಣ್‌ಬಿ ದೇವ್ನಿ ವಾರ್‌ಖ್ಹೇಥಿ ಛು಼ಕಿನ್ ನಾಜಾ಼ವ್ಣುತೇಬಿ, ಖಿವು ಕಡಿಹುಯಿರೀತೆ ಜ಼ಡ್‌ ಕುಡಿಪಾಡಿನ್ ಅಸಮಧಾನ್‌ ಕರೀನ್ ಕೈಏಕ್ ಜ಼ಣಾನ ಮೈಲು ನಾಕರ‍್ನುತೆ ದೇಖಿಲೆವೊ. 16 ಖಿವು ಪಾಪೇಲು ರ‍್ಹವೊ, ಕೋಣ್‌ಬಿ ಏಸಾವನಿತರಾನೊ ಲೋಕ್‍ವಾಳನಿತರ ರ‍್ಹವೊ ಧರಮ್‌ಮೀರಿನ್ ಚಾ಼ಲವಾಳು ತುಮಾರಮ ನಾರ‍್ಹೇವ್ಣುತೆ ಜ಼ತನ್‌ಥಿ ರ‍್ಹವೊ. ಯೊ ಏಸಾವನೆ ಏಕ್‌ ವಖ್ಹತ್‌ನ ಖಾಣಾನಖ್ಹಾಜೆ ಇನಿ ಪೈಲ್ಹೊಟಾನಿ ಹಕ್ನ ವೇಚಿನಾಖ್ಯೊ. 17 ಯೊ ಹುವಾದಿನ್ ಇನಿ ಬಾನಿ ಆಶೀರ್ವಾದ್‌ ಲೇವ್ಣುಕರಿ ಡೋಳಾನು ಆಂಝು಼ ನಾಕ್ತೊಹುಯಿನ್ ಬಿಂತಿಕರ‍್ಯೊತೊಬಿ, ಇನೆ ಕರ‍್ಯೊತೆ ಇನ ಬದ್ಲಾವನ ಇನ ಕೊಹುಯುನಿ. 18 ತುಮೆ ಇಸ್ರಾಯೇಲ್‌ವಾಳನಿತರ ಆಯಾತೆ ತಿಮ್ ಹಿಜ್ಜಾ಼ ಆಗ್ ಲಾಗುಕರ್ತುಥು. ವಾದ್‍ಳಾನ ಮಬ್‌ಥಿ ಅಂಧಾರಥಿಬಿ ಮಹಿಚೂ಼ಪಿ ರಾಥ್ಥಿ ಕೋಂಡೈರ‍್ಹೂಥು. ಮೂಚಿರಾಖ್ಯುಥು ಅಪಟ್‌ಝ಼ಪಟ್‌ನೊ ವಹಿರೊಛಾ಼ತೆ ಪಹಾಡ್‌ಕನ ಆಯುಕೊಯ್ನಿ. 19 ತುತ್ತೂರಿನು ಅವಾಜ಼್ ವಾತೆನಿ ಅವಾಜ಼್‌ಕನ ಕರಿ ಕಾಹೆ ಆಯಿರ‍್ಹಾತೆ. ಯೋ ಅವಾಜ಼್ ಇವ್ಣಿಜೋ಼ಡ್ಮ ಬೋಲನುಸ್ ನಕೊಕರಿ ಗಿಂಗೈಲಿದು. 20 ಶನಕತೊ ಆ ಪಹಾಡ್‌ನ ಛೀಮಾವಾಳು ಕೋಣ್ಬಿರ‍್ಹವೊ ಖಿವು "ಜಾನ್ವರ್‌ಬಿ ರ‍್ಹವೊ ಇನ ಬಂಡೊ ಫೇಕಿನ್ ಮಾರಿನಾಕ್ಣು" ಕರಿ ನಿಯಮ್ನ ಇವ್ಣೆ ಖ್ಹಮಾಳ್ಯು ಕೊಯ್ನಿ. 21 ಅತ್ರೇಸ್ ಕಾಹೆತೆ ಅನ ದೇಖಾನು ಜಾ಼ಖ್ಹತ್ ಭಯಂಕರ್‌ಥೂತೆ ಖ್ಹಾಜೆ ಮೋಶೇನೆ ಮೇ ಡರಿನ್ ಕಾಪುಕರೂಸ್ ಕರಿ ಬೋಲ್ಯೊ. 22 ಕತೋಬಿ ತುಮೆ ಚೀಯೋನ್ ಪರ್ಭತ್‌ಕನ ಅಜು಼ ಜಿವ್ತಜಾನ್ನ ದೇವ್ನ ನಂಗರ್ ಹುಯಿರುತೆ ಸೊರ್ಗಾನ ಯೆರೂಸಲೇಮ್‌ನ, ಜ಼ತ್ರಾಮ ಭರೈರುತೆ ಲಾಖೋಲಾಕ್ ದೇವ್ನ ದೂತರ್‌ಕನಾಬಿ, 23 ಪರ್‌ಲೋಕ್‌ಮ ನಾಮ್ ಲೀಖೈರಾಖ್ಯಹುಯ ಪಹಿಲೋಟ ಲಡ್ಕಾನಿ ಸಬೇನಾಬಿ, ಅಖ್ಖಾನ ನ್ಯಾವ್‍ಣೊ ಹುಯಿರೋತೆ ದೇವ್‌ಕನಾಬಿ ಪೂರ ಹುಯಿರೋತೆ ನೀತಿವಾಳಾನ ಆತ್ಮಕನಾಬಿ ಐರ‍್ಹಾಸ್. 24 ನವ ಒಪ್ಪಂದಾನ ಇಚ಼್‌ಮ ರ‍್ಹವಾಳೊ ಯೇಸುಕನಬಿ ಹೇಬೆಲನ ಲ್ಹೋಯಿಥೀಬಿ ಮಹಾನ್ ವಾತೆ ಬೋಲಾಸ್ತೆ ಛಿಡ್‌ಕಾಯುತೆ ಲ್ಹೋಯಿಕನಾಬಿ ಐರ‍್ಹಾಸ್. 25 ವಾತೆ ಬೋಲುಕರಾತೆಯಿನ ಝಿಟ್ಕಾರ‍್ನುನಾತೆ ತಿಮ್ ದೇಖಿಲೆವೊ ಶನಕತೊ ಜ಼ಮೀನ್‌ಪರ್ ದೇವ್ನಿ ವಚನ್ ಬೋಲ್ಯಹುಯಾನ ಝಿಟ್ಕಾರವಾಳು ನಿಶತ್ನ ಛುಕಿಜಾ಼ವನ ನಾಹುಯುಕತೊ, ಸೊರ್ಗಾಥು ವಾತೆ ಬೋಲಾವಳನ ಮ್ಹೇಲಿನ್ ಅಪ್ಣೆ ದೂರ್ ಗಯಾತೊ ನಿಶಥ್ಥಿ ಕಿಮ್ ಛು಼ಕ್‍ಶು? 26 ಇನು ಅವಾಜ಼್ ತದೆ ಜ಼ಮೀನ್ನ ಹಲಾಯು. ಹಮ್ಕೆ ತೋಬಿ ಯೊ ಬಿಜು಼ ಎಕ್ಕಸ್ ಹಲ್ಲ ಮೇ ಖಲಿ ಜ಼ಮೀನ್ನ ಕಾಹೆತೆ ಆಬ್‌ಮಾಬಿ ಕಪಾಡುಸ್‌ಕರಿ ವಾಗ್ದಾನ್ ಬೋಲಿರಾಖ್ಯೊಸ್.✝12:26 ಹಗ್ಗಾಯ 2:6 27 ಬಿಜು಼ ಎಕ್ಕಸ್‍ಹಲ್ಲ ಕರಿ ಆ ವಾತ್ನ ಸೋಚ್ಯುತೊ ಬಚಾ಼ಡಾನು ಜಿನಖ್ಹ್‌ಖ್ಹಾರು ಉಬ್‌ಜೈರ‍್ಹೂಸ್ತೆ ಖ್ಹಾಜೇಥಿ ಕಡೈನಖೈಜಾಶೆಕರಿ ಬೋಲಾನು ದೆಖಾವಸ್. ತದೆ ಬಚಾ಼ಡಕೊಂತೆ ಛಾ಼ತೆ ಜಿನಖ್ಹ್‌ಖ್ಹಾರು ಘಟ್‍ಥಿ ಭೀರ‍್ಹಿಷೆ. 28 ಇನಖ್ಹಾಜೆ ಕೋಣ್ ಖ್ಹರ್ಕಾವನ ಕೊಹುವಾನಿತೆ ರಾಜ್ಯನ ಲೀಲಾವವಾಳ ಹುಯಿರ‍್ಹಾತೆ ಅಪ್ಣೆ ಧನ್ಯವಾದ್ ಕರಾವಾಳ ಹುಯಿನ್ ದೇವ್ನ ಬರಬರ‍್ನಿ ಆರಾದನೆಬಿ ಭಕ್ತಿಥೀಬಿ ಅಜು಼ ಡರ್‌ಥೀಬಿ ಕರಿಯೆ. 29 ಶನಕತೊ "ಅಪ್ಣೊ ದೇವ್ ಭುಂಜಾ಼ವತೆ ಆಗ್ ಹುಯಿರ‍್ಹೋಸ್".