1 ಯೆಹೋವನೆ ಮೋಶೆನ ಶಾತ್‌ ಬೋಲ್ಯೊಕತೊ, 2 "ಇಸ್ರಾಯೇಲ್‌ವಾಳು ಮಾರಖ್ಹಾಜೆ ಕಾಣ್ಕೆನ ಲೀನ್ ಆವ್ಣುಕರಿ ಇವ್ಣುನ ಬೋಲ್. ದಿಲ್‌ಥಿ ದ್ಯವಾಥಿಸ್ ಯೊ ಕಾಣ್ಕೆನ ಲೇವ್ಣು. 3 ತೂ ಇವ್ಣೇಥಿ ಲ್ಯವಾನು ಕಾಣ್ಕೆಖ್ಹಾರು ಖಿವುಖಿವುಕತೊ, ಖ್ಹೊನ್ನು, ರೂಪು, ಅಜು಼ ತಾಂಬು, 4 ನೀಲಿ, ರಾಯ್‌ಜಾ಼ಮಣ್ಣೊ ರಂಗ್‌, ಲಲೇಲಾಲ್ ರಂಗ್‌ನು ಧಾಗೊಖ್ಹಾರುಬಿ, ಕೋರು ಲುಂಗ್‌ಡುಬಿ, ಬೋಕ್ಡಾನು ಕೇಖ್ಹ್‌ನು ರುಯ್‌ನು ಲುಂಗ್ಡಾವ್‌ಬಿ, 5 ಹದಕರಿಹುಯು ಲಾಲ್‌ರಂಗ್ನು ಮೇಂಢಾನು ಚಾ಼ಂಬ್ಡು, ದರ‍್ಯಾವ್ನ ಜಾನ್ವರ್‌ನು ಚಾ಼ಂಬ್‌ಡುಖ್ಹಾರುಬಿ, ಬಾವಳ್ಯನು ಝಾ಼ಡ್‌ಬಿ, 6 ಚಿಮ್ನಿನ ಹೋಣುತೆ ತೇಲ್‌ಬಿ, ಅಭಿಷೇಕನ ತೇಲ್ನ ಅಜು಼ ವಾನುಢಪ್‌ಕಾರನ ಹೋಣುತೆ ಅಛ್ಛಿವಾನು ತೈಲಾಬಿ, 7 ಮಹಾಯಾಜಕ್‌ನು ಏಫೋದ್ ಅಜು಼ ಛಾ಼ತಿಪರ್ ಫೇರಾನು ಪದಕ್‌ಪರ್ ರ‍್ಹೇವ್ಣುತೆ ಗೋಮೇಧಕ ಹೀರೊಖ್ಹಾರು ಬಿಜೂ಼ ಅಲಕ್ ಅಲಕ್ ಹೀರೊಖ್ಹಾರು. 8 "ಮೇ ಇವ್ಣ ಇಚ಼್‌ಮ ಜಿವ್ಣುಕರಾನ ಮನ ಎಕ್ ಡೇರಾನ ಘರ್‌ನ ಭಾಂದ್‌ಣು. 9 ಮೇ ತುನ ವತಾಳನಿ ಪರಕ್ಮಾಸ್ ಡೇರಾನ ಘರ್‌ನಾಬಿ ಇನಾಮ ರ‍್ಹವಾನು ಅಖ್ಖುಸ್ ಖ್ಹಾಮನ್‌ಖ್ಹಾರುಬಿ ಕರಾವ್ಣು.

10 "ತೂ ಬಾವಳ್ಯನ ಝಾ಼ಡ್‌ಥಿ ಎಕ್ ಪಿಟಾರೊ ಕರಾವ್ಣು. ಯೊ ಅಢೈಹಾತ್‌ ಲಾಂಬು, ಡೋಡ್ ಹಾತ್ ಚೌ಼ಡುಬಿ ಬಿಜೂ಼ ಡೋಡ್ ಹಾತ್ ಊಚು಼ಬಿ ರ‍್ಹೇವ್ಣು. 11 ಅಫುಟ್‌ ಖ್ಹೊನ್ನಾನ ತಗ್‌ಡಾವ್ನ ಇನ ಭಾರ್‌ಬಿ ಅಜು಼ ಮಹಿಬಿ ಲಗಾಡ್‌ಣು. ಇನ ಉಪ್ಪರ್ ಅಶ್‌ಪಿಶ್‌ಬಿ ಖ್ಹೊನ್ನಾನು ತೋರಣ್ ಭಂದಾವ್ಣು. 12 ಚಾರ್‌ ಖ್ಹೊನ್ನಾನು ಕಾಕ್ಣಿಯೆ ಇನ ಚಾರ್ ಕೋಣಮಛಾ಼ತೆ ಎಕೇಕೆ ಗೋಡನಬಿ ಬೆಬ್ಬೆ ಕಾಕ್ಣಿಯೆನ ಘಾಲ್‌ನು. 13 ಯೊ ಪಿಟಾರನ ಪಾಡಾನಖ್ಹಾಜೆ ತು ಬಾವಳ್ಯನ ಝಾ಼ಡ್‌ನು ಖಂಬಾವ್ನ ಬಣೈನ್ ಯೋಖ್ಹಾರನ ಖ್ಹೊನ್ನಾನ ತಗ್‌ಡಾವ್ನ ಮೂಚಿನ್, 14 ಪಿಟಾರನ ಭೇಬಾಜು಼ ಛಾ಼ತೆ ಕಂಗ್‌ಣಿಯೆಮ ಮಳಾವ್ಣು. 15 ಯೊ ಖಂಬಾವ್ನ ಪಿಟಾರನು ಕಂಗ್‌ಣಿಯೆಥಿ ನಾಕಾಡ್ಣುತೆ ಇನಾಸ್‌ಮ ಮ್ಹೇಲಿರಾಕ್ಣು. 16 ಯೊ ಪಿಟಾರಮ ಮೇ ತುನ ದ್ಯವಾನು ಹುಕುಮ್‌ನ ಬಂಡಾನ ಪಲ್ಗಾನ ಮ್ಹೇಲ್ನು. 17 ಅಫುಟ್ ಖ್ಹೊನ್ನಾನು ಕೃಪಾಸನ್‌ನ ಬಣಾವ್ಣು. ಯೊ ಅಢೈಹಾತ್ ಲಾಂಬುಬಿ, ಡೋಡ್ ಹಾತ್ ಚೌ಼ಡುಬಿ ಹುಯಿರ‍್ಹೇಣು. 18 ಕೃಪಾಸನ್ನು ಬೇ ನೋಕ್‌ಮ ಬೇ ಖ್ಹೊನ್ನಾನು ಕೆರೂಬಿಯೇವ್ನ ನಕ್ಷಾನ ಕಾಮ್‍ಥಿ ಬಣಾವ್ಣು. 19 ಕೃಪಾಸನ್ನು ಏಕೇಕ್‌ ಕೋಣನಾಬಿ ಏಕೇಕ್‌ ಕೆರೂಬಿನ ಕರೈನ್ ಇನ ಕೃಪಾಸನ್ನ ಜೋ಼ಡ್ ಕರ‍್ನು. 20 ಯೊ ಕೆರೂಬಿಖ್ಹಾರು ಉಪ್ಪರ್ ಫಾಕ್ಡಿಯೇನ ಫಖ್ಹಾರಿರಾಖನಿತರಬಿ ಅಜು಼ ಕೃಪಾಸನ್‌ನ ಇನಿ ಫಾಕ್ಡಿಥಿ ಢಾಪಿರಾಖನಿತರಬಿ ರ‍್ಹೇವ್ಣು. ಇವ್ಣು ಮ್ಹೋಡುಖ್ಹಾರು ಆಮೆಖ್ಹಾಮೆಥಿ ಕೃಪಾಸನ್‌ನ ದೇಖನಿತರ ರ‍್ಹೇವ್ಣು. 21 ಯೊ ಕೃಪಾಸನ್‌ನ ಪಿಟಾರನ ಉಪ್ಪರ್ ಮ್ಹೇಲ್ನು. ಮೇ ತುನ ದ್ಯವಾನು ಹುಕುಮ್‌ನು ಲೀಖ್ಯಾವ್ನ ಯೊ ಪಿಟಾರನ ಮಹಿ ಘಾಲ್‌ನು. 22 ಹಿಜ಼್ಜಸ್ ಮೇ ತುನ ದರ್ಶನ್ ದಿಶ್. ಕೃಪಾಸನ್ನ ಉಪ್ಪರ್ ಹುಕುಮ್‌ನಿ ಲೀಖ್ಯಾವ್ನ ಮ್ಹೇಲಿರಾಖ್ಯುತೆ ಪಿಟಾರನ ಉಪ್ಪರ್ ಬೇ ಕೆರೂಬಿಯೇವ್ನ ಬೀಚ್ಮಾಸ್ ಮೇ ರ‍್ಹೀನ್ ತುಮಾರ ಜೋ಼ಡೆ ವಾತೆ ಬೋಲಿನ್ ತು ಇಸ್ರಾಯೇಲ್‌ವಾಳನ ಹುಕುಮ್ ಕರ‍್ನುತೆ ಹಿಡಿ ವಾತೇವ್ನ ಬೋಲಿದಿಶ್.

23 "ತು ಬಾವಳ್ಯನ ಝಾ಼ಡ್‌ಥಿ ಎಕ್ ಖುಡ್‌ಷಿನ ಕರಾವ್ಣು. ಯೊ ಬೇ ಹಾತ್ ಲಾಂಬುಬಿ, ಎಕ್ ಹಾತ್ ಚೌ಼ಡುಬಿ, ಡೋಡ್ ಹಾತ್ ಊಚು಼ಬಿ ರ‍್ಹೇವ್ಣು. 24 ಇನ ಅಫುಟ್ ಖ್ಹೊನ್ನಾನ ತಗಡ್‌ಥಿ ಢಾಪಿನ್, ಅಶ್‌ಪಿಶ್‌ಬಿ ಖ್ಹೊನ್ನಾನಿ ತೋರಣ್ ಭಂದಾವ್ಣು. 25 ಖುಡ್‌ಷಿನ ಅಶ್‌ಪಿಶ್‌ಬಿ ಹತೇಳಿಯೆತ್ರೆ ಚೌ಼ಡುರ‍್ಹವಾನು ಆಡಿ ಪಟ್ಟಿನ ಕರೈನ್ ಇನಾಬಿ ಖ್ಹೊನ್ನಾನ ತೋರಣ್ ಭಂದಾವ್ಣು. 26 ಚಾರ್‌ ಖ್ಹೊನ್ನಾನು ಕಾಕ್ಣಿನ ಕರೈನ್ ಖುಡ್‌ಷಿನ ಚಾರ್ ಗೋಡಾವ್‌ನಾಬಿ ಘಾಲ್‌ನು. 27 ಯೊ ಕಾಕ್ಣಿಯೆ ಆಡಿಪಟ್ಟಿನ ಲಾಗಿರ‍್ಹೇಣು. ಖುಡ್‌ಷಿನ ಪಾಡಾನಖ್ಹಾಜೆ ಲಠ್ಠಾವ್ನ ಇನಾಮ ಪೆಖ್ಹಾಡ್‌ಣು. 28 ಯೊ ಲಠ್ಠಾವ್ನ ಬಾವಳ್ಯನ ಝಾ಼ಡ್‌ಥಿ ಕರೈನ್ ಇನ ಖ್ಹೊನ್ನಾನ ತಗ್‌ಡಾವ್ನ ಮೂಚ಼್‌ಣು. ಇನೇಥಿಸ್ ಖುಡ್‌ಷಿನ ಪಾಡ್‌ನು. 29 ಮೇಜ್‌ನ ಉಪ್ಪರ್ ಮ್ಹೇಲ್ನುತೆ ಕಾಠುಕ್‌ಖ್ಹಾರುಬಿ, ಢಾಕ್ಣಿಬಿ, ತಾಂಬ್ಯಬಿ, ಪಿಯ್ಯಾನ ಹೋಣುತೆ ಕಟೋರಾವ್ನ ಅಫುಟ್ ಖ್ಹೊನ್ನೆಥೀಸ್ ಕರಾವ್ಣು. 30 ಪರಿಶುದ್ ರೋಟೊ ಹರೇಕ್‌ದನ್ ಯೊ ಖುಡ್‌ಷಿನ ಉಪ್ಪರ್ ಮಾರ ಖ್ಹಾಮ್ಣೆಸ್ ಮ್ಹೇಲಿರಾಕ್ಣು.

31 "ಅಫುಟ್ ಖ್ಹೊನ್ನಾನು ದಿವೋನು ಖಂಬು ಕರಾವ್ಣು. ಯೊ ಖಂಬಾನು ಹೇಟ್‌ಲ್ಯ ಭಾಗ್ನ ನಕ್ಷಾನ ಕಾಮ್‍ಥಿ ಕರಾವ್ಣು. ಯೊ ದಿವೋನು ಖಂಬು ಅಖ್ಖೂಸ್ ದೇಖಾವನಿತರ ಫೂಲ್‌ನೊ ಗುಚ್ಚಾ಼ಥಿಬಿ, ಛಿದ್ರಾಯ ಹುಯ ಫೂಲ್‌ಥಿಬಿ, ಗೋಂಡಿಯೆಥಿ ಭರೈರ‍್ಹೀನ್ ಶನ್‌ಗಾರ್‌ಥಿ ಕೆತ್ತೈರ‍್ಹೇಣು. 32 ಖಂಬಾನು ಏಕೇಕ್‌ ಬಾಜು಼ಬಿ ತೀನ್‌ತೀನ್ ಡಾಳಿಯೆನಿಘೋಣಿ ಇಮ್ಮಸ್ ಛೋ಼ ಡಾಳಿಯೆಬಿ ರ‍್ಹೇವ್ಣು. 33 ಹರೇಕ್ ಡಾಳಿಯೆವ್ಮ ಬಾದಾಮ್‌ನ ಫೂಲ್‌ನಿಘೋಣಿನು ತೀನ್‌ತೀನ್ ಫೂಲ್‌ಬಿ ಗೋಂಡಿಯೆಬಿ ರ‍್ಹೇವ್ಣು. ದಿವೋನು ಖಂಬಾಥು ಆವಾನಿ ಛೋ಼ ಡಾಳಿಯೆನಾಬಿ ಇಮ್ಮಸ್ ಕರಾವ್ಣು. 34 ದಿವೋನು ಖಂಬ್‌ನಿ ಡಾಳಿಯೆವ್ಮ ಫೂಲ್‌ನೊ ಗುಚ್ಚೊ಼ಬಿ, ಫೂಲ್‌ಖ್ಹಾರುಬಿ, ಗೋಂಡಿಯೆಬಿ ರ‍್ಹವಾನು ಬಾದಾಮ್‌ನ ಫೂಲ್‌ನಿಘೋಣಿ ಚಾರ್ ಫೂಲ್‌ನಿ ಶನ್‌ಗಾರ್‌ಖ್ಹಾರುಬಿ ರ‍್ಹೇವ್ಣು. 35 ಬೆಬ್ಬೇ ಡಾಳಿಯೆ ಫಾಕೆಮ್ಹೆಲಿರಾಖಾನಿ ಝ಼ಗೊಖ್ಹಾರು ಏಕೇಕ್‌ ಗೋಂಡಿ ರ‍್ಹೇವ್ಣು. 36 ಫೂಲ್, ಗೋಂಡಿಯೆ, ಡಾಳಿಯೆಥಿ ರ‍್ಹವಾನು ದಿವೋನು ಖಂಬ್‌ಖ್ಹಾರುಸ್ ಏಕ್‌ದಮ್ ಅಫುಟ್ ಖ್ಹೊನ್ನಾನ ನಕ್ಷಾನ ಕಾಮ್‌ಥಿಸ್ ಕರಾವ್ಣು. 37 ಇನ ಖ್ಹಾತ್ ದಿವಳ್‌ಗಿನ ಕರಾವ್ಣು. ಯೊ ದಿವಳ್‌ಗಿನು ಉಜಾ಼ಳು ಖ್ಹಾಮ್ಣೆಥು ಪಡಾನಿತರ ಯೊಖ್ಹಾರನ ಲಗಾಡಿರಾಕ್‌ಣು. 38 ದಿವೋನು ಬತ್ತಿ ಕಾಡಾನ ಕತರ್ನಿಬಿ, ಕತ್ರಿಹುಯಿ ನೋಕ್ ನಾಖಾನ ಕಟೋರನಾಬಿ ಅಫುಟ್ ಖ್ಹೊನ್ನೆಥೀಸ್ ಕರಾವ್ಣು. 39 ದಿವೋನು ಖಂಬುಬಿ ಇನು ಕಾಮ್ನು ಖ್ಹಾರುಸ್ ಜಿನಖ್ಹ್‌ಬಿ ಪಾಚು಼ಪ್ಪರ್ ಡೋಡಿಖ್ಹ್‌ ಕಿಲೊ ಅಫುಟ್‌ ಖ್ಹೊನ್ನೇಥಿ ಹುಯಿರ‍್ಹೇವ್ಣು. 40 ದೇಕ್, ಪಹಾಡ್‌ಮ ಮೇ ತುನ ವತಾಳ್ಯೊತೆ ಪರಕ್ಮಾಸ್ ಅಖ್ಖಾನ ಹೊಷಾರ್‌ಥಿ ಕರಾವ್ಣು."