1 ಯೆಹೋವನೆ ಮೋಶೆನ, "ತೂ ಪಹಿಲೆನ ಖೊಡ್‍ಶನ ಪಲ್ಗಾನಿಘೋಣಿ ಬಿಜೂ಼ಬಿ ಬೇ ಬಂಡಾನ ಪಲ್ಗಾವ್ನ ತಯಾರ್ ಕರಿಲೆ. ತೂ ಫೋಡಿನಾಖ್ಯೊತೆ ಯೊ ಪಹಿಲೆನ ಪಲ್ಗಾವ್‌ಪರ‍್ನು ವಚನ್‌ಅಖ್ಖಾನ ಆ ಪಲ್ಗಾವ್‌ಪರ್ ಮೇ ಲೀಖುಸ್. 2 ವ್ಹಾಣೆ ತೂ ತಯಾರ್ ಹುಯಿನ್, ಸೀನಾಯಿ ಪಹಾಡ್‌ನ ಛ಼ಡಿನ್ ಹಿಜ಼್ಜಾ ಪಹಡ್‌ನಿ ನೋಕ್‌ನ ಉಪ್ಪರ್ ಮಾರ ಖ್ಹಾಮೆ ಭಿಯೊರ‍್ಹೇವ್ಣು. 3 ಕೋಣ್‌ಬಿ ತಾರ ಜೋ಼ಡೆ ಪಹಾಡ್‌ಪರ್ ನಾ ಆವ್ಣು. ಆ ಪಹಾಡ್‌ಪರ್ ಕೋಣ್‌ಬಿ ಕಿಜ್ಜಾ಼ಬಿ ನಾದೆಖಾವ್ಣು; ಢಾಂಡು ಮೇಂಢುಬಿ ಪಹಾಡ್‌ಕನ ನಾಚ಼ರ‍್ನು" ಕರಿ ಬೊಲ್ಯೊ. 4 ಇನಖ್ಹಾಜೇಥಿ ಮೋಶೆನೆ ಪಹಿಲೆಥೂತೆ ಪಲ್ಗಾನಿತರ ಬೇ ಬಂಡಾನ ಪಲ್ಗಾವ್ನ ಟಕೈಲಿನ್, ಯೆಹೋವನ ಹುಕುಮ್‌ನಪರ್ ವ್ಹಾಣೆ ಉಠಿನ್ ಯೊ ಬೇ ಖೊಡ್‍ಶನ ಪಲ್ಗಾವ್ನ ಹಾತ್ಮ ಪಾಡಿಲಿನ್ ಸೀನಾಯಿ ಪಹಾಡ್‌ನ ಛ಼ಡ್ಯೊ. 5 ತದೆ ಯೆಹೋವನೆ ಮೋಡ್‌ಮ ಉತ್ರಿನ್ ಅಯಿನ್ ಹಿಜ಼್ಜಾ ಇನ ಖನ್ನೆ ಭೀರಿನ್ ಯೆಹೋವಕರಿ ಇನ ಪರಿಶುದ್ದ ನಾಮ್ನ ಪ್ರಕಟ್‌ಕರ‍್ಯೊ. 6 ಯೆಹೋವನೆ ಮೋಶೆನ ಖ್ಹಾಮೆಕರಿ ಜಾ಼ತೊಹುಯಿನ್ ಅಮ್ ಪ್ರಕಟ್ ಕರ‍್ಯೊಕಿ: ಯೆಹೋವಕರಿ ದೇವ್ ಗೋರ್‌ವಾಳೊಬಿ, ಕೃಪೆನೊಬಿ, ಧೇರ್‌ಥಿ ಇರಾದಕರವಾಳೊಬಿ, ಪ್ಯಾರ್‌ವಾಳೊ ಅಜು಼ ವಿಶ್ವಾಸ್‌ನೊ ದೇವ್‌ ಹುಯಿರ‍್ಹೊಸ್; 7 ಹಜಾ಼ರೊ ಮುಂಡಿಲಗುಬಿ ಪ್ಯಾರ್‌ ಕರವಾಳೊ; ಖೋಟ್ ಖರಾಬಿನ ಪಾಪ್‌ಅಖ್ಖಾನ ಮಾಫಿಕರಾವಳೊ; ಕತೋಬಿ ಅಪರಾದಿವ್‌ನ ನಿಶತ್ ದಿಶೆಕೊಂತೆ ಮ್ಹೇಲ್‌ಶೆ ಕೊಯ್ನಿ; ಬಾನು ದೋಷ್‌ನು ಫಲ್ನ ತೀನ್ ಅಜು಼ ಚಾರ್‌ ಮುಂಡಿಲಗು ಲಡ್ಕಾನ್ ಲಡ್ಕಾವ್‌ಲಗುಬಿ ಲಿಆವಾಳೊ ಹುಯಿರ‍್ಹೊಸ್" ಕರಿ ಬೋಲನುಸ್. 8 ಮೋಶೆ ತದೇಸ್‌ ಜ಼ಮಿನ್‌ಪರ್ ಆಡ್‌ಪಡಿನ್ ಆರಾದನೆ ಕರಿನ್, 9 "ಪ್ರಭು, ತಾರಿ ನಜ಼ರ್‌ಮ ಮನ ದಯಾ ಮಳಿರ‍್ಹು ಉಷೇತೊ ತೂಸ್ ಹಮಾರ ಜೋ಼ಡ್ಮ ಆವ್ಣು. ಹಮಾರು ಅದ್ಮಿಖ್ಹಾರು ಮೊಂಡಿಸ್; ರ‍್ಹಿಯುತೋಬಿ ತೂ ಹಮಾರ ಪಾಪ್‌ಅಖ್ಖಾನ, ಖರಾಬ್‍ಕಾಮ್ನ ಮಾಫಿಕರಿನ್ ತಾರೊ ಶೊಂತ್ ಅದ್ಮಿಕರಿನ್ ಹಮುನ ಸ್ವೀಕಾರ್ ಕರ‍್ನು" ಕರಿ ಬೊಲ್ಯೊ.

10 ಯೆಹೋವನೆ ಶಾತ್ ಬೋಲ್ಯೊಕತೊ, "ಖ್ಹಮಜ಼್ ಮೇ ಎಕ್ ಒಪ್ಪಂದನ ಭೀರಾಖಿಷ್, ಜಗತ್‌ಮ ಕಿಜ್ಜಾ಼ಬಿ ಖೆವ ಜ಼ಗ್‌ಜಾ಼ತ್‌ಮಬಿ ಚಾ಼ಲ್ಯುಕೊಂತೆ ಮಹಾನ್ ಕಾಮ್ನ ತಾರು ಅದ್ಮಿಖ್ಹಾರು ದೆಖಾಖ್ಹರ್ಕು ಚ಼ಲೈಶ್. ತಾರ ಅಶ್‌ಪಿಶ್‌ನು ಖ್ಹಾರು ಅದ್ಮಿಬಿ ಯೆಹೋವ ಕರಾನ ಮಹಾನ್ ಕಾಮ್ನ ದೇಕ್‌ಶೆ. ಮೇ ತುಮಾರಿ ಬಾರೇಮ ಕರ‍್ನುಕರಿಛೂ಼ತೆ ಅದ್ಬುತ್‌ಹುಯಿರ‍್ಹುಸ್. 11 ಮೇ ಆಜ಼್ ತುಮುನ ಹುಕುಮ್ ಕರುತೆಯಿನ ತುಮೆ ಪಾಡಿ ಚಾ಼ಲ್ನು. ಹಂದೇಕ್, ಮೇ ಅಮೋರಿವಾಳನ, ಕಾನಾನ್ಯವಾಳನ, ಹಿತ್ತಿಯವಾಳನ, ಪೆರಿಜೀವಾಳನ, ಹಿವ್ವಿವಾಳನ ಅಜು಼ ಯೆಬೂಸಿವಾಳನ ತುಮಾರ ಖ್ಹಾಮ್ಣೆಥು ನಖ್ಹಾಡಿದಿಶ್. 12 ತುಮೆ ಜೈ಼ನ್ ಮಳಾನ ದೇಖ್ಹ್‌ನು ರ‍್ಹವಾಳನ ಜೋ಼ಡೆ ಖಿವಿ ಒಪ್ಪಂದನಬಿ ನಾ ಕರಿಲೇವ್ಣುತೆ ಹೊಷಾರ್‌ಥಿ ರ‍್ಹವೊ; ಇಮ್ ಕರಿಲಿದುತೊ ಯೊ ತುಮಾರ ಬೀಚ್ಮ ಫಾಖ್ಹೊಹುಯಿರ‍್ಹಿಷೆ. 13 ತುಮೆ ಇವ್ಣು ಚಾ಼ಚ಼ರ್‌ನ ರಡ್‌ಕೈನ್‌ ಬಂಡಾನ ಖಂಬಾವ್ನ ಫೋಡಿನ್ ಅಶೇರ್ ಕರಿ ಮೂರತ್‌ನ ಖಂಬಾವ್ನ ಕತ್ರಿನಾಕ್ಣು. 14 ತುಮೆ ಅಲಕ್ ದೇವ್ನ ಖ್ಹಾಮ್ಣೆ ನಾ ಆಡ್‌ಪಡ್ನು; ಶನಕತೊ ಶೊಂತ್‌ ಮರ‍್ಯಾದಿನ ನಾಮ್‌ರ‍್ಹವಾಳೊ ಯೆಹೋವ ದೇವ್ ಇನ ಮಳ್‌ಣುತೆ ಮರ‍್ಯಾದಿ ಬಿಜೇಕ್‌ ದೇವ್ನ ಮಳಾನ ಕೋ ಮ್ಹೇಲಾನಿ. 15 ತುಮೆ ಯೊ ದೇಖ್ಹ್‌ನು ರ‍್ಹವಾಳನ ಜೋ಼ಡೆ ಒಪ್ಪಂದ ನಾ ಕರಿಲೇವ್ಣುತೆ ಹೊಶಾರ್‌ಥಿ ರ‍್ಹವೊ. ಕರಿಲಿದಾತೊ ಇವ್ಣೆ ಇವ್ಣ ದೇವ್ನ ಪೂಜ಼ಕರೀನ್ ಬಲಿ ಛ಼ಡಾಯಹುಯ ಖಾಣನ ತುಮುನ ಬುಲಾಯೆಜಾ಼ಯ್, ತದೆ ತುಮೆ ಜೈ಼ನ್ ಯೊ ಖಾವಖ್ಹರ್ಕು ಉಷೆ. 16 ಅತ್ರೇಸ್ ಕಾಹೆತೆ ತುಮೆ ತುಮಾರ ಪರ್ಖ್ಹಾ ಲಡ್ಕಾನ ಇವ್ಣಮಾನಿ ತಯೇಡ ಛೋ಼ಕ್ರಿಯೆನ ಲ್ಯಾವಾನ ಯೊ ವಾಟ್‌ ಹುಯಿಜಾ಼ಶೆ; ಇನಪಾರ್ ಯೊ ವ್ಹವೆಖ್ಹಾರಿ ಆಯಬಾನ ದೇವ್ನ ಪೂಜ಼ಕರವಾಳಿ ಹುಯಿನ್ ತುಮಾರ ಛಿಯ್ಯವ್‌ನಾಬಿ ಅನ್ಯ ದೇವ್‌ನು ಪೂಜ಼ ಕರಿ ವ್ಯಬಿಚಾರ್‌ನ ಖೇಚಿಲಿಶೆ. ಇನಾಖ್ಹಾಜೆ ಜ಼ತನ್‌ಥಿರ‍್ಹವೊ. 17 "ತುಮೆ ಟಕಾಯಹುಯು ದೇವ್‌ನು ಮೂರತ್‌ನ ನಾ ಕರಿಲೇವ್ಣು. 18 "ಖಾಟುಕೊಂತೆ ರೋಟೊ ಖಾವನಿ ಜ಼ತ್ರಾ ಕರೊ. ಮೇ ತುಮುನ ಹುಕುಮ್ ಕರೂತೆ ಇಮ್ ತುಮೆ ಚೇತ್ರಿನ ಮಹಿನಾಮ ಖ್ಹಣೇದ್ ಹುಯಿರುತೆ ಹಗಾಮ್ಮ ಖ್ಹಾತ್ ದನ್‌ಲಗು ಖಾಟುಕೊಂತೆ ರೋಟನ ಖಾವ್ಣು. ಶನಕತೊ ತುಮೆ ಯೊ ಮಹಿನಾಮಸ್ ಈಜಿಪ್ಟ್ ದೇಖ್ಹ್‌ಥು ಛು಼ಟಿನ್ ಆಯತೆ. 19 "ಪೈಲ್ಹೋಟು ಗರಬ್ನುಫಲ್ ಕತೊ, ತುಮಾರು ಢಾಂಡ ಬೋಕ್ಡಮ ಪೈದಹುವಾತೆ ಪೈಲ್ಹೋಟ ಚೆಲ್ಕವ್‌ಮ ಪರ್ಖ್ಹೊ ಹುಯಿರುತೊ ಯೊ ಮಾರುಸ್. 20 ಗಧೇಡಾನ ಚೆಲ್ಕಾನ ಬದಲ್ ಮೇಂಢಾನ ಚೆಲ್ಕಾನ ದೀನ್ ಯೊ ಗಧೇಡಾನ ಚೆಲ್ಕಾನ ಛೋ಼ಡಯೆಜಾ಼ಯ್; ಇಮ್ ಛೋ಼ಡಾವನ ನಾಹುಯುತೊ ಇನು ಬೋಚಿ ತೋಡಿನ್ ಮಾರಿನಾಕ್ಣು. ಕತೋಬಿ ತುಮಾರು ಪೈಲ್ಹೋಟ ಪರ್ಖ್ಹಾ ಲಡ್ಕಾನ ಬದಲ್‌ದೀನ್‌ ಛೋ಼ಡೈಸ್‌ಲೇವ್ಣು.

ಕೋಣ್‌ಬಿ ಖಾಲಿಹಾತೆ ಮಾರ ಖ್ಹಾಮ್ಣೆ ನಾ ದೆಖಾವ್ಣು."

21 ಛೋ಼ ದನ್ ತುಮೆ ಕಾಮ್‌ ಕರೆಜಾ಼ಯ್. ಕತೋಬಿ ಖ್ಹಾತ್‌ನ ದನ್ನೆ ಶನಿ ಕಮೈಬಿ ನಾ ಕರ್ನು. ಯೊ ನಾಗ್ರಾನ ಹಗಾಮ್ ಹುಯಿರ‍್ಹವೋ, ವಢಾವ್ಣಿನ ಹಗಾಮ್‌ ಹುಯಿರ‍್ಹವೋ ಖ್ಹಾತ್‌ನೊ ದನ್ ಕಾಮ್‌ಕರವಾಳ ನಾರ‍್ಹೇವ್ಣು. 22 "ಘವ್‌ನು ಪಿಕಾವ್ಣಿನು ಪಹಿಲು ಫಲ್ನ, ಪಸ್ಕ ಜ಼ತ್ರಾಹುಯಿನ್ ಥೋಡ ವಾರಾನ ಬಾದ್‌ಮ ಖ್ಹುಗ್ಗಿನಿ ಜ಼ತ್ರಾ ಕರಾನಿ ವಖ್ಹ್‌ತೆ ದೆವ್ಣು. ವರಖ್ಹ್‌ನ ಖ್ಹರ್ತಿನ ದನ್ಮ ಅನಾಜ಼್ ಜ಼ಮಕರಾನಿ ಜ಼ತ್ರಾನ ಕರ‍್ನು. 23 ವರಖ್ಹ್‌ನ ತೀನ್ ವಖ್ಹತ್ ತುಮಾರಮಾನು ಪರ್ಖ್ಹಾ ಖ್ಹಾರೂಸ್ ಇಸ್ರಾಯೇಲ್‌ವಾಳನು ದೇವ್‌ಬಿ ಪ್ರಭು ಯೆಹೋವ ಹುಯಿರೋತೆ ಮಾರ ಖ್ಹಾಮ್ಣೆ ಆಯಿನ್, ಆರಾದನೆ ಕರ‍್ನು. 24 ಮೇ ತುಮಾರ ಖ್ಹಾಮ್ಣೆಥು ಅನ್ಯ ಅದ್ಮೆವ್‌ನ ನಖ್ಹಾಡಿನ್ ತುಮಾರ ದೇಖ್ಹ್‌ನ ಫೈಲವುಸ್‌. ಅತ್ರೇಸ್ ಕಾಹೆತೆ ತುಮೆ ವರಖ್ಹ್‌ನ ತೀನ್ ವಖ್ಹತ್ ತುಮಾರೊ ದೇವ್ ಯೆಹೋವ ಹುಯಿರೋತೆ ಮಾರ ಖ್ಹಾಮ್ಣೆ ಆವಾನಿ ವಖ್ಹ್‌ತೆ ಕೋಣ್‌ಬಿ ತುಮಾರ ದೇಖ್ಹ್‌ನ ಕಬ್‌ಜ಼಼ಕರಾನ ಆಖ್ಹ್ ಕರ್‌ಶೆಕೊಯ್ನಿ.

25 "ಮನ ಬಲಿ ಅರ್ಪಣ್‌ಕರಾನಿ ವಖ್ಹ್‌ತೆ ಯೊ ಬಲಿನು ಜಾನ್ವರ್‌ನು ಲ್ಹೊಯಿಮ ಖಾಟೊ ಆಟಾನ ಮಳಾವ್ಣುನ. ಪಸ್ಕ ಜ಼ತ್ರಾಮ ತುಮೆ ಬಲಿ ದೇಸ್‌ತೆ ಬೋಟಿನ ಅಗ್‍ಲ್ಯ ದನ್ನು ವ್ಹಾಣುಹುವಾಲಗು ಉಭ್‌ರಾವ್ಣುನ. 26 "ಜ಼ಮೀನ್ನು ಫೈಲು ಪಿಕಾವ್ಣಿಮಾನು ಅಛ್ಛು಼ ಭಾಗ್ನ ತುಮಾರೊ ದೇವ್ ಯೆಹೋವನ ಮಂದಿರ್‌ನ ಲೀನ್‌ ಆವ್ಣು. "ಬೋಕ್ಡಾನು ಚೆಲ್ಕಾನ ಇನಿ ಆಯಾನ ದೂದ್ಮ ನಾ ರ‍್ಹಾಂದ್‌ಣು." 27 ಯೆಹೋವನೆ ಮೋಶೆ, "ತೂ ಆ ವಚನ್ನ ಲೀಖ್, ಶನಕತೊ ಆ ವಚನ್ನಿ ಘೋಣಿ ತಾರಿಜೋ಼ಡ್ಮಾಬಿ ಇಸ್ರಾಯೇಲ್‌ವಾಳನಿ ಜೋ಼ಡ್ಮಾಬಿ ಎಕ್ ಒಪ್ಪಂದ ಕರಿರಾಖ್ಯೋಸ್‌" ಕರಿ ಹುಕುಮ್ ಕರ‍್ಯೊ. 28 ಮೋಶೆ ಯೊ ಪಹಾಡ್‌ಮ ರಾತ್‌ದನ್ ಚಾ಼ಳಿಖ್ಹ್‌ರೋಜ಼್‌ ಲಗೂಬಿ ಖಾಣುಪಾಣಿ ಮ್ಹೇಲಿನ್‌ ಯೆಹೋವನ ಖ್ಹಾಮ್ಣೆ ಥೊ. ಒಪ್ಪಂದನು ವಚನ್ನ, ಕತೊ ದಖ್ಹ್‌ ಹುಕುಮ್ನ ಯೊ ಖೊಡ್‍ಶನ ಪಲ್ಗಾವ್‌ಪರ್ ಇನೆ ಲೀಖ್ಯೊ.

29 ಮೋಶೆನೆ ಹುಕುಮ್‌ನು ಲೀಖ್ಯು ಹುಯಿರ‍್ಹುತೆ ಯೊ ಬೇ ಖೊಡ್‍ಶನ ಪಲ್ಗಾವ್‌ನ ಹಾತ್‌ಮ ಧರಿಲೀನ್ ಸೀನಾಯಿ ಪಹಾಡ್‌ಮಾಥೊ ಉತ್ರೀನ್ ಆವಾನಿವಖ್ಹ್‌ತೆ ಯೊ ಯೆಹೋವನಿ ಜೋ಼ಡ್ಮ ವಾತ್‌ಚೀತ್‌ ಬೋಲ್ಯೊಥೋತೆ ಇನಖ್ಹಾಜೆ ಇನು ಮ್ಹೋಡು ಉಜಾ಼ಖ್ಹ್‌ ಹುಯಿರೂಥು. ಕತೋಬಿ ಯೊ ಇನ ಮಾಲುಮ್ ಪಡ್ಯುಕೊಯ್ನಿ. 30 ಮೋಶೆನು ಮ್ಹೋಡು ಉಜಾ಼ಖ್ಹ್‌ಹುಯಿರುತೆ ಆರೋನನೇಬಿ ಇಸ್ರಾಯೇಲ್‌ವಾಳಾನೆ ದೇಖಿನ್‌ ಇನ ಖನ್ನೆ ಆವಾನ ಡರಿಗಯು. 31 ಕತೋಬಿ ಮೋಶೆನೆ ಆರೋನನಾಬಿ ಇವ್ಣ ಟಾಂಡಾನ ಗಲ್‌ಢಾನ ಇನಕನ ಬುಲಾಯೊ ಇವ್ಣೆ ಆಯು; ಮೋಶೆ ಇವ್ಣ ಜೋ಼ಡೆ ವಾತೆಬೋಲ್ಯೊ. 32 ಇನಕೇಡೆಥು ಇಸ್ರಾಯೇಲ್‌ವಾಳು ಇನಕನ ಆಯು. ಮೋಶೆನೆ ಯೆಹೋವದೇವ್‌ಕನ ಸೀನಾಯಿ ಪಹಾಡ್ನ ಉಪ್ಪರ್‌ ಲಿದೋತೆ ಹುಕುಮ್ನ ಇವ್ಣುನ ಬೊಲ್ಯೊ. 33 ಮೋಶೆ ಇವ್ಣ ಜೋ಼ಡೆ ವಾತೆ ಬೋಲಿಹುಯಿಗು ತದೆ ಇನ ಮ್ಹೋಡಾನ ಉಪ್ಪರ್‌ ಘುಮ್‌ಟಾನ ನಾಖಿಲಿದೊ. 34 ಮೋಶೆ ಯೆಹೋವನಿ ಜೋ಼ಡೆ ವಾತೆ ಬೋಲಾನ ಕದೆ ಇನಖ್ಹಾಮ್ಣೆ ಜಾ಼ತೊಥೋಕಿ ತದೆ ಯೊ ಘುಮ್‌ಟಾನ ನಾಖಿಲೆತೋಥೊ. ಭಾರ್‌ ಆಯೋತೊ ಕಾಡಿ ಮ್ಹೆಲಿದೆತೋಥೊ. ಯೊ ಭಾರ್‌ ಆಯೋತೊ ಯೆಹೋವನಿ ಹುಕುಮ್ನ ಇಸ್ರಾಯೇಲ್‌ವಾಳಾನ ಬೋಲ್ತೊಥೊ. 35 ಮೋಶೆನು ಮ್ಹೋಡು ಉಜಾ಼ಖ್ಹ್‌ಹುಯಿರವಾನು ಇಸ್ರಾಯೇಲ್‌ವಾಳು ದೇಕ್‌ತುಥು. ಇನಖ್ಹಾಜೆ ಯೊ ಯೆಹೋವನ ಜೋ಼ಡೆ ವಾತೆಬೋಲಾನ ಜಾ಼ವಲಗೂಬಿ ಇನ ಮ್ಹೋಡಾನ ಉಪ್ಪರ್‌ ಯೊ ಘುಮ್‌ಟಾನ ಪಾಛೊ಼ ನಾಖಿಲೆತೋಥೊ.