1 ಯೆಹೋವನೆ ಮೋಶೆನ ಅಮ್ ಬೊಲ್ಯೊ, 2 "ದೇಕ್, ಮೆ ಯೆಹೂದ ಖೂಮ್‌ನೊ ಹೂರನೊ ಪೋತಿಬಿ, ಊರಿಯನೊ ಛಿಯ್ಯೊಬಿ ಹುಯಿರ‍್ಹೋತೆ ಬೆಚಲೇಲ ಕರಿ ಬೋಲವಾಳನ ಚೂ಼ಣಿರಾಖ್ಯೊಸ್. 3 ಅಖ್ಖಿ ಥರಾನು ಬಣಾವಟ್ ಕರಾನು ದೇವ್ನು ಗ್ಯಾನ್ನಾಬಿ, ಖ್ಹೊನ್ನು, ರೂಪು ಅಜು಼ ತಾಂಬಾನು ಕಾಮ್ ಕರಾನಬಿ, 4 ಹೀರಾವ್ನ ಟಕಾವನಾಬಿ, ಝಾ಼ಡ್‌ಣ ಖೋಂದಿನ್‌ ಕಾಮ್‌ ಕರಾನಬಿ, 5 ಇನ ದೇವ್ನು ಆತ್ಮನ ದೀನ್‌, ಇನ ಹೋಣುತೆ ಗ್ಯಾನ್, ಅಕ್ಕಲ್‌, ಬುದ್ದಿ ಕೈಏಕ್‌ ವಿಚಿತ್ರಥಿ ಹೀರಾನ ಕೆತ್ತಾನು ಕಾಮ್‌ ಕರಾನ ಅಕ್ಕಲ್‌ ದೀರಾಖ್ಯೊಸ್, 6 ಇನಿ ಜೋ಼ಡ್ಮ ದಾನ್ ಖೂಮ್‌ನೊ ಅಹೀಸಾಮಾಕನೊ ಛಿಯ್ಯೊ ಒಹೋಲೀಯಾಬನ ನೇಮಕ್‌ ಕರಿರಾಖ್ಯೊಸ್. ಯೋಸ್ ಕಾಹೆತೆ ಮೆ ತುನ ಹುಕುಮ್ ದಿದೊತೆ ಅಖ್ಖಾಸ್ನ ಕರಾನ ಅಕ್ಲಿ ಹುಯಿರ‍್ಹವಳನ ದಿಲ್ಮ ಅಕ್ಕಲ್‍ನ ಪೈದ ಕರಿರಾಖ್ಯೊಸ್. 7 ದೇವ್ನ ದರ್ಶನ್ನು ಡೇರಾನು ಘರ್, ಹುಕುಮ್‌ನು ಮ್ಹೇಲಿರಾಖನು ಪಿಟಾರೊ ಇನು ಉಪ್ಪರ್‌ಲ್ಯು, ಕೃಪಾಸನ್, ಡೇರಾನ ಘರ್‌ನು ಕಾಮ್‌ಕರಾನು ಅಖ್ಖುಸ್ ಜಿನಖ್ಹ್‌, 8 ಖುಡ್‌ಷಿ ಇನು ಕಾಮ್ನು ಜಿನಖ್ಹ್‌, ಅಫುಟ್ ಖ್ಹೊನ್ನಾನು ದಿವೋನು ಖಂಬು ಇನು ಕಾಮ್ನು ಜಿನಖ್ಹ್‌ಅಖ್ಖು, 9 ಢಾಕ್ಣಿ, ಚಾ಼ಚ಼ರ್‌ ಇನು ಕಾಮ್ನು ಜಿನಖ್ಹ್‌ಅಖ್ಖು, ಪಾಣಿನು ಬಾನೆ ಇನು ಝ಼ಗ್ಲಿ, 10 ಶನ್‌ಗಾರ್ ಹುಯಿರ‍್ಹವನು ಪರಿಶುದ್ಧ್ ಪೆರ್ವಾಖ್ಹ್ಅಖ್ಖು ಕತೊ ಆರೋನ್ನಬಿ ಇನ ಛಿಯ್ಯಾವ್ನ ಹೋಣುತೆ ಪವಿತ್ರ ಯಾಜಕ್‌ನು ಪೆರ್ವಾಖ್ಹ್‌ಅಖ್ಖು, 11 ಅಬಿಷೇಕ್‌ನು ತೇಲ್ ಅಜು಼ ಪವಿತ್ರ ಝ಼ಗೋನು ಸೇವೆನ ಹೋಣುತೆ ಮಹಿಕಾವನು ಖ್ಹಾಲರ‍್ಯೊ ಆ ಅಖ್ಖಾನ ಮೇ ತುನ ಹುಕುಮ್ ಕರಾನಿತ್ರಸ್ ಇವ್ಣೆ ಕರ್ಷೆ."

12 ಯೆಹೋವನೆ ಪಾಛೊ಼ ಮೋಶೆನ ಅಮ್ ಬೊಲ್ಯೊ, 13 "ತೂ ಇಸ್ರಾಯೇಲ್‌ವಾಳನ ಹುಕುಮ್ ಕರ‍್ನುತೆ ಶಾತ್‌ಕತೊ: ಮೇ ನೇಮಕ್ ಕರ‍್ಯೊತೆ ಪವಿತ್ರ ಸಬ್ಬತ್ ಖ್ಹಾರದನ್ನ ತುಮೆ ಛು಼ಕ್‌ಣುನಾತೆ ಚ಼ಲಾವ್ಣು. ತುಮುನ ಪರಿಶುದ್‌ಕರಾವಳೊ ಯೆಹೋವ ಮೇಸ್ ಕರಿ ತುಮೆ ಮಾಲುಮ್ ಕರಿಲ್ಯವಾನಿಘೋಣಿ ಆಸ್ ಮನಾಬಿ ತುಮುನಾಬಿ ತುಮಾರ ಪಿಳ್ಗಿವಾಳನ ಬೀಚ್ಮ ರ‍್ಹವಾನಿ ಖ್ಹಣೇದ್. 14 ಇನಖ್ಹಾಜೆ ತುಮೆ ಸಬ್ಬತ್ ದನ್ನ ಪರಿಶುದ್ಧ್ ದನ್‌ಕರಿ ಚ಼ಲಾವ್ಣು. ಇನ ಮೈಲುಕರವಾಳ ಹರೇಕ್‌ಜ಼ಣಾನ ಮರಣ್ಣಿ ನಿಶತ್‌ಹೋಣು. ಯೊ ದನ್‌ಮ ಖಿವೊತೋಬಿ ಕಾಮ್ ಕರ‍್ಯೊತೊ ಇನ ಅದ್ಮಿವೋಮಾಥು ಕಾಡಿನಾಕ್ಣು. 15 ಛೋ಼ ದನ್ ಕಾಮ್‌ ಕರೆಜಾ಼ಯ್. ಖ್ಹಾತ್‌ನೊ ದನ್ ಅರಾಮ್‌ಕರಾನೊ ಸಬ್ಬತ್ ದನ್ ಹುಯಿರ‍್ಹೊಸ್. ಯೊ ಯೆಹೋವನ ಪರಿಶುದ್ಧ್‌ನೊ ದನ್. ಅಥ್ರಾನ ಸಬ್ಬತ್ ದನ್‌ಮ ರಾಬವಳನ ಮರಣ್ಣಿ ನಿಶತ್‌ಹೋಣು. 16 ಇನಖ್ಹಾಜೇಥಿ ಇಸ್ರಾಯೇಲ್‌ವಾಳು ಸಬ್ಬತ್ ದನ್ನ ಚ಼ಲಾವ್ಣು. ಆ ಚ಼ಲಾವನು ಇವ್ಣುನಬಿ, ಇವ್ಣ ಪಿಳ್ಗಿವಾಳನಬಿ ಹಮೇಶಾನು ಒಪ್ಪಂದಾನ ಹುಯಿರ‍್ಹುಸ್. 17 ಆ ಮನಾಬಿ ಇಸ್ರಾಯೇಲ್‌ವಾಳನಬಿ ಬೀಚ್ಮ ರ‍್ಹವಾನು ಶತಾಕಾಲನು ಖ್ಹಣೇದ್. ಶನಕತೊ ಛೋ಼ ದನ್ಮ ಯೆಹೋವನೆ ಆಬ್ ಧರ್ತಿವ್ನ ಉಬ್‌ಜ಼ೈನ್ ಖ್ಹಾತ್‌ನ ದನ್ಮ ಕಾಮ್ ಕರ‍್ಯೊಕೊಂತೆ ಅರಾಮ್ ಕರ‍್ಯೊಕೊಯ್ನಿಕಿಶು" 18 ಯೆಹೋವನೆ ಸೀನಾಯಿ ಪಹಾಡ್‌ಮ ಮೋಶೆನ ಜೋ಼ಡೆ ವಾತೆಬೋಲಾನು ಖತಮ್‌ಕರಿನ್ ಇನ ಯೊ ಬೇ ಹುಕುಮ್‌ನ ಬಂಡಾನ ಪಲ್ಗಾನ ದಿದೊ. ಯೊಅಖ್ಖು ದೇವ್ನ ಹಾತೇಖ್ಹು ಲಿಖಾಯುತೆ ಖೊಡ್‍ಶನ ಪಲ್ಗುಹುಯಿರ‍್ಹುಸ್.