1 ಇನಕೇಡೆಥು ಇಸ್ರಾಯೇಲ್‌ವಾಳನು ಟೋಳ್‌ಅಖ್ಖು ಯೆಹೋವನಿ ಹುಕುಮ್‌ನಿ ಪರಕ್ಮ "ಸೀನ್" ಕರಿ ಜ಼ಂಗಳ್‌ಥು ನಿಕ್ಳಿನ್ ಅಗ್ಗಳ್ ಚಾ಼ಲ್‌ಕುಚ಼್ ಕರಿನ್ ರೆಫೀದೀಮಿಮ ರ‍್ಹಯ. ಹಿಜ್ಜಾ಼ಬಿ ಅದ್ಮಿನ ಪಿಯ್ಯಾನ ಪಾಣಿ ಕೊಥುನಿ. 2 ಇನಖ್ಹಾಜೆ ಅದ್ಮಿಖ್ಹಾರು ಮೋಶೆಪರ್ ಭಣಕ್‌ತು ಹುಯಿನ್, "ಹಮುನ ಪಿಯ್ಯಾನ ಪಾಣಿ ದೆವಾಡಿದೇವ್ಣು" ಕರಿ ಗಲಾಟ್ ಕರಾಮ, ಮೋಶೆನೆ ಇವ್ಣುನ, "ಮಾರ ಕೇಡೆ ಶನ ಲಡೈಕರೊಸ್? ಯೆಹೋವನ ಶನ ತರೀಪ್ಷಕರೊಸ್?" ಕರಿ ಬೊಲ್ಯೊ. 3 ಹಿಜ಼್ಜ ಅದ್ಮಿಖ್ಹಾರು ಠೋಖ್ಹ್‌ಥಿ, ಮೋಶೆನ ವಿರೋದ್‌ಥಿ ಭಣ್‌ಕಿನ್, "ತೂ ಹಮುನಾಬಿ, ಹಮಾರ ಲಡ್ಕಾನಬಿ, ಜಾನ್ವರ್‌ನಬಿ ಈಜಿಪ್ಟ್ ದೇಖ್ಹ್‌ಥು ಹಜ಼್ಜ ಬುಲೈನ್ ಹಮ್ಕೆ ಪಾಣಿಕೊಂತೆ ಮಾರನಿಘೋಣಿ ಶನಕರ‍್ಯೊತೆ?" ಕರಿ ಬೋಲ್ಯು. 4 ತದೆ ಮೋಶೆ ಯೆಹೋವನ ಬಿಂತಿಕರಿನ್, "ಆ ಅದ್ಮಿನಖ್ಹಾಜೆ ಮೇ ಶಾತ್‌ಕರು? ಇವ್ಣೆ ಮನ ಬಂಡೊಫೇಕಿನ್ ಮಾರನಿತರ ಛೇನಿ" ಕರಿ ಬೊಲ್ಯೊ.

5 ಇನ ಯೆಹೋವನೆ ಮೋಶೆನ, "ತೂ ನೈಲ್ ನದ್ದೀನ ಮಾರ‍್ಯೊತೆ ಲಠ್ಠಾನ ಹಾತ್ಮ ಧರಿಲಿನ್ ಇಸ್ರಾಯೇಲ್‌ವಾಳನು ಶಾಣಾಮ ಥೋಡಾನ ಬುಲೈಲಿನ್ ಅದ್ಮಿಖ್ಹಾರನ ಖ್ಹಾಮ್ಣೆ ನಿಕ್ಳಿನ್, ಮೇ ವತಾಳನು ಝ಼ಗೋಕನ ಜಾ಼. 6 ಹಿಜ಼್ಜ ಹೋರೇಬ್‌ಮ ಛಾ಼ತೆ ಬಂಡಾನಪರ್ ಮೇಸ್ ತುನ ಮ್ಹೋರೆಹುಯಿನ್ ಭೀರಿಶ್. ತೂ ಯೊ ಬಂಡಾನ ಮಾರಾನಿವಖ್ಹ್‌ತೆ, ಅದ್ಮಿಖ್ಹಾರು ಪಿಯ್ಯಾನ ಪಾಣಿ ಭಾರ್‌ ನಿಕಳ್‌ಶೆ" ಕರಿ ಬೊಲ್ಯೊ. ಮೋಶೆ ಇಸ್ರಾಯೇಲ್‌ವಾಳನ ಗಲ್‌ಢಾನ ಖ್ಹಾಮೆ ಇಮ್ಮಸ್ ಕರ‍್ಯೊ. 7 ಇಸ್ರಾಯೇಲ್‌ವಾಳು, "ಯೆಹೋವ ಅಪ್ಣ ಬೀಚ್ಮ ಛಾ಼ಕಿಶು ಕೊಯ್ನಿ?" ಕರಿ ಯೆಹೋವನ ಹಿಜ್ಜಾ಼ ತರೀಪ್ಷ ಕರ‍್ಯುತೆಖ್ಹಾಜೆ, ಮೋಶೆ ಯೊ ಝ಼ಗೋನ ‘ಮಸ್ಸಾ’ ಕರೀಬಿ ಇವ್ಣೆ ಗಲಾಟ್ ಕರ‍್ಯುತೆಖ್ಹಾಜೆ ಇನ ‘ಮೆರೀಬಾ’ ಕರೀಬಿ ನಾಮ್ ಮ್ಹೇಲ್ಯೊ.

8 ಅಮಾಲೇಕ್ಯವಾಳು ರೆಫೀದೀಮಿಮ ಇಸ್ರಾಯೇಲ್‌ವಾಳನಿ ಜೋ಼ಡೆ ಜಂಗ್‌ಕರ‍್ಯು. 9 ತದೆ ಮೋಶೆನೆ ಯೆಹೋಶುವನ, "ತೂ ಅಪ್ಣ ಅದ್ಮಿಖ್ಹಾರಮ ಥೋಡಾನ ಚೂ಼ಣಿಲಿನ್ ಅಮಾಲೇಕ್ಯನವಾಳನ ಜೋ಼ಡೆ ಜಂಗ್ ಭೀಡ್‌ನು. ಮೇ ಕಾಲೆ ದೇವ್ನ ಲಠ್ಠಾನ ಹಾತ್ಮ ಧರಿಲಿನ್ ಮೇಂಡ್‌ನಪರ್ ಭೀರಿಶ್" ಕರಿ ಬೊಲ್ಯೊ. 10 ಮೋಶೆನ ಹುಕುಮ್‌ನಿ ಪರಕ್ಮ ಯೆಹೋಶುವನೆ ಅಮಾಲೇಕ್ಯವಾಳೇಥಿ ಜಂಗ್ ಕರ‍್ಯೊ. ಮೋಶೆಬಿ, ಆರೋನಬಿ ಅಜು಼ ಹೂರ ಇವ್ಣೆ ಮೇಂಡ್‌ನಪರ್ ಛ಼ಡಿಗಯ. 11 ಮೋಶೆನೆ ಇನ ಹಾತ್ನ ಉಪ್ಪರ್ ಪಾಡಖ್ಹತರ್ ಇಸ್ರಾಯೇಲ್‌ವಾಳು ತಾಖತಿಉಷೆ. ಯೊ ಇನ ಹಾತ್ನ ಉತಾರ‍್ಯೊತೊ ಅಮಾಲೇಕ್ಯವಾಳು ತಾಖತಿಉಷೆ. 12 ಮೋಶೆನ ಹಾತ್ ಶೋತಿಜಾ಼ವನಿ ವಖ್ಹತ್, ಆರೋನ ಅಜು಼ ಹೂರನೆ ಎಕ್ ಬಂಡಾನ ಲೈನ್‌ ಮ್ಹೇಲ್ಯೊ. ಮೋಶೆ ಇನ ಉಪ್ಪರ್ ಬೇಶಿಗಯೊ. ಆರೋನ ಎಕ್ ಬಾಜು಼ಮಾಬಿ, ಹೂರ ಬಿಜೇಕ್ ಬಾಜು಼ಮಾಬಿ ಭೀರಿನ್ ಮೋಶೆನ ಹಾತ್ನ ಪಾಡಿರಾಖನ ಮದತ್ ಕರ‍್ಯ. ಅಮ್ ಇನ ಹಾತ್‌ಖ್ಹಾರು ಚಾ಼ಂದ್ ಡುಬಾಲಗುಬಿ ಹೇಟ್ಉತಾರ‍್ಯಕೊಂತೆ ಥಾ. 13 ಯೆಹೋಶುವನೆ ಅಮಾಲೇಕ್ಯವಾಳನ ಅಜು಼ ಇವ್ಣ ಶಿಪಾಯ್‌ಖ್ಹಾರನ ತಲ್ವಾರ್‌ಥಿ ಹರಾಯೊ.

14 ತದೆ ಯೆಹೋವನೆ ಮೋಶೆನ, "ಇನ ಯಾದ್‌ನಖ್ಹಾಜೆಥಿ ಎಕ್ ದಪ್ತರ್‌ಮ ಲೀಖ್. ಇನ ಯೆಹೋಶುವನ ಖ್ಹಮ್‌ಜಾ಼ಡ್. ಶನಕತೊ ಮೇ ಅಮಾಲೇಕ್ಯವಾಳನು ಯಾದ್ ಧರ್ತಿಪರ್ ನಾರ‍್ಹೇವ್ಣುತೆ ಪೂರ ನಾಶ್‌ ಕರಿನಾಖುಸ್" ಕರಿಬೋಲ್ಯೊ. 15 ಯೊ ಝ಼ಗೋಮ ಮೋಶೆನೆ ಬಲಿಪೀಠ್ನ ಭಂದೈನ್ ಇನ "ಯೆಹೋವ ನಿಸ್ಸಿ"* ಕರಿನಾಮ್‌ ಮ್ಹೇಲ್ಯೊ. 16 ಶನಕತೊ, "ಯೆಹೋವನಿ ಸಿಂಹಾಸನ್ನಿ ಆಣೇಬಿ ಅಮಾಲೇಕ್ಯವಾಳನ ಉಪ್ಪರ್ ಯೆಹೋವನ ಮುಂಡಿನ್‌ಮುಂಡಿಮಾಬಿ ಜಂಗ್‌ರ‍್ಹಿಶೆ" ಕರಿ ಬೊಲ್ಯೊ.