1 ಮೋಶೆನೆ ಪಹಾಡ್‌ಪರ್‌ಥು ಉತ್ರಿ ಆವಾಮ ಧೇರ್‌ಹುವಾನು ದೇಖಿನ್, ಆರೋನಕನ ಎಕ್ಟು ಮಳಿನ್ ಅಯಿನ್ ಇನ, "ಉಟ್ ಹಮುನ ಅಗ್ಗಳ್ ಚ಼ಲೈಲಿನ್ ಜಾ಼ವನ ಹಮುನ ಎಕ್ ದೇವ್‌ಖ್ಹಾರು ಕರಿನ್‌ ದೇ ಶನಕತೊ ಈಜಿಪ್ಟ್ ದೇಖ್ಹ್‌ಥು ಹಮುನ ಬುಲೈಲಿನ್ ಆಯೊತೆ ಯೊ ಮೋಶೆ ಶಾತ್‌ಹುಯೊಕರಿ ಮಾಲುಮ್ ಕೊಯ್ನಿ" ಕರಿ ಬೋಲ್ಯು. 2 ಇನ ಆರೋನನೆ ಇವ್ಣುನ, "ತುಮಾರಿ ಬಾವ್ಣೆನು ಅಜು಼ ಛಿಯ್ಯಾ ಛೋ಼ರಿಯೇವ್ನ ಕಾನ್‌ಮ ಘಾಲಿರಾಖ್ಯುತೆ ಖ್ಹೊನ್ನಾನ ಕಾಪ್‌ನ ಛೋ಼ಡಿನ್ ಮನ ದೆವೊ" ಕರಿ ಬೊಲ್ಯೊ. 3 ಇಮ್ಮಸ್‌ ಇವ್ಣೆಖ್ಹಾರುಬಿ ಇವ್ಣ ಇವ್ಣ ಕಾನ್‌ಮ ಥೂತೆ ಖ್ಹೊನ್ನಾನ ಕಾಪ್‌ಅಖ್ಖಾನ ಛೋ಼ಡಿನ್ ಆರೋನನ ಲಯಿನ್ ದಿದು. 4 ಇನೆ ಯೊ ಖ್ಹೊನ್ನಾನ ಲೀನ್ ಜೈ಼ನ್ ಕೆಲ್ಡಾನಿ ಶಕಲ್‌ನ ಉಳಿಥಿ ರೂಪ್‌ದೀನ್ ಘಡಾಯೊ. ತದೆ ಇವ್ಣೆ "ಇಸ್ರಾಯೇಲ್‌ವಾಳವೊ ದೇಖೊ, ಆಸ್ ತುಮುನ ಈಜಿಪ್ಟ್ ದೇಖ್ಹ್‌ಥು ಬುಲೈಲೀನ್ ಆಯೋತೆ ದೇವ್" ಕರಿ ಬೋಲ್ಯು.

5 ಆರೋನನೆ ಇನ ದೇಖಿನ್ ಯೊ ಕೆಲ್ಡಾನ ಖ್ಹಾಮೆ ಎಕ್ ಚ಼ಾಚ಼ರ್‌ನ ಭಂದೈನ್,

"ಕಾಲೆ ಯೆಹೋವನ ಮರ‍್ಯಾದಿನಖ್ಹಾಜೆ ಜ಼ತ್ರಾಹೋಣು" ಕರಿ ಪ್ರಕಟ್‌ಕರ‍್ಯೊ. 6 ಇನಖ್ಹಾಜೇಥಿ ಬಿಜೇಕ್ ದನ್ನ ವ್ಹಾಣೆ ಅದ್ಮಿಖ್ಹಾರು ಉಠಿನ್ ಭುಂಜಾ಼ನಿ ಬಲಿನಾಬಿ ಸಮಾಧಾನ್ನಿ ಬಲಿನಾಬಿ ಅರ್ಪಣ್ ಕರ‍್ಯು. ಇನವಾರ್ ಅದ್ಮಿಖ್ಹಾರು ಖಾವನಾಬಿ ಪಿಯಾನಾಬಿ ಬೇಖ್ಹಿಗು. ಇನಪಾರ್ ಉಠಿನ್ ಖೇಲ್‌ಕೂದ್ ಅಜು಼ ಮಜಾ಼ ಕರ‍್ಯು. 7 ಅಮ್‍ರ‍್ಹಾವಮ ಯೆಹೋವನೆ ಮೋಶೆನ, "ತೂ ಪಹಾಡ್‌ಪರ್‌ಥು ಉತ್ರಿನ್ ಜಾ಼ ಈಜಿಪ್ಟ್ ದೇಖ್ಹ್‌ಥು ತೂ ಬುಲೈಲಿನ್ ಆಯೋತೆ ತಾರು ಅದ್ಮಿಖ್ಹಾರು ಪಾಪ್‌ಕರೀನ್‌ ಬಿಗ್‌ಡಿಗಯು. 8 ಮೇ ಇವ್ಣುನ ಹುಕುಮ್‌ ಕರ‍್ಯೊತೆ ಮಾರಗ್‌ನ ಇವ್ಣೆ ಒಗ್ಗಿಸ್ ಮೆಂಧಿನ್ ಜೈ಼ನ್ ಇವ್ಣುನ ಘಡಾಯಹುಯ ಖ್ಹೊನ್ನಾನ ಕೆಲ್ಡಾನ ಕರೈನ್ ಇನ ಆಡ್‍ಪಡಿನ್ ಬಲಿನ ಸಮರ್ಪಣ್‌ಕರಿನ್, ‘ಇಸ್ರಾಯೇಲ್‌ವಾಳವೊ ದೇಖೊ ಆಸ್ ತುಮುನ ಈಜಿಪ್ಟ್ ದೇಖ್ಹ್‌ಥು ಬುಲೈಲಿನ್ ಆಯೊತೆ ದೇವ್‌ಕರಿ ಬೋಲಿಲೆವ್‌ಕರಸ್‌" ಕರಿ ಬೊಲ್ಯೊ. 9 ಆನಾಹುಯಿನ್ ಯೆಹೋವನೆ ಮೋಶೆನ, "ಆ ಅದ್ಮಿವ್‌ನ ಸ್ವಭಾವ್‌ನ ದೇಖಿನ್‌, ಆ ಅದ್ಮಿಖ್ಹಾರು ಕೆತ್ರೆ ಮೊಂಡ್‌ ಬುದ್ದಿವಾಳು ಹುಯಿರ‍್ಹುಸ್ ಕರಿ ಮನ ಮಾಲುಮ್‌ ಹುಯಿರ‍್ಹುಸ್. 10 ಇನಖ್ಹಾಜೆ ತೂ ಮನ ಥಮಾವ್‌ನಕೊ. ಮಾರಿ ಖೀಜ಼್‌ನಿ ಆಗ್ ಲಾಗಾದೆ, ಇವ್ಣುನ ನಾಶ್‌ಕರಿನಾಖುಸ್. ಇನವಾರ್ ತಾರೆಥೀಸ್ ಎಕ್ ಮೋಟಿ ಪಿಳ್ಗಿನ ಬಣೈಷ್" ಕರಿ ಬೊಲ್ಯೊ. 11 ತದೆ ಮೋಶೆ ಇನೊ ದೇವ್ ಯೆಹೋವನ ಗಿಂಗೈನ್, "ಯೆಹೋವದೇವ್ ತೂ ಮಹಾನ್ ಶಕಥ್ಥಿಬಿ, ಭುಜ಼್‌ನಿ ತಾಖಥ್ಥಿಬಿ ಈಜಿಪ್ಟ್ ದೇಖ್ಹ್‌ಥು ಭಾರ್‌ ಬುಲೈಲಿನ್ ಆಯೋತೆ ತಾರ ಪ್ರಜೆಪರ್ ಖೀಜ಼್‌ಥಿ ತೂ ಖೀಜ಼್‌ಕರೆಜಾ಼ಯ್‌ ಕಿಶು?

12 ಈಜಿಪ್ಟ್‌ವಾಳು ತಾರಿ ಬಾರೇಮ, ‘ಯೆಹೋವ ಕೇಡ್ ಕರ‍್ನುಕರಿ ಖ್ಹೂಜ಼್‌ಥೀಸ್ ಇಸ್ರಾಯೇಲ್‌ವಾಳನ ಹಜ್ಜಾ಼ಥು ಬುಲೈಲಿನ್ ಗಯೋನಿ. ಇವ್ಣುನ ಪಹಾಡ್‌ಮ ಮಾರಿನಾಖನಬಿ ಧರ್ತಿಥು ಕಾಡಿನಾಖನಖ್ಹಾಜೆಬಿ ಇವ್ಣುನ ಬುಲೈಲಿನ್ ಗಯೊಕರಿ ಬೊಲೈಲಾವನು ಶನ?’ ತೂ ಇರಾದನ ಮೆಂಧಿನ್ ತಾರ ಪ್ರಜೆನ ಕೇಡ್ ನಾಕರ‍್ನುತೆ ದಿಲ್ನ ಫರೈಲೆ. 13 ತಾರ ಸೇವಕ್ ಹುಯಿರ‍್ಹಾತೆ ಅಬ್ರಹಾಮ್, ಇಸಾಕ್ ಅಜು಼ ಯಕೋಬ್ ಇವ್ಣುನ ಯಾದ್ಮ ಲ್ಯಾವ್. ತೂ ತಾರ ಜಾನ್‌ಪರ್ ಆಣ್ ಕರಿನ್ ಇವ್ಣುನ, ‘ಮೆ ತುಮಾರಿ ಪಿಳ್ಗಿನ ಭಡೈನ್ ಆಬ್ ಶುಕ್ಕರ್‌ಯೆತ್ರು ಗಣ್ತಿಕೊಂತೆ ಆ ತಬರ್‌ಖಾವ್ನ ತುಮಾರಿ ಪಿಳ್ಗಿವಾಳನ ದಿಶ್‌ಕರಿಬಿ ಇಸ್ರಾಯೇಲ್‌ವಾಳು ಆ ದೇಖ್ಹ್‌ನ ಹಮೇಶಾಥಿ ಇವ್ಣಿ ಕಬ್‌ಜಾ಼ಮ ಕರಿಲಿಶೆ ಕರಿಬಿ ಜಿಭಾನ್ ದಿದೊಕೊಯ್ನಿಕಿಶು" ಕರಿ ಬೊಲ್ಯೊ. 14 ತದೆ ಯೆಹೋವನೆ ಇನಿ ಪ್ರಜೆನ ಕರೀಶ್‌ಕರಿ ಇನೆ ಬೋಲ್ಯೊತೆ ಕೇಡ್‌ನಿ ಬಾರೇಮ ಮನ್ ಫರೈಲಿದೊ. 15 ಯೊ ಹುಕುಮ್‌ನ ಬೇ ಖೊಡ್‍ಶನ ಪಲ್ಗಾವ್‌ನ ಮೋಶೆನೆ ಹಾತ್‌ಮ ಧರಿಲಿನ್ ಪಹಾಡ್‌ಪರ್‌ಥೊ ಉತ್ರಿನ್ ಆಯೊ. ಯೊ ಪಲ್ಗಾವ್‌ನ ಭೇಬಾಜು಼ಬಿ ಒಪಂದಾನಖ್ಹಾರು ಲೀಖೈರ‍್ಹುಥು. 16 ಯೊ ಖೊಡ್‍ಶನ ಪಲ್ಗುಅಖ್ಖು ದೇವ್ನು ಕಾಮಸ್ ಹುಯಿರ‍್ಹಿನ್ ಯೊ ಲಿಖ್ಯುಅಖ್ಖು ದೇವ್ನೆಸ್ ಲೀಖಿಹುಯು ಹುಯಿರ‍್ಹುಥು. 17 ಇಸ್ರಾಯೇಲ್‌ವಾಳು ಖುಷಿಥಿ ಚಿಕ್ರಾಣ್ ಮಾರುಕರಾನು ಯೆಹೋಶುವನೆ ಖ್ಹಮ್‌ಜಿನ್, "ಇಟಾರಭಣಿಥು ಜಂಗ್‌ನೊ ಅವಾಜ಼್‌ ಖ್ಹಮಜ಼್ ಪಡುಕರಸ್"ಕರಿ ಮೋಶೆನ ಬೊಲ್ಯೊ.

18 ಇನ ಮೋಶೆನೆ, "ಮನ ಖ್ಹಮಜ಼್ ಪಡುಕರಸ್ತೆ ಜೂತಾನು ಅವಾಜ಼್‌ಬಿ ಕಾಹೆ, ಜಯಕಾರ್‌ನು ಗೀದ್‌ಬಿ ಕಾಹೆ ಹರಿಜಾ಼ವಳಾನಿ ಅವಾಜ಼್‌ನು ಗೀದ್‌ಬಿ ಕಾಹೆ, ಗೀದ್‌ ಬೋಲವಾಳನು ಖುಷಿನು ಗಳುಸ್ ಹುಯಿರ‍್ಹುಸ್" ಕರಿ ಬೊಲ್ಯೊ. 19 ಮೋಶೆನೆ ಇಟಾರಮ್‌ನ ಖನ್ನೆ ಅಯಿನ್ ಯೊ ಕೆಲ್ಡಾನಬಿ ಅಜು಼ ಅದ್ಮಿಯೇವ್ನು ಖೇಲಾನುಬಿ ದೇಖಖ್ಹತರ್ ಘಣು ಖೀಜ಼್‌ಖೈನ್ ಹಾತ್‌ಮ ಥೂತೆ ಖೊಡ್‍ಶನ ಪಲ್ಗಾವ್ನ ಪಹಡ್‌ನಿ ಝೋ಼ಕ್‌ಮ ಭಿರ್‌ಕೈನ್ ಫೋಡಿನಾಖ್ಯೊ. 20 ಅದ್ಮಿಯೆವ್‌ನೆ ಕರೈರಾಖ್ಯುಥುತೆ ಕೆಲ್ಡಾನ ಇನೆ ಆಗ್‌ಥಿ ಬಾಳಿನ್ ವಾಟಿನ್ ಪುಡಿ-ಪುಡಿ ಕರಿನ್ ಪಾಣಿಮ ಕಲೈನ್ ಇಸ್ರಾಯೇಲ್‌ವಾಳನ ಯೊ ಪಾಣಿನ ಪಿಡಾಯೊ. 21 ತದೆ ಮೋಶೆನೆ ಆರೋನ್ನ, "ತೂ ಆ ಅದ್ಮಿಯೇವ್‌ಥಿ ಮೋಟಿ ಅಪರಾದ್ನ ಕರೈನಾಖ್ಯೊನಿ ಅಮ್ ಕರಾವನ ಅವ್ಣೆ ತುನ ಶಾತ್‌ಕರ‍್ಯು?" ಕರಿ ಫುಚಾ಼ವಮ, 22 ಆರೋನನೆ, ಯಜಕ್ ಇರಾದೊ ನಕೊಕರ್. ಆ ಅದ್ಮಿಖ್ಹಾರು ಕೆಥ್ರಾನು ಖರಾಬ್ ಸ್ವಭಾವ್‌ನುಕರಿ ತುನಾಸ್ ಮಾಲುಮ್ ಛಾ಼. 23 ಇವ್ಣೆ ಮಾರಕನ ಅಯಿನ್, ‘ಹಮುನ ಅಗ್ಗಳ್ ಚ಼ಲೈಲಿನ್ ಜಾ಼ವನ ಎಕ್ ದೇವ್ನ ಕರೈನ್‌ದೆ, ಈಜಿಪ್ಟ್ ದೇಖ್ಹ್‌ಥು ಹಮುನ ಬುಲೈಲಿನ್ ಆಯೊತೆ ಮೋಶೆನ ಶಾತ್‌ಹುಯುಕಿ ಮಾಲುಮ್ ಕೊಯ್ನಿ’ ಕರಿ ಬೋಲ್ಯು. 24 ಇನಖ್ಹಾಜೆ ಮೇ ‘ಕಿನಾಕನ ಖ್ಹೊನ್ನಾನು ಘೇಣು ಛಾ಼ಕಿ ಇವ್ಣೆಖ್ಹಾರುಬಿ ಇನ ಛೋ಼ಡಿನ್ ಮನ ದೇವ್ಣುಕರಿ’ ಕರಿ ಬೊಲ್ಯೊ. ಇವ್ಣೆ ಇಮ್ಮಸ್ ದ್ಯವಾನಿವಖ್ಹ್‌ತೆ ಮೇ ಯೊ ಖ್ಹೊನ್ನಾನ ಆಗ್‌ಮ ನಾಖಖ್ಹತರ್ ಯೊ ಕೆಲ್ಡಾನಿ ರೂಪ್ ಹುಯು" ಕರಿ ಬೊಲ್ಯೊ.

25 ಮೋಶೆನೆ ಅದ್ಮಿಖ್ಹಾರು ಹದ್‌ಮಿರಿನ್ ಆವಸ್ತೆತಿಮ್ ಕರಾನಖ್ಹಾಜೆ ಆರೋನನೆ ಇವ್ಣುನ ಛು಼ಟು ಮ್ಹೇಲ್ಯೊತೆಖ್ಹಾಜೆ ಇನು ವಹೇರ‍್ಯುಖ್ಹಾರು ನಕ್ಲೆ ಕಾಡನಿಘೋಣಿ ಹುಯು. 26 ಇವ್ಣೆ ತರಿಖ ಕೊಂತೆ ಇವ್ಣಿ ಮರ್ಜಿನಿಘೋಣಿ ಚಾ಼ಲನು ಮೋಶೆ ದೇಖಿನ್ ಇಟಾರಮ್‌ನ ಬಾಕಲ್‍ಕನ ಭೀರಿನ್, "ಯೆಹೋವ ಭಣಿವಾಳು ಮಾರಕನ ಆವ್ಣು" ಕರಿ ಬೊಲ್ಯೊ. ತದೆ ಲೇವಿನ ಖೂಮ್‌ವಾಳು ಖ್ಹಾರುಬಿ ಇನಕನ ಮಳಿನ್‌ ಆಯು. 27 ಮೋಶೆನೆ ಇವ್ಣುನ, "ಇಸ್ರಾಯೇಲ್‌ವಾಳನು ದೇವ್‌ಹುಯಿರ‍್ಹೊತೆ ಯೆಹೋವ ಹುಕುಮ್‌ಕರಾನು ಶಾತ್‌ಕತೊ, ‘ತುಮಾರಮ ಹರೇಕ್‌ಜ಼ಣೊಬಿ ತಲ್ವಾರ್‌ನ ಕಂಬರ್‌ನ ಭಾಂದಿಲಿನ್ ಇಟಾರಮ್‌ನ ಬೀಚ್ಮ ಎಕ್ ಬಾಕಲ್‌ಥು ಬಿಜೇಕ್ ಬಾಕಲ್‌ಲಗುಬಿ ಜಾ಼ತು ಆವ್ತು, ಇವ್ಣ ಇವ್ಣ ಭಯ್ಯೆ, ದೋಸ್ತಿ ಅಜು಼ ಖನ್ನೆವಾಳೊ ಕರಿ ಖ್ಹಾಯ್‌ ನಾಕರ‍್ನುತೆ ಅದ್ಮಿಯೇವ್ನ ಸಂಹಾರ್ ಕರ‍್ನು" ಕರಿ ಬೊಲ್ಯೊ. 28 ಲೇವಿನು ಖೂಮ್‌ವಾಳು ಮೋಶೆನಿ ಹುಕುಮ್‌ನಿ ಪರಕಸ್ ಕರ‍್ಯು. ಯೊ ದನ್ಮ ಕಮ್‌ಶಿ ಕಮ್ ತೀನ್ ಹಜಾ಼ರ್‌ಜ಼ಣು ಮರೈಗು. 29 ಮೋಶೆನೆ ಲೇವಿವಾಳನ, "ಆ ವಖ್ಹತ್ ತುಮಾರಮ ಹರೇಕ್‌ಜ಼ಣೊಬಿ ಛಿಯ್ಯೊ ರ‍್ಹಯುತೋಬಿ ಭಯ್ಯೆ ರ‍್ಹಯುತೋಬಿ ಖ್ಹಾಯ್ ನಾಕರ‍್ನುತೆ ತುಮುನ ಯೆಹೋವನಿ ಸೇವೆನ ನೇಮಕ್ ಕರಿಲೆವೊ. ಇನಖ್ಹಾಜೇಥಿ ಇನೆ ಆ ದನ್ ತುಮುನ ವಾರ್ಖ್ಹೊ ದಿಶೆ" ಕರಿ ಬೊಲ್ಯೊ.

30 ಅಜೇಕ್ ದನ್ಮ ಮೋಶೆನೆ ಅದ್ಮಿನ, "ತುಮೆ ಮೊಟು ಪಾಪ್ ಕರಿರಾಖ್ಯಸ್. ರ‍್ಹಿಯುತೋಬಿ ಮೆ ಪಹಾಡ್‌ನ ಛ಼ಡಿನ್ ಯೆಹೋವನಿ ಮ್ಹೋರೆ ಜೈ಼ಶ್. ಎಕ್ ವಖ್ಹತ್ ತುಮೆ ಕರ‍್ಯಾತೆ ಪಾಪ್ನಕಾಮ್ನ ಮಾಫಿ ಮೇ ಮಾಂಗೆಜಾ಼ಯ್‌ಕಿಶುಕಿ" ಕರಿ ಬೊಲ್ಯೊ. 31 ತದೆ ಮೋಶೆ ಯೆಹೋವಕನ ಪಾಛೊ಼ ಜೈ಼ನ್, "ಅಯ್ಯೊ ಆ ಅದ್ಮಿಖ್ಹಾರು ಮೊಟು ಪಾಪ್ ಕರಿರಾಖ್ಯುಸ್. ಖ್ಹೊನ್ನಾನು ಕೆಲ್ಡಾನ ಕರಿನ್ ದೇವ್‌ಕರಿ ಲಹಿರಾಖ್ಯುಸ್. 32 ಕತೋಬಿ ತೂ ಗೋರ್‌ಕರಿನ್ ಇವ್ಣಿ ಪಾಪ್ನ ಮಾಫಿಕರ‍್ನು. ನಾರ‍್ಹಯುತೊ ತುನೆ ಲೀಖಿರಾಖ್ಯೊತೆ ಜಿವ್ತಜಾನ್ನು ಪುಸ್ತಕಥು ಮಾರ ನಾಮ್ನಬಿ ನೂಛಿನಾಕ್ಣು ಕರಿ ಬೋಲುಕರುಸ್" ಕರಿ ಪ್ರಾರ್ಥನೆ ಕರ‍್ಯೊ. 33 ಇನ ಯೆಹೋವನೆ ಮೋಶೆನ, "ಕೋಣ್ ಮಾರಿ ವಾತ್ನ ಮೀರಿನ್ ಪಾಪ್‌ಕರ‍್ಯುಕಿ ಇವ್ಣ ನಾಮ್ನಾಸ್ ಮಾರಕನ್ ಛಾ಼ತೆ ಪುಸ್ತಕ್‌ಥು ಮೇ ನೂಛಿನಾಖಿಷ್. 34 ತೂ ಹಜ್ಜಾ಼ಥು ನಿಕ್ಳಿನ್ ಮೇ ತುನ ಬೋಲ್ಯೊತೆ ದೇಖ್ಹ್‌ನ ಆ ಅದ್ಮಿಯೇವ್ನ ಚ಼ಲೈಲಿನ್ ಜಾ಼. ದೇಕ್, ಮಾರೊ ದೂತ ತುನ ಖ್ಹಾಮೆ ಅಗ್ಗಳ್ ಚ಼ಲಾವ್‌ಷೆ, ಕತೋಬಿ ಮಾರು ನ್ಯಾವ್ನ ತೀರ್ಪ್‌ನ ದನ್ಮ ಮೇ ಇವ್ಣ ಪಾಪ್ನ ಬರೊಬರ್‌ಥೀಸ್‌ ಇವ್ಣುನ ನಿಶತ್ ದಿಶ್."

35 ಇಸ್ರಾಯೇಲ್‌ವಾಳು ಆರೋನನ ಹಾಥ್ಥಿ ಯೊ ಖ್ಹೊನ್ನಾನು ಕೆಲ್ಡಾನ ಬಣಾಯೊತೆಖ್ಹಾಜೆ ಯೆಹೋವನೆ ಇವ್ಣುನ ನಿಶತ್ ದಿದೊ.