1 ದೇವ್ನೆ ಮೋಶೆನಾಬಿ ಇನ ಅದ್ಮಿಹುಯಿರ‍್ಹಾತೆ ಇಸ್ರಾಯೇಲ್‌ವಾಳನಬಿ ಮಹಾನ್ ಮದತ್ನ ಕರ‍್ಯೊತೆಯಿನಬಿ, ಯೆಹೋವನೆ ಇಸ್ರಾಯೇಲ್‌ವಾಳನ ಈಜಿಪ್ಟ್ ದೇಖ್ಹ್‌ಥು ಬುಲೈಲಿನ್ ಆಯೊತೇಬಿ, ಮಿದ್ಯಾನ್‌ವಾಳನು ಯಾಜಕಬಿ ಮೋಶೆನೊ ಮಾಮಾಬಿ ಹುಯಿರ‍್ಹೊಥೋತೆ ಇತ್ರೋವನೆ ಖ್ಹಮ್‌ಜಾ಼ಡ್ಯೊ. 2 ತದೆ ಮೋಶೆನೊ ಮಾಮ ಇತ್ರೋವನೆ ಇನಕನ ಮೋಕ್ಲಿರಾಖ್ಯೊಥೋತೆ ಮೋಶೆನಿ ಬಾವಣ್ ಚಿಪ್ಪೋರನಬಿ, ಇನ ಬೇ ಪರ್ಖ್ಹಾ ಲಡ್ಕಾನಬಿ ಬುಲೈಲಿನ್ ಆಯೊ. 3 ಯೊ ಬೇ ಛಿಯ್ಯಾವ್ಮ ಏಕ್‌ಜ಼ಣಾನ "ಗೇರ್ಷೋಮ್" ಕರಿ ನಾಮ್ ಮ್ಹೇಲ್ಯೊ. ಶನಕತೊ ಮೋಶೆನೆ, "ಮೇ ಭಾರ್‌ ದೇಖ್ಹ್‌ವಾಳೊ ಹುಯಿರ‍್ಹೊಸ್" ಕರಿ ಬೊಲ್ಯೊ. 4 ಇನ ಬಿಜೇಕ್ ಛಿಯ್ಯಾನ ಮೋಶೆನೆ, "ಮಾರೊ ಬಾನೊ ದೇವ್ ಮನ ಮದತ್‌ವಾಳೊಹುಯಿನ್ ಮನ ಫರೋಹನಿ ತಲ್ವಾರ್‌ಥಿ ಛು಼ಕೈನ್ ಬಚಾ಼ಡ್ಯೊ" ಕರಿ ಬೋಲಿನ್, ಯೊ ಛಿಯ್ಯಾನ "ಎಲೀಯೆಜೆರ್"ಕರಿ ನಾಮ್ ಮ್ಹೇಲ್ಯೊ. 5 ಮೋಶೆನೊ ಮಾಮ ಹುಯಿರ‍್ಹೋತೆ ಇತ್ರೋವಾನೆ ಮೋಶೆನ ಲಡ್ಕಾವ್ನಬಿ ಬಾವಣ್ಣಾಬಿ ಬುಲೈಲಿನ್ ಜ಼ಂಗಳ್‌ಮ ದೇವ್ನ ಪಹಾಡ್‌ಕನ ಉತ್ರಿರ‍್ಹೊಥೋತೆ ಮೋಶೆಕನ ಆಯೊ. 6 ಇನೆ ಮೋಶೆನ, "ತಾರೊ ಮಾಮ ಇತ್ರೋವ ಹುಯಿರೋತೆ ಮೇ ತಾರಿ ಬಾವಣ್ಣ, ತಾರ ಭೇ ಛಿಯ್ಯಾನ ಬುಲೈಲಿನ್ ತಾರಕನ ಐರ‍್ಹೋಸ್" ಕರಿ ಬೋಲಿನ್ ಮೋಕ್‌ಲ್ಯೊ. 7 ಮೋಶೆನೆ ಇನ ಮಾಮಾನ ಮಳಾನ ನಿಕ್ಳಿನ್ ಇನ ಖ್ಹಲಾಮ್‌ಕರಿನ್ ಬುಚ಼್ಚಕರ‍್ಯೊ. ಇವ್ಣೆ ಎಕ್‌ಥಿಏಕ್ ಅಛ್ಛೊ ರ‍್ಹವಾನು ನಾರ‍್ಹವಾನು ಪುಛಾವನ ಪಾರ್ ಡೇರಾನ ಮಹಿ ಗಯ. 8 ಇನವಾರ್ ಮೋಶೆನೆ ಯೆಹೋವನೆ ಇಸ್ರಾಯೇಲ್‌ವಾಳ ಭಣೀಥು ಫರೋಹನಾಬಿ, ಈಜಿಪ್ಟ್‌ವಾಳನಾಬಿ ಕರ‍್ಯೊತೆಅಖ್ಖಾಸ್ನಬಿ, ವಾಟ್ಮ ಇವ್ಣುನ ಹುಯುತೆ ಅಖ್ಖೀಸ್ ವದೇಖ್ಹ್‌ನಾಬಿ, ಯೆಹೋವನೆ ಯೊ ವದೇಖ್ಹ್‌ಥು ಛು಼ಕಾಯೊತೆನಬಿ ಇನ ಮಾಮಾನ ಬೋಲಿವತಾಳ್ಯೊ. 9 ಯೆಹೋವನೆ ಈಜಿಪ್ಟ್‌ವಾಳನ ಹಾತೇಖ್ಹು ಇಸ್ರಾಯೇಲ್‌ವಾಳನ ಛೋ಼ಡೈನ್ ಇವ್ಣುನ ಮದತ್ ಕರ‍್ಯೊತೆಖ್ಹಾಜೆ ಇತ್ರೋವನೆ ಖುಷಿಕರ‍್ಯೊ. 10 ಇತ್ರೋವನೆ, "ಈಜಿಪ್ಟ್‌ವಾಳನ ಹಾತೇಖ್ಹುಬಿ, ಫರೋಹನ ಹಾತೇಖ್ಹುಬಿ ತುಮುನ ಛುಟ್ಕಾರ್ ಕರ‍್ಯೊತೆ ಯೆಹೋವನ ಧನ್ಯವಾದ್‌ ಹುವಾದೆ! ಇನ ಅದ್ಮಿನ ಈಜಿಪ್ಟ್‌ಮ ಗುಲಾಮ್‌ನ ಕಾಮ್‍ಥಿ ಛೋಡಾಯೋತೆ ಯೆಹೋವನ ಧನ್ಯವಾದ್‌! 11 ಯೆಹೋವನೆ ಇನ ಅದ್ಮಿಖ್ಹಾರನ ಇವ್ಣ ಹಾತೇಥಿ ಛೋ಼ಡೈನ್, ಯೊ ಈಜಿಪ್ಟ್‌ವಾಳು ಖಿವಿ ಬಾರೇಮ ಹಂಕಾರ್ ಕರುಕರ್ಥುಥೂಕಿ, ಯೊ ವಿಚಾರ್‌ಮ ಇವ್ಣುನ ಹೇಟುಕರ‍್ಯೊತೆ ಇನಖ್ಹಾಜೆ ಯೆಹೋವ ಅಖ್ಖಾಸ್ ದೇವ್‍ಥೀಬಿ ಮೋಟೊಕರಿ ಹಮ್ಕೆ ಮಾಲುಮ್ ಕರಿರಾಖ್ಯೊಸ್" ಕರಿ ಬೊಲ್ಯೊ. 12 ಆಸ್‌ಕಾಹೆತೆ ಮೋಶೆನೊ ಮಾಮ ಹುಯಿರ‍್ಹೋತೆ ಇತ್ರೋವನೆ ದೇವ್ನ ಅಖ್ಖಾಸ್ ಶರೀರ್‌ನಿ ಬಲಿನ ಸಮರ್ಪಣ್‌ ಕರ‍್ಯೊ. ಆರೋನಬಿ, ಇಸ್ರಾಯೇಲ್‌ವಾಳನು ಶಾಣುಖ್ಹಾರುಬಿ ಇನ ಜೋ಼ಡೆ ದೇವ್ನಿ ಝ಼ಗೋಮ ಖಾಣುಖಾವಾನ ಆಯ.

13 ಇನ ವ್ಹಾಣೆ ಮೋಶೆ ಅದ್ಮಿವ್‌ನ ನ್ಯಾವ್‌ ಫೇಡಾವನಖ್ಹಾಜೆ ಬೆಠೊರ‍್ಹವಾಮ ವ್ಹಾಣ್‌ಖ್ಹತ್ರೇಥು ಖ್ಹಾಂಜ್‌ಲಗುಬಿ ಅದ್ಮಿಖ್ಹಾರು ಇನ ಖನ್ನೆ ಭಿಯೂಥು. 14 ಮೋಶೆನೆ ಅದ್ಮಿವ್‌ನಖ್ಹಾಜೆ ಕರುಕರಾತೆ ಅಖ್ಖಾನ ಇನೊ ಮಾಮ ದೇಖಿನ್ ಇನ, "ತೂ ಶನ ಅದ್ಮಿವ್‌ನಖ್ಹಾಜೆ ಅತ್ರು ಮ್ಹಿನತ್ ಕರುಕರಸ್? ವ್ಹಾಣೇಥಿ ಖ್ಹಾಂಜ಼್‌ಲಗು ತೂ ಎಕ್ಕಸ್‌ಜ಼ಣೊ ನ್ಯಾವ್ ಫೇಡಾವನ ಭೀರೆವ್ಣುಕಿಶು?" ಕರಿ ಬೊಲ್ಯೊ. 15 ಮೋಶೆ ಇನ ಮಾಮಾನ, "ದೇವ್ನಿ ತೀರ್ಪ್‌ನ ಮಾಲುಮ್ ಕರಿಲ್ಯಾವನಖ್ಹಾಜೆ ಅದ್ಮಿಖ್ಹಾರು ಮಾರಕನ ಆವಸ್. 16 ಇಮ್ಮಸ್ ಇವ್ಣಾಮ ಝ಼ಗ್ಡೊಕಾಯ್‌ತೋಬಿ ಹುಯಿರ‍್ಹುತೊ ಮಾರಕನ ಆವಸ್. ಮೇ ವಿಚಾರ್‌ಕರಿನ್ ಇವ್ಣುನ ನ್ಯಾವ್ ಫೇಡೈನ್ ದೇವ್ನಿ ಹುಕುಮ್‌ನಿ ನಿಯಮ್ನ ಭೋದನ್ ಕರುಸ್" ಕರಿ ಬೊಲ್ಯೊ. 17 ಇನ ಖ್ಹಮ್‌ಜೊತೆ ಮೋಶೆನ ಮಾಮಾನೆ ಇನ, "ತೂ ಕರುಕರಾತೆ ಕಾಮ್ನುಪರಕ್ ಬರೋಬರ್ ಕೊಯ್ನಿ. 18 ಆ ಕಾಮ್ ಘಣು ವದೇಖ್ಹ್‌ನು. ತಾರ ಎಕ್ಕಸ್‌ಜ಼ಣಾಥಿ ಇನ ಚ಼ಲಾವನ ಕೊಹೊಯ್ನಿ. ತೂ ತಾರ ಜೋ಼ಡೆ ಛಾ಼ತೆ ಆ ಅದ್ಮಿಖ್ಹಾರುಬಿ ಖ್ಹಚೆಂಬಿ ಖ್ಹತಿಜಾಶು. 19 ಮಾರಿ ವಾತೆನ ಖ್ಹಮಜ಼್, ಮೇ ತುನ ಎಕ್ ಖ್ಹೂಜ಼್‌ನ ಬೋಲುಸ್ ಅಜು಼ ದೇವ್ ತಾರಿ ಜೋ಼ಡೆ ರ‍್ಹವಾದೆ. ತೂ ಅದ್ಮಿವ್‌ನಾಬಿ, ದೇವ್‍ನಾಬಿ ಬೀಚ್‌ವಾಳೊ ಹುಯಿರ‍್ಹಿನ್ ಅದ್ಮಿವ್‌ನ ಝ಼ಗ್ಡಾವ್ನ ದೇವ್‌ಕನ ಲೀನ್ ಆವ್ಣು. 20 ತೂ ದೇವ್ನಿ ಹುಕುಮ್‌ನಿ ನಿಯಮ್ನ ಭೋದನ್ ಕರಿನ್, ಇವ್ಣೆ ಚಾ಼ಲ್ನುತೆ ಮಾರಗ್‌ನಬಿ, ಕರ್ನುತೆ ಕಾಮ್‌ಅಖ್ಖುಬಿ ಇವ್ಣುನ ಖ್ಹಮ್‌ಜಾ಼ಡ್‌ನು. 21 ಕತೋಬಿ ತೂ ತಮಾಮ್‌ ಅದ್ಮಿವ್‌ನ ಮಹಿ ತಾಖತ್‌ವಾಳುಬಿ, ದೇವ್ನಭಕ್ತರ್‌ಬಿ, ವಿಶ್ವಾಸ್‌ವಾಳುಬಿ, ಲಂಚ ನಾಛೀಮವಾಳುಬಿ ಹುಯಿರ‍್ಹುಸ್ತೆ ಪರ್ಖ್ಹಾವ್‌ನ ಚೂ಼ಣಿಲಿನ್ ಇವ್ಣುನ ಹಜಾ಼ರ್ ಜ಼ಣಾನ ಉಪ್ಪರ್‌ಬಿ, ಖ್ಹೊ ಜ಼ಣಾಪರ್‌ಬಿ, ಅಢೈಖ್ಹ್ ಜ಼ಣಾಪರ್‌ಬಿ ಅಜು಼ ದಖ್ಹ್‌ ಜ಼ಣಾಪರ್‌ಬಿ ಅದಿಕಾರಿಕರಿನ್ ನೇಮಕ್‌ ಕರ‍್ನು. 22 ಇವ್ಣೇಸ್ ಕೆದೇಬಿ ಅದ್ಮಿವ್‌ನ ನ್ಯಾವ್‌ನ ಫೇಡಾವದೆ. ಇವ್ಣೆ ಮೋಟ ಝ಼ಗ್ಡಾನ ತಾರ ಖ್ಹಾಮ್ಣೆ ಲ್ಯವಾದೆ.ನ್ಹಾನು ಝ಼ಗ್ಡಾವ್ನ ಇವ್ಣೇಸ್ ಫೇಡೈಲಾವದೆ. ಇವ್ಣೆ ತಾರೇಥಿ ಆ ವಜ಼ನ್ನ ಪಾಡಾಥಿ ತುನ ಶುಲ್ಬಉಷೆ. 23 ದೇವ್ ತುನ ಅಮ್‌ಕರಾನ ಹುಕುಮ್ ದಿದೋತೊ, ತೂ ಆ ಕಾಮ್ನ ಜಿಮೆದಾರ್‌ನ ಪಾಡಾನು ಉಷೆ. ಆಸ್ ಖಲಿಕಾಹೆತೆ ಆ ಅದ್ಮಿಖ್ಹಾರುಬಿ ಖುಶಾಲಿಥಿ ಇವ್ಣ ಇವ್ಣ ಘರ್‌ನ ಜಾಷೆ" ಕರಿ ಬೊಲ್ಯೊ.

24 ಮೋಶೆ ಇನ ಮಾಮಾನಿ ವಾತೇನ ಮಾನಿನ್ ಇನೆ ಬೋಲ್ಯೊತೆ ತಿಮ್ಮಸ್ ಖ್ಹಾರು ಕರ‍್ಯೊ. 25 ಮೋಶೆನೆ ಇಸ್ರಾಯೇಲ್‌ವಾಳಮ ತಾಖತಿವ್ನ ಚೂ಼ಣಿಲಿನ್ ಹಜಾ಼ರ್ ಜ಼ಣಾಪರ್‌ಬಿ, ಖ್ಹೊ ಜ಼ಣಾಪರ್‌ಬಿ, ಅಢೈಖ್ಹ್ ಜ಼ಣಾಪರ್‌ಬಿ, ದಖ್ಹ್‌ ಜ಼ಣಾಪರ್‌ಬಿ ಅದಿಕಾರಿಕರಿನ್ ನೇಮಕ್ ಕರ‍್ಯೊ. 26 ಅವ್ಣೆ ಕದೇಬಿ ನ್ಯಾವ್‌ಫೇಡಾವವಾಳು ಹುಯಿನ್ ಕಠಣ್ ಝ಼ಗ್ಡಾವ್ನ ಮೋಶೆಕನ ಲೀನ್ ಆವ್ತುಹುಯಿನ್, ಶುಲ್‌ಬಾನ ಝ಼ಗ್ಡಾನ ಇವ್ಣೇಸ್ ಫೇಡಾವ್‌ತು ಆಯು. 27 ಇನವಾರ್ ಮೋಶೆ ಇನ ಮಾಮಾನ ಜ಼ೈನ್‌ಆವ್‌ಕರಿ ಬೋಲಖ್ಹತರ್, ಯೊ ಇನ ಶೊಂತ್‌ ಮುಲಕ್‌ಮ ನಿಕ್ಳಿಗಯೊ.