1 ಮನ ಯಾಜಕನು ಸೇವೆ ಕರಾನ ತೂ ತಾರ ಮೋಟೊ ಭೈ ಆರೋನಾನಬಿ, ಇನೊ ಛಿಯ್ಯಾವ್ ಹುಯಿರ‍್ಹಾತೆ ನಾದಾಬ್, ಅಬೀಹೂ, ಎಲ್ಲಾಜಾರ್, ಈತಾಮಾರ್ ಕರಿ ಬೋಲವಾಳನಬಿ ಇಸ್ರಾಯೇಲ್‌ವಾಳಥಿ ತಾರ ಖನ್ನೆ ಬುಲೈಲಿನ್ ಆವ್. 2 ತಾರೊ ಮೋಟೊ ಭೈ ಆರೋನನ ಮರ‍್ಯಾದಿಬಿ, ಶನ್‌ಗಾರ್‌ಬಿ ಹುವಾನಿತರ ಇನ ಪರಿಶುದ್ ಪೇರ್ವಾಖ್ಹ್‌ನ ಕರಾವ್ಣು. 3 ಕಿನ ಮೇ ಅಕ್ಕಲ್‌ನಿ ವರಾನ ಭರ್‌ಪೂರ್‌ಥಿ ದೀರಾಖ್ಯೊಸ್ಕಿ ಎಥ್ರಾನ ಅಕ್ಲಿಯೆವ್‌ನ ಜೋ಼ಡ್ಮ ತೂ ವಾತೆಬೋಲಿನ್ ಇವ್ಣ ಹಾತೇಖ್ಹು ಯೊ ಪೆರ್ವಾಖ್ಹ್‌ನ ತಯಾರ್ ಕರ‍್ನು. ಆರೋನ ಯೊ ಅಖ್ಖಾನ ಫೇರಿನ್ ಮಾರೊ ಯಾಜಕ ಹುವಾನ ಪರಿಶುದ್ ಉಷೆ. 4 ಇವ್ಣೆ ಕರ‍್ನುತೆ ಪೆರ್ವಾಖ್ಹ್‌ಖ್ಹಾರು ಖಿವುಖಿವುಕತೊ; ಛಾ಼ತಿನು ಕವಚ್, ಮಹಾಯಾಜಕ್‌ನು ಏಫೋದ್, ಝ಼ಗ್ಗೊ, ವಣ್‌ಖರ್‌ಥಿ ಬಣಾಯುಹುಯು ಉಪ್ಪರ್‌ಲ್ಯು ಕುಡ್‌ತು, ರುಂಬಾಲ್ ಅಜು಼ ಕಂಬರ್‌ಪಟೊ ಆಸ್. ತಾರೊ ಭೈಹುಯಿರ‍್ಹೊತೆ ಆರೋನಬಿ ಇನ ಛಿಯ್ಯಾವ್‌ಬಿ ಮಾರ ಯಾಜಕ ಹುವಾನ ಇವ್ಣಖ್ಹಾಜೆ ಆ ಪರಿಶುದ್ ಪೆರ್ವಾಖ್ಹ್‌ನ ಕರಾವ್ಣು. 5 ಅದ್ಮಿಖ್ಹಾರು ಕಾಣ್ಕೆ ದ್ಯವಾನ ಖ್ಹೊನ್ನಾನ, ನೀಲಿ, ರಾಯ್‌ಜಾ಼ಮಣ್ಣು ರಂಗ್‌, ಲಲೇಲಾಲ್ ರಂಗ್‌ಥಿ ರ‍್ಹವಾನ ಧಾಗಾನ, ಅಜು಼ ಕೋರು ಲುಂಗ್ಡು ಯೊ ಕಾಮ್ನಖ್ಹಾಜೆ ಉಪಯೋಗ್ ಕರ‍್ನು. 6 ಏಫೋದ್‌ಕರಿ ಕವಚ್‌ನ ಖ್ಹಾಜ್‌ಥಿ ಬಣಾಯಹುಯ ಖ್ಹುತ್ತರ್‌ನ ಧಾಗೇಥಿ ಕರೈನ್ ಇನ ಖ್ಹೊನ್ನು, ನೀಲಿ, ರಾಯಿಜಾ಼ಮಣ್ಣ ರಂಗ್‌ನು ಅಜು಼ ಲಲೇಲಾಲ್ ರಂಗ್‌ನ ಧಾಗೇಥಿಬಿ ವಣ್‌ಖರ್ ನಖೈನ್ ಶನ್‌ಗಾರ್ ಕರ‍್ನು. 7 ಯೊ ಕವಚ್‌ನ ಭುಜ಼್‌ಪರ್ ಬೇ ಪಟ್ಟಿಯೆ ರ‍್ಹೇವ್ಣು. ಇನು ಭೇ ನೋಕ್‌ಖ್ಹಾರು ಜೋಡ್‌ಶೈ ರ‍್ಹೇಣು. 8 ಕವಚ್‌ನ ಉಪ್ಪರ್ ರ‍್ಹವಾನು ವಣ್‌ಖರ್‌ನ ಕಾಮ್ನು ಕಂಬರ್‌ಪಟೊ ಏಕ್‌ಹುಯಿರ‍್ಹಿನ್ ಇಮ್ನಿಪರಕ್‌ಮಾಸ್ ಖ್ಹಾಜ್‌ಥಿ ಬಣಾಯಹುಯ ಖ್ಹುತ್ತರ್‌ನ ಧಾಗೇಥಿ ಕರೈರ‍್ಹಿನ್ ಖ್ಹೊನ್ನಾನ ಧಾಗೇಥಿಬಿ ನೀಲಿ, ರಾಯ್‌ಜಾ಼ಮಣ್ಣೊ ರಂಗ್, ಲಲೇಲಾಲ್ ರಂಗ್‌ನ ಧಾಗೇಥಿಬಿ ಶನ್‌ಗಾರ್ ಹುಯಿರ‍್ಹೇಣು. 9 ಅಜು಼ ತೂ ಬೇ ಗೋಮೇಧಕ(ಸುಲೈಮಣಿ) ಮೋಲ್ನ ಹೀರಾವ್ನ ಲೀನ್ ಯೊ ಖ್ಹಾರಾಮ ಇಸ್ರಾಯೇಲ್‌ವಾಳನು ಖೂಮ್‌ನ ನಾಮ್ನ ಟಕಾವ್ಣು. 10 ಎಕ್ ಹೀರಾಮ ಛೊ಼ ನಾಮ್‌ನಾಬಿ ಅಜೇಕ್ ಹೀರಾಮ ಉಭ್‌ರ‍್ಯುತೆ ಛೊ಼ ನಾಮ್ನ ಇವ್ಣ ಇವ್ಣ ಪೈದಾಖ್ಹ್‌ನಿ ಪರಕ್ಮ ಟಕಾವ್ಣು. 11 ಮುದ್ರಾವ್ನ ಹೀರಾನ ಟಕಾವನಿ ಘೋಣಿ ಯೊ ಕೆತ್ತವಾಳೇಥಿ ಭೇ ಹೀರಾವ್‌ಮ ಇಸ್ರಾಯೇಲ್‌ನು ಖೂಮ್‌ವಾಳನು ನಾಮ್ನ ಟಕೈನ್, ಖ್ಹೊನ್ನಾನ ಯೊ ಮುದ್ರಾವ್‌ಪರ್ ಬೆಖ್ಹಾಡ್‌ಣು. 12 ಯೊ ಭೇ ಹೀರಾವ್ನ ಭುಜ಼್‌ನ ಉಪ್ಪರ್‌ಲಿ ಏಫೋದ್‌ನು ಪಟ್ಟಿಮ ಘಲಾವ್ಣು. ಯೊಅಖ್ಖು ಇಸ್ರಾಯೇಲ್‌ವಾಳನ ಯಾದ್ನಖ್ಹಾಜೆನು ಹೀರಾವ್‌ ಹುಯಿರ‍್ಹಿಷೆ. ಆರೋನ ಯೆಹೋವನ ಖ್ಹಾಮ್ಣೆಮ ಜಾ಼ವನಿ ಖ್ಹಾರಿವಖ್ಹತ್ ಇಸ್ರಾಯೇಲ್‌ವಾಳನ ಖೂಮ್‌ನು ನಾಮ್‌ಖ್ಹಾರನ ಇನ ಯಾದ್ ಲ್ಯವಾನಖ್ಹಾಜೆ ಇನು ಭೇ ಭುಜ಼್‌ಪರ್ ಯೋಅಖ್ಖಾನ ಫೇರಿಲಿನ್ ಜಾಷೆ. 13 ಯೊ ಹೀರಾವ್ನ ಜೋ಼ಡ್‌ಶಾವನ ಖ್ಹೊನ್ನಾನ ಛೇಡಾನ ವಣಿನ್ ಖಾನಾವ್‌ನ ಕರಾವ್ಣು. 14 ಅಜು಼ ವಣಾನ ಕಾಮ್‍ಥಿ ಡೋರಿನುಘೋಣಿನು ಬೇ ಅಫುಟ್ ಖ್ಹೊನ್ನಾನಿ ಖ್ಹಾಕ್‌ಳಿಯೆವ್ನ ಕರೈನ್ ಹೀರಾವ್ನ ಖಾನಾವ್‌ನ ಅಟ್‌ಕಾವ್ಣು.

15 ದೇವ್ನಿ ತೀರ್ಮಾನ್ನು ಛಾ಼ತಿನು ಕವಚ್‌ನ ವಣ್‌ಖರ್‌ನ ಕಾಮ್‍ಥಿ ಕರಾವ್ಣು. ಇನ ಏಫೋದ್‌ನ ಕರಾಯುತೆ ತಿಮ್ಮಸ್ ಖ್ಹೊನ್ನಾನ ಧಾಗೇಥಿಬಿ ನೀಲಿ, ರಾಯಿಜಾ಼ಮಣ್ಣೊ ರಂಗ್, ಲಲೇಲಾಲ್ ರಂಗ್‌ರ‍್ಹವಾನು ಧಾಗೇಥಿಬಿ ಖ್ಹಾಜ಼್‌ಥಿ ಬಣಾಯಹುಯ ಖ್ಹುತ್ತರ್‌ನ ಧಾಗೇಥಿ ಕರಾವ್ಣು. 16 ಯೊ ಎಕ್ ಬಿಲೇಶ್‌ ಲಾಂಬುಬಿ ಅಜು಼ ಎಕ್ ಬಿಲೇಶ್‌ ಚೌ಼ಡುರ‍್ಹೀನ್ ಬೇ ಪದರ್‌ಹುಯಿನ್ ಚಾರ್‌ಖೂಟಿ ಹುಯಿರ‍್ಹೇವ್ಣು. 17 ಇನ ಖ್ಹಾಮೇನಿ ಬಾಜು಼ಮ ಚಾರ್‌ಶಾಲ್‌ ಹೀರಾವ್ನ ಲಗಾಡಿರಾಕ್‌ಣು. ಪಹಿಲಿ ಶಾಲ್ಮ ಮಾಣಿಕ್ಯ, ಪುಷ್ಯರಾಗ ಐರೊಖ್ಹಾರು ರ‍್ಹೇವ್ಣು. 18 ಬೇನ ಶಾಲ್ಮ ಪಚ್ಚೆ, ನೀಲಿಮಣ್‌ಕೊ ಅಜು಼ ವಜ್ರಖ್ಹಾರು ರ‍್ಹೇಣು. 19 ತೀನ್ನೆ ಶಾಲ್ಮ ಖ್ಹೊನ್ನಾನೊ ಹೀರೊ, ಸುಗಂಧಿ ಅಜು಼ ಪದ್ಮರಾಗ್‌ಖ್ಹಾರು ರ‍್ಹೇವ್ಣು. 20 ಚಾರ‍್ನಿ ಶಾಲ್ಮ ಗೋಮೇಧಕ, ಬೆರುಲ್ಲ, ವೈಢೂರ್ಯವ್‌ನಬಿ ಖ್ಹೊನ್ನಾನ ಮಣ್ಕಾವ್‌ಮ ಮಳಾವ್ಣು. 21 ಇಸ್ರಾಯೇಲ್‌ವಾಳಾನ ಖೂಮ್ಮ ಗಣ್ತೀನಿ ಪರಕ್‌ನಿಘೋಣಿ ಭಾರ ಹೀರಾ ರ‍್ಹೇವ್ಣು. ಮುದ್ರಾವ್ನ ಕೆತ್ತಾನಿ ಪರಕ್ಮ ಏಕೇಕ್‌ ಹೀರಾಮ ಏಕೇಕ್‌ ಖೂಮ್‌ನು ನಾಮ್ನ ಟಕಾವ್ಣು. 22 ಯೋಸ್ ಕಾಹೆತೆ ಯೊ ಪದಕ್ನ ಉಪ್ಲಿ ಬಾಜು಼ಮ ಡೋರಿಯೆನಿ ಘೋಣಿನು ಅಫುಟ್ ಖ್ಹೊನ್ನಾನು ಖ್ಹಾಕ್‌ಳಿಯೆವ್ನ ವಣಾನ ಕಾಮ್‍ಥಿ ಕರೈಮ್ಹೇಲ್ನು. 23 ಬೇ ಖ್ಹೊನ್ನಾನಿ ಅಂಗುಠಿಯೆವ್ನ ಕರೈನ್ ಛಾ಼ತಿನ ಪದಕ್ನು ಭೇ ಕೋಣಾವ್‌ನಾಬಿ ಲಗಾಡ್‌ಣು. 24 ಯೊ ಭೇ ಖ್ಹಾಕ್‌ಳಿಯೆವ್ನ ಛಾ಼ತಿನ ಪದಕ್ನು ಕೋಣಾಮ ಛಾ಼ತೆ ಕಣ್ಣಿಯೆವ್‌ಮ ಅಟ್‌ಕಾವ್ಣು. 25 ಯೊ ಖ್ಹಾಕ್‌ಳಿಯೆವ್ನ ನೋಕ್‌ಅಖ್ಖಾನ ಏಫೋದ್ನ ಕವಚ್‌ನು ಖಾಂದಾನಿ ಪಟ್ಟಿಮಛಾ಼ತೆ ಬೇ ಕಣ್ಣಿಯೆವ್‌ಮ ಅಟ್‌ಕೈನ್ ಖ್ಹಾಮ್ಣೆ ಮ್ಹೇಲಿರಾಕ್ಣು. 26 ಆ ಕಾಹೆತೆ ಬೇ ಖ್ಹೊನ್ನಾನು ಕಣ್ಣಿಯೇವ್ನ ಕರೈನ್ ಯಾಜಕ್‌ನ ಛಾ಼ತಿನ ಪದಕ್‌ನ ಮಹಿನು ಕನಾರಿನ ಕೋಣಾವ್‌ಮ ಕವಚ್‌ನ ಖನ್ನೆಸ್‌ ಮ್ಹೇಲಾವ್ಣು. 27 ಅಜು಼ ಬಿಜು಼ ಬೇ ಖ್ಹೊನ್ನಾನಿ ಕಣ್ಣಿಯೇವ್ನ ಕರೈನ್ ಏಫೋದ್ ಕವಚ್‌ನು ಭೇ ಖಾಂದಾವ್ನಿ ಪಟ್ಟಿಯೇವ್ನ ಖ್ಹಾಮ್ಣೆನ ಹೇಟ್ ಕವಚ್‌ನ ಜೋಡ್‌ಶೈರಾಖನ ಝ಼ಗೊನಕನ ಶಿವಣ್ ಕರಾಯಹುಯ ಕಷ್‌ಬಂದ್‌ನ ಉಪ್ಲಿ ಬಾಜು಼ಮ ಮ್ಹೇಲಾವ್‌ಣು. 28 ಛಾ಼ತಿನು ಪದಕ್‌ ವಣ್‌ಖರ್‌ ನಖಾಯಹುಯ ಕಷ್‌ಬಂದ್‌ನ ಉಪ್ಲಿ ಬಾಜು಼ಮ ಭಂದೈರ‍್ಹವಾನಿಘೊಣಿಬಿ, ಏಫೋದ್ ಕವಚ್‌ಥು ಛು಼ಟಿನಾಪಡ್ನುತೆತಿಮ್‌ ಇನಿ ಕಣ್ಣಿಯೇವ್ನ ಏಫೋದ್ ಕವಚ್‌ನ ಕಣ್ಣಿಯೇವ್ನ ನೀಲಿ ಧಾಗೇಥಿ ಭಂದಾವ್ಣು. 29 ನ್ಯಾವ್ನು ತಿರ್ಮಾನ್ನು ಛಾ಼ತಿನ ಪದಕ್‌ನ ಉಪ್ಪರ್ ಇಸ್ರಾಯೇಲ್ನು ಖೂಮ್‌ಖ್ಹಾರನು ನಾಮ್ನಅಖ್ಖು ಲಿಖೈರ‍್ಹುತೆಖ್ಹಾಜೆ ಆರೋನ ಪವಿತ್ರ ಝ಼ಗೋಮ ಜಾ಼ವನಿ ಖ್ಹಾರಿ ವಖ್ಹತ್ ಯೊ ನಾಮ್‌ಅಖ್ಖಾನ ಲಗತ್ತರ್‌ಥಿ ಯೆಹೋವನಿ ಯಾದ್ಮ ಲ್ಯವಾನಖ್ಹಾಜೆ ಇನ ಇನು ಛಾ಼ತಿನ ಉಪ್ಪರ್ ಹಮೇಶಬಿ ಫೇರ್‌ಶೆ. 30 ನ್ಯಾವ್‌ನು ತಿರ್ಮಾನ್ನ ಖ್ಹಮ್‌ಜಾ಼ಡನು ಊರೀಮ್ ಅಜು಼ ತುಮ್ಮೀಮ್ ಕರಿ ಜಿನಖ್ಹ್‌ನ ಯೊ ಛಾ಼ತಿನ ಕವಚ್‌ಮ ಘಾಲಿರಾಕ್‌ಣು. ಆರೋನ ಯೆಹೋವನ ಮ್ಹೋರೆ ಜಾ಼ವನಿ ವಖ್ಹ್‌ತೆ ಯೋಅಖ್ಖು ಇನ ಛಾ಼ತಿಪರ್ ರ‍್ಹಿಶೆ. ಇಸ್ರಾಯೇಲ್‌ವಾಳು ಪಾಡಿಚಾ಼ಲ್ನುತೆ ನ್ಯಾವ್ನ ತಿರ್ಮಾನ್ನ ಆರೋನ ಅಮ್ ಇನ ಛಾ಼ತಿನ ಉಪ್ಪರ್ ಯೆಹೋವನ ಮ್ಹೋರೆಮ ಕದೇಬಿ ಫೇರಿರಾಕ್ಣು.

31 ಮಹಾಯಾಜಕ್ ಏಫೋದ್ ಕವಚ್‌ನ ಜೋ಼ಡ್ಮ ಫೇರ‍್ನುತೆ ಕುಡ್‌ತಾನ ತೂ ನೀಲಿ ರಂಗ್‌ನ ಲುಂಗ್ಡೇಥಿಸ್ ಕರಾವ್ಣು. 32 ಮುಡ್‌ಕ್ಯು ಘಾಲನಖ್ಹಾಜೆ ಇನಾಮ ಖೀಂಡ್ ರ‍್ಹೇವ್ಣು. ಯೊ ಫಾಟ್ಣುನಾತೆ ತಿಮ್ ಯೊ ಖೀಂಡ್‌ನು ಗಿರ್ಕಿನ ಇನಜೋ಼ಡೆ ಎಕ್ ಪಟ್ಟಿನ ಶಿವಾಡ್‌ಣು. 33 ಝ಼ಗ್ಗಾನು ಕನಾರಿನ ಅಶ್‌ಪಿಶ್‌ಬಿ ನೀಲಿ, ರಾಯ್‌ಜಾ಼ಮಣ್ಣು ರಂಗ್, ಲಲೇಲಾಲ್ ರಂಗ್‌ಥಿ ರ‍್ಹವಾನ ಧಾಗೇಥಿ ಢಾಡಮ್‌ನ ಪಂಡಾವ್‌ನಿ ಘೋಣಿನು ಚಂಡುಲ್‌ನಬಿ ಯೊ ಅಖ್ಖಾನ ಬೀಚ್ಮ ಖ್ಹೊನ್ನಾನ ಘುಗ್‌ರಾವ್‌ನಾಬಿ ಘಲಾವ್‌ಣು. 34 ಖ್ಹೊನ್ನಾನು ಘುಗ್ರೊಬಿ ಢಾಡಮ್‌ನಾಬಿ ಎಕ್ ಹುಯಿಜಾ಼ವದಿನ್ ಎಕ್ ಯೊ ಝ಼ಗ್ಗಾನ ಕನಾರಿನ ಅಶ್‌ಪಿಶ್‌ಬಿ ರ‍್ಹೇವ್ಣು. 35 ಆರೋನ ಯಾಜಕ್‌ನು ಸೇವೆ ಕರಾನಿ ವಖ್ಹತ್‌ಮ ಇನ ಫೇರ್‌ನು. ಯೊ ಯೆಹೋವನ ಮ್ಹೋರೆ ಪವಿತ್ರಝ಼ಗೋಮ ಜಾ಼ವನಿ ವಖ್ಹ್‌ತೆಬಿ ಆವನಿ ವಖ್ಹ್‌ತೆಬಿ ನಾ ಮರ‍್ನುತೆಖ್ಹಾಜೆ ಯೊ ಘುಗ್‌ರಾವ್‌ನ ಅವಾಜ಼್‌ ಖ್ಹಮಜ಼್‌ಪಡ್ಣು. 36 ಅಫುಟ್‌ ಖ್ಹೊನ್ನೇಥಿ ಎಕ್ ಪಟ್ಟಿನ ಕರೈನ್ ಮುದ್ರಾನ ಟಕಾವನಿ ಪರಕ್ಮ ಇನಪರ್ "ಯೆಹೋವನಖ್ಹಾಜೆ" ಕರಿ ಲೀಖ್ಯಾನ ಟಕಾವ್ಣು. 37 ಇನ ರುಂಬಾಲ್ನ ಭಾಂದನಖ್ಹಾಜೆ ನೀಲ ಧಾಗಾನ ಇನ ಭಂದಾವ್ಣು. ಯೊ ರುಂಬಾಲ್ನ ಖ್ಹಾಮ್ಣೇನಿ ಬಾಜು಼ ರ‍್ಹೇವ್ಣು. 38 ಇಸ್ರಾಯೇಲ್‌ವಾಳು ಕಾಣ್ಕೆ ದ್ಯವಾನು ದೇವ್ನ ಅಖ್ಖಾಸ್ ಪರಿಶುದ್ ಜಿನಖ್ಹ್‌ನಿ ಬಾರೇಮ ಖೋಟ್ ಕಾಯ್‌ತೊಬಿ ರ‍್ಹಯೂತೊ ಆರೋನ ಯೊ ಪಟ್ಟಾನ ಕೆದೇಬಿ ತಾಳ್ವಪರ್ ಘಾಲಿನ್ ಯೊ ದೋಷ್‌ನು ಫಲ್ನ ಪಾಡಿಲವಾಥಿ ಇವ್ಣೆ ಯೆಹೋವನ ಪಸಂದ್‌ವಾಳ ಹುಯಿರ‍್ಹಿಷೆ. 39 ಆರೋನ ಫೇರ‍್ನುತೆ ಮಹಿನ ಕುಡ್‌ತಾನ ಖ್ಹುತ್ತರ್‌ನ ಧಾಗೇಥಿ ವಣ್‌ಖರ್ ನಖೈನ್ ಶಿವಾಡ್‌ಣು. ಇನ ರುಂಬಾಲ್ನ ಖ್ಹುತ್ತರ್‌ನ ಧಾಗೇಥಿ ಕರಾವ್ಣು. ಇನ ಕಷ್‌ಬಂದ್‌ನ ವಣ್‌ಖರ್‌ನ ಕಾಮ್‍ಥಿ ಕರಾವ್ಣು. 40 ಆರೋನ್ನ ಛಿಯ್ಯಾವ್ನ ಬರೋಬರ್‌ನಿ ಮರ‍್ಯಾದಿಬಿ, ಶನ್‌ಗಾರ್‌ಬಿ ಹುವಾನಿಘೋಣಿ ಇವ್ಣುನ ಝ಼ಗ್ಗಾವ್‌ನಬಿ, ಕಂಬರ್‌ಪಟಾವ್‌ನಬಿ ಅಜು಼ ಕರಾವ್ಣು. 41 ಇವ್ಣೆ ಮನ ಯಾಜಕನು ಸೇವೆ ಕರಾನಖ್ಹಾಜೆ ಯೊ ಪೆರ್ವಾಖ್ಹ್‌ನ ತಾರೊ ಭೈ ಆರೋನ್ನಬಿ, ಇನ ಛಿಯ್ಯನಾಬಿ ಫೇರೈನ್, ಇವ್ಣುನ ಅಬಿಷೇಕ್ ಕರಿನ್, ಸೇವೆನಖ್ಹಾಜೆ ನೇಮಕ್‌ಕರಿನ್ ಶುದ್‍ ಕರ‍್ನು. 42 ಆ ನಾಹುಯಿನ್ ಇವ್ಣ ಉಘಾಡು ಆಂಗ್ ನಾ ದೆಖಾವ್ಣುತೆ ತಿಮ್ ಇವ್ಣುನ ಕಂಬರ್‌ಥು ಧರಿನ್ ಟಾಂಗ್‌ಲಗು ರ‍್ಹವಾನು ಚಡ್ಡಿಯೆವ್ನ ಖ್ಹುತ್ತರ್‌ಥಿ ಕರಾವ್ಣು. 43 ಆರೋನಬಿ, ಇನ ಛಿಯ್ಯವ್‌ಬಿ ದೇವ್ನ ದರ್ಶನ್ನ ಡೇರಾನ ಘರ್‌ಮ ಜಾ಼ವನಿ ವಖ್ಹ್‌ತೆಬಿ, ಪವಿತ್ರ ಝ಼ಗೋಮ ಸೇವೆ ಕರಾನ ಚಾ಼ಚ಼ರ್‌ಕನ ಆವನಿವಖ್ಹತೆಬಿ ಆಖ್ಹಾರನ ಫೇರಿರಾಕ್ಣು. ನಾರ‍್ಹಿಯುತೊ ಇವ್ಣೆ ಯೊ ಗಲತ್‌ನಖ್ಹಾಜೆ ಮರಿಜಾ಼ಷೆ. ಇನಾಬಿ ಇನ ಖಾನ್‌ದಾನ್‌ವಾಳನಬಿ ಆ ಹೈರುತೆ ಹಮೇಶಾನಿ ನಿಯಮ್ ಹುಯಿರ‍್ಹಿಸ್.