1 ಯೆಹೋವನೆ ಮೋಶೆನ ಜೋ಼ಡೆ ವಾತೆ ಬೋಲಿನ್ 2 ಇಸ್ರಾಯೇಲ್‌ವಾಳು ಪಾಛು಼ ಫರಿನ್ ಜೈ಼ನ್ ಪೀಹಹೀರೋತ್‌ನು ಪೂರಬ್‌ಭಣಿ ಮಿಗ್ದೋಲ್‌ನಾಬಿ ಲಾಲ್ ದರ‍್ಯಾವ್‌ನಾಬಿ ಬೀಚ್ಮ ಬಾಳ್ಚೆಫೊನ್ನನ ಮ್ಹೋರೆ ಹುಯಿನ್ ರ‍್ಹೇವ್ಣುಕರಿ ಇವ್ಣುನ ಬೋಲ್. ಇನ ಖ್ಹಾಮೆಸ್ ದರ‍್ಯಾವ್ನ ಖನ್ನೆಸ್‌ ಇವ್ಣೆ ರ‍್ಹೇವ್ಣು. 3 ಫರೋಹನೆ ಇನ ದೇಖಿನ್ ಇಸ್ರಾಯೇಲ್‌ವಾಳನ ಇವ್ಣುನ ವಾಟ್‌ ಛು಼ಕಿಗೈ, ಅಖ್ಖಿ ಬಾಜೂ಼ಬಿ ಜ಼ಂಗಳ್ ಇವ್ಣುನ ಮೂಚೈ಼ರ‍್ಹುಸ್’ ಕರಿ ಲ್ಹಾವಸ್. 4 ಮೇ ಫರೋಹನ ದಿಲ್ನ ಕಠಣ್ ಕರಾವವಾಳೊ ಛೂ಼ತೆಖ್ಹಾಜೆ ಯೊ ಇವ್ಣುನ ಪೀಠೆಕರಿ ಆವ್‌ಶೆ; ತದೆ ಮೇ ಫರೋಹಮಾಬಿ ಇನ ಶಿಪಾಯ್‌ಮಾಬಿ ಮಹಿಮೆ ಲೀಶ್‌ ‘ಮೇಸ್ ಯೆಹೋವ’ ಕರಿ ಈಜಿಪ್ಟ್‌ವಾಳನ ಮಾಲುಮ್ ಪಡ್‌ಶೆ" ಕರಿಬೋಲ್ಯೊ. ಯೆಹೋವನೆ ಹುಕುಮ್ ದಿದೋತೆ ತಿಮ್ಮಸ್ ಇಸ್ರಾಯೇಲ್‌ವಾಳು ಚಾ಼ಲಿಲಿದು. 5 ಇಸ್ರಾಯೇಲ್‌ವಾಳು ಮಿಲೈನ್ ಚ಼ಲಿಗಯು ಕರಿ ಬೋಲಾನು ಪುಕಾರೊ ಈಜಿಪ್ಟ್‌ನೊ ರಾಜ಼ ಹುಯಿರ‍್ಹೋತೆ ಫರೋಹನ ಮಾಲುಮ್ ಪಡಾನಿವಖ್ಹ್‌ತೆ, ಇವ್ಣಿ ವಿಚಾರ್‌ಮ ಫರೋಹನ ಅಜು಼ ಇನ ಅದಿಕಾರಿವಾಳನು ದಿಲ್‌ ಇವ್ಣುನ ವಿರೋದ್ ಹುಯಿನ್ ಕಠಣ್ ಹುಯ್ಗು. ಇವ್ಣೆ, "ಆ ಶಾತ್ ಅಪ್ಣೆ ಕರ‍್ಯಾತೆ? ಅಪ್ಣುನ ಚಾ಼ಕ್ರಿ ಕರಾವಾಳ ಹುಯಿರ‍್ಹಥಾತೆ ಇಸ್ರಾಯೇಲ್‌ವಾಳನ ನಿಕ್ಳಿಜಾ಼ವಾನ ಮ್ಹೇಲಿದಿದಾನಿ" ಕರಿ ಲಾಝ್ಯ. 6 ತದೆ ಫರೋಹಾನೆ ಇನಿ ರಥ್‌ನಿ ತಾಖತ್ನ ತಯಾರ್ ಕರಿಲಿನ್ ಇನ ಶಿಪಾಯ್ನ ಜೋ಼ಡ್ಮ ನಿಕ್‌ಳ್ಯೊ. 7 ಶ್ರೇಷ್ಠರ‍್ಹಾವನು ಛೊ಼ಖ್ಹೊ ರಥ್‌ಖ್ಹಾರುಬಿ, ಈಜಿಪ್ಟ್ ದೇಖ್ಹ್‌ನು ಖ್ಹಾರುಸ್ ರಥ್ ಖ್ಹಾರೂಬಿ ಲೀನ್ ಇನ ಪೀಠೆಗಯೊ. ಯೊ ಅಖ್ಖಾಸ್ ರಥ್ ಖ್ಹಾರಾಮ ಅದಿಕಾರಿಖ್ಹಾರನಬಿ ಬುಲೈಲಿದೊ. 8 ಯೆಹೋವ ದೇವ್ನೆ ಈಜಿಪ್ಟ್ ದೇಖ್ಹ್‌ನೊ ರಾಜ಼ ಹುಯಿರ‍್ಹೋತೆ ಫರೋಹನ ದಿಲ್ನ ಮೊಂಡ್‌ ಕರಾಯೊತೆಖ್ಹಾಜೆ ಯೊ ಇಸ್ರಾಯೇಲ್‌ವಾಳನ ಪೀಠೆ ರಪೇಟಿಲಿನ್‌ ಗಯೊ. ಕತೋಬಿ ಇಸ್ರಾಯೇಲ್‌ವಾಳು ಜಂಗ್‌ನ ತಯಾರ್ ಹುಯಿನ್ ನಿಕ್ಳಿನ್ ಐರ‍್ಹುಥು. 9 ಈಜಿಪ್ಟ್‌ವಾಳು ಕತೊ ಫರೋಹನು ಘೋಡಖ್ಹಾರುಬಿ, ರಥ್ ಖ್ಹಾರುಬಿ, ಇನು ಹತ್ತಿ ಚ಼ಲಾವವಾಳುಬಿ, ಶಿಪಾಯ್ ಖ್ಹಾರೂಬಿ, ಇವ್ಣ ಪೀಠೆ ನಿಕ್ಳಿನ್ ಇಸ್ರಾಯೇಲ್‌ವಾಳು ಪೀಹಹೀರೋತ್‌ನ ಖನ್ನೆ ಬಾಳ್ಚೆಫೊನ್ನ ಮ್ಹೋರೆ ಹುಯಿನ್ ದರ‍್ಯಾವ್ನಿ ಕನಾರಿಮ ಉತ್ರಿ ಆವಾನಿವಖ್ಹ್‌ತೆಸ್ ಇವ್ಣ ಖನ್ನೆ ಆಯು. 10 ಫರೋಹನೆ ಖನ್ನೆ ಅವುಕರಾನಿ ವಖ್ಹ್‌ತೆ ಇಸ್ರಾಯೇಲ್‌ವಾಳು ಇವ್ಣ ಪೀಠೆ ನಿಕ್‌ಳಿ ಐರ‍್ಹೂತೆ ಈಜಿಪ್ಟ್‌ವಾಳನ ದೇಖಿನ್ ಘಣು ಡರಿನ್ ರೊವ್ತು ಹುಯಿನ್ ಯೆಹೋವನ ಮದತ್‌ನಖ್ಹಾಜೆ ಬಿಂತಿಕರ‍್ಯು. 11 ಇವ್ಣೆ ಮೋಶೆನ, "ಈಜಿಪ್ಟ್ ದೇಖ್ಹ್‌ಮ ಮಖ್ಹಾಣ್ಯು ಕೊಯ್ನಿಕರಿ ಜ಼ಂಗಳ್‌ಮ ಮರಾದೆ ಕರಿ ಹಮುನ ಹಜ್ಜಾ಼ ಶನ ಬುಲೈಲಿನ್ ಆಯೊ? ಶನ ತು ಹಮುನ ಅಮ್ನಿ ಪರಕ್‌ ಕರೀನ್ ಈಜಿಪ್ಟ್ ದೇಖ್ಹ್‌ಥು ಬುಲೈಲಿನ್ ಆಯೊ? 12 ಹಮೆ ಈಜಿಪ್ಟ್ ದೇಖ್ಹ್‌ಮ ರ‍್ಹವಾನಿ ವಖ್ಹ್‌ತೇಸ್, ‘ತೂ ಹಮಾರಿ ಫಿಕರ್‌ನ ನಕೊ ಆವ್. ಹಮೆ ಈಜಿಪ್ಟ್‌ವಾಳನ ಚಾ಼ಕ್ರಿ ಕರಾವಾಳ ಹುಯಿನಸ್ ರ‍್ಹಿಯೇಸ್’ ಕರಿ ತುನ ಬೋಲ್ಯಕೊಯ್ನಿಕಿಶು. ಹಮೆ ಜ಼ಂಗಳ್‌ಮ ಮರಾಥೀಬಿ ಈಜಿಪ್ಟ್‌ವಾಳನ ಗುಲಾಮ್ ಹುಯಿರ‍್ಹವಾನುಸ್ ಊಚೂ಼ನಿ" ಕರಿಬೋಲ್ಯು. 13 ಕತೋಬಿ ಮೋಶೆ ಯೊ ಅದ್ಮಿನ, "ತುಮೆ ಡರೊನಕೊ. ಖ್ಹಪೇಥಿ ಭೀರಾವವಾಳ ಹುಯಿನ್ ಯೆಹೋವ ಆ ವಖ್ಹತ್ ತುಮುನ ಬಚಾಡನಿ ಪರಕ್ನ ದೇಖೊ. ತುಮೆ ಆ ವಖ್ಹತ್ ದೇಖಾನು ಈಜಿಪ್ಟ್‌ವಾಳನ ಬಿಜು಼ ಕೆದೇಬಿ ಕೋದೇಕ್‌ಷುನಿ. 14 ಯೆಹೋವಾಸ್ ತುಮಾರ ಖ್ಹಾಜೆ ಜಂಗ್ ಭೀಡ್‌ಷೆ. ತುಮೆ ಚುಪ್ಕೆ ರ‍್ಹವೊ" ಕರಿ ಬೊಲ್ಯೊ. 15 ತದೆ ಯೆಹೋವ ಮೋಶೆನ ಶಾತ್ ಬೋಲ್ಯೊಕತೊ, "ತೂ ಮನ ಬಿಂತಿಕರಾನು ಶಾತ್? ಅಗ್ಗಳ್ ಚಾ಼ಲ್‌ಕರಿ ಇಸ್ರಾಯೇಲ್‌ವಾಳನ ಬೋಲ್. 16 ತೂ ತಾರ ಲಠ್ಠಾನ ಪಾಡಿನ್ ದರ‍್ಯಾವ್‌ಭಣಿ ಹಾತ್ ಕರಿನ್ ಇನ ಬೇಭಾಗ್ ಕರ್‌, ತದೆ ಇಸ್ರಾಯೇಲ್‌ವಾಳು ದರ‍್ಯಾವ್ನ ಇಚ಼್‌ಮ ಖ್ಹುಕ್ಕಿ ಜ಼ಮಿನ್‌ಪರ್ ಚಾ಼ಲಿನ್ ಜಾಷೆ. 17 ಮೇತೋಬಿ ಈಜಿಪ್ಟ್‌ವಾಳನ ದಿಲ್ನ ಮೊಂಡ್‌ ಕರಿಶ್. ಇವ್ಣೆ ಅವ್ಣುನ ಪೀಠೆ ಕರ್ಶೆ. ತದೆ ಮೇ ಫರೋಹನ ಉಪ್ಪರ್‌ಬಿ, ಇನ ತಮಾಮ್‌ ಶಿಪಾಯ್‌ವಾಳನ ಉಪ್ಪರ್‌ಬಿ, ರಥ್‌ಖ್ಹಾರನ ಉಪ್ಪರ್‌ಬಿ ಅಜು಼ ಘೋಡಾವ್ನ ಉಪ್ಪರ್‌ಬಿ ಜೂತಿನ್ ಖ್ಹರೈಲಿಷ್. 18 ಮೇ ಫರೋಹಮಾಬಿ ಇನ ರಥ್ ಖ್ಹಾರಮಾಬಿ, ಘೋಡಾವ್‌ಮಾಬಿ ಖ್ಹರೈಲ್ಯವಾನ ವಾರ್ ಮೇಸ್ ಯೆಹೋವಕರಿ ಬೋಲಾನು ಈಜಿಪ್ಟ್‌ವಾಳು ಮಾಲುಮ್ ಕರಿಲಿಷೆ" ಕರಿಬೋಲ್ಯೊ.

19 ತದೆ ಇಸ್ರಾಯೇಲ್‌ವಾಳನ ದಂಡ್‌ನ ಖ್ಹಾಮೆ ಒಳೆಜಾ಼ತೊಥೋತೆ ದೇವ್ನೊದೂತ ಇನಿ ಝ಼ಗೋನ ಮ್ಹೇಲಿನ್ ಇವ್ಣ ಪೀಛೆ ಆಯೊ. ಇವ್ಣ ಅಗ್ಗಳ್ ವಳಿಜಾ಼ತುಥೂತೆ ವಾದ್ಳಾನು ಖಂಬು ಹಿಜ್ಜಾ಼ಥು ಅಯಿನ್ ಇವ್ಣ ಪೀಠೆ ಭೀರಿಗಯು. 20 ಯೊ ವಾದ್ಳಾನು ಖಂಬು ಈಜಿಪ್ಟ್‌ವಾಳನು ಇಟಾರಮಾಬಿ ಇಸ್ರಾಯೇಲ್ನ ಇಟಾರನ ಬೀಚ್ಮ ಆಯು. ಯೊ ಈಜಿಪ್ಟ್‌ವಾಳನ ಅಂಧಾರುಬಿ, ಇಸ್ರಾಯೇಲ್‌ವಾಳನ ರಾತ್ಮ ಉಜಾ಼ಳನಬಿ ದಿದೂತೆಖ್ಹಾಜೆ ಯೊ ರಾತ್‌ಅಖ್ಖು ಏಕ್‌ಜ಼ಣು ಖನ್ನೆ ಆವಾನ ಕೋಹುಯುನಿ. 21 ಮೋಶೆ ದರ‍್ಯಾವ್‌ನಪರ್ ಹಾತ್‌ಕರಾಖ್ಹತರ್, ಯೆಹೋವನೆ ಯೊ ರಾತ್‌ಅಖ್ಖು ದನ್ ನಿಕ್‌ಳ ಭಣೀಥು ಜಾ಼ಖ್ಹತ್ ವಹಿರೊ ವಾಗನಿತರ ಕರಿನ್ ದರ‍್ಯಾವ್ನ ಪಾಣಿನ ಎಕ್ ಬಾಜು಼ಮ ಧಕೇಲಿನ್ ಇನ ತಳ್‌ಮ ಖ್ಹುಕ್ಕಿ ಜ಼ಮೀನ್ ದೆಖಾವನಿತರ ಕರ‍್ಯೊ. ಪಾಣಿ ಬೇ ಭಾಗ್‌ ಹುಯು. 22 ಅಮ್‌ ಇಸ್ರಾಯೇಲ್‌ವಾಳು ದರ‍್ಯಾವ್ನ ಇಚ಼್‌ಮ ಖ್ಹುಕ್ಕಿ ಜ಼ಮಿನ್‌ಪರ್ ಚಾ಼ಲಿನ್ ಗಯು. ಪಾಣಿ ಇವ್ಣ ಡಾವಿಬಾಜು಼ ಅಜು಼ ಖಾವಿಬಾಜು಼ಮ ಭೀತ್‌ನಿತರ ಭೀರಿಗಯು. 23 ಈಜಿಪ್ಟ್‌ವಾಳು ಕತೊ ಫರೋಹನು ಘೋಡಾವ್ ಖ್ಹಾರುಬಿ, ರಥ್ ಖ್ಹಾರೂಬಿ, ಹತ್ತಿ ಚ಼ಲಾವವಾಳುಬಿ ಇವ್ಣುನ ನಖ್ಹಾಡ್‌ತು ಪೀಠೆ ಕರ್ತುಹುಯಿನ್ ಇವ್ಣ ಪೀಠೆಸ್ ದರ‍್ಯಾವ್‌ಮ ಆಯು. 24 ವ್ಹಾಣ್‌ಖ್ಹತ್‌ರೆ ಯೆಹೋವ ಯೊ ಆಗ್ನು ಖಂಬು ಅಜು಼ ವಾದ್ಳಾನ ಖಂಬಾಮಾಥು ಈಜಿಪ್ಟ್‌ವಾಳನ ದಂಡ್‌ಭಣಿ ದೇಖಿನ್ ಇವ್ಣಾಮ ಕಲಾವ್ಣಿ ಕರಾಯೊ. 25 ಯೆಹೋವ ಇವ್ಣ ರಥ್‌ಖ್ಹಾರನು ಚ಼ಕ್ಕರ್‌ನ ಕಾಡಿನಾಖಿ ದಿದೊತೆಖ್ಹಾಜೆ, ಈಜಿಪ್ಟ್‌ವಾಳು ಜಾ಼ಖ್ಹತ್ ವದೇಖ್ಹ್‌ಥಿ ರಥ್ ಅಖ್ಖಾನ ಲೀನ್ ಜಾ಼ವ್ಣುಪಡ್ಯು. ತದೆ ಈಜಿಪ್ಟ್‌ವಾಳು "ಅಪ್ಣೆ ಇಸ್ರಾಯೇಲ್‌ವಾಳನ ಖ್ಹಾಮೆ ಭಿರಾವನ ಕೊಉಷೇನಿ, ಮಿಲೈನ್ ಜ಼ಯ್ಯೆ ಯೆಹೋವ ಇವ್ಣಖ್ಹಾಜೆ ಅಪ್ಣಿ ವಿರೋದ್ ಜಂಗ್ ಭೀಡುಕರಾಸ್" ಕರಿ ಬೋಲಿಲಿದು. 26 ಎತ್ರಾಮ ಯೆಹೋವನೆ ಮೋಶೆನ, "ದರ‍್ಯಾವ್‌ನಪರ್ ತಾರೊ ಹಾತ್‌ ಪಾಡ್, ತದೆ ಇನು ಪಾಣಿ ಪಹಿಲೆನಿತರಸ್ ಅಯಿನ್ ಈಜಿಪ್ಟ್‌ವಾಳನಬಿ, ಇವ್ಣ ರಥ್‌ಖ್ಹಾರನಬಿ, ಹತ್ತಿ ಚ಼ಲಾವವಾಳನಬಿ ಡುಬೈನಾಖಿದಿಷೆ" ಕರಿಬೋಲ್ಯೊ. 27 ಮೋಶೆ ದರ‍್ಯಾವ್‌ನಪರ್ ಹಾತ್ ಪಾಡ್ಯೊ.ಅಜು಼ ವ್ಹಾಣ್‌ಖ್ಹತ್ರೇಸ್ ದರ‍್ಯಾವ್ನು ಪಾಣಿ ಪಹಿಲೆನಿತರಸ್ ಭರೈಗಯು. ಈಜಿಪ್ಟ್‌ವಾಳು ಛು಼ಕಿನ್ ನಾಶಿ ಜಾ಼ವಾನ ಕರ‍್ಯು. ಕತೋಬಿ ಯೆಹೋವ ಈಜಿಪ್ಟ್‌ವಾಳನ ದರ‍್ಯಾವ್‌ಮ ಧಕೇಲಿದಿದೊ. 28 ಪಾಣಿ ಪಹಿಲೆನಿತರಸ್ ಅಯಿನ್ ಯೊ ರಥ್‌ಖ್ಹಾರುಬಿ, ಹತ್ತಿ ಚ಼ಲಾವವಾಳನಬಿ ಇವ್ಣ ಪೀಠೆ ದರ‍್ಯಾವ್‌ಮ ಗಯುಥೂತೆ ಫರೋಹನ್ನ ಶಿಪಾಯ್‌ವಾಳನಬಿ ಡುಬೈನಾಖಿದಿದು, ಇನಾಮ ಏಕ್‌ತೋಬಿ ಬಚ್ಯುಕೊಯ್ನಿ. 29 ಕತೋಬಿ ಇಸ್ರಾಯೇಲ್‌ವಾಳು ದರ‍್ಯಾವ್‌ಮ ಖ್ಹುಕ್ಕಿ ಜ಼ಮಿನ್‌ಪರಸ್ ಚಾ಼ಲಿಗಯು. ಪಾಣಿ ಇವ್ಣ ಡಾವಿ ಬಾಜು಼ ಅಜು಼ ಖಾವಿ ಬಾಜೂ಼ಮ ಭೀತ್‌ನಿತರ ಭಿಯೂಥು. 30 ಯೊ ದನ್ಮ ಯೆಹೋವನೆ ಇಸ್ರಾಯೇಲ್‌ವಾಳನ ಈಜಿಪ್ಟ್‌ವಾಳನ ಹಾತೇಥಿ ಬಚಾಡ್ಯೊ. ಈಜಿಪ್ಟ್‌ವಾಳು ಮರಿನ್ ದರ‍್ಯಾವ್‍ನಿ ಕನಾರಿಮ ಪಡಿರ‍್ಹವಾನು ಇಸ್ರಾಯೇಲ್‌ವಾಳು ದೇಖ್ಯು. 31 ಯೆಹೋವನೆ ಈಜಿಪ್ಟ್‌ವಾಳಮ ಕರ‍್ಯೊತೆ ಶಕತ್ನ ಕಾಮ್ನ ಇಸ್ರಾಯೇಲ್‌ವಾಳು ಯೆಹೋವನ ದೇಖಿ ಡರಿನ್‌ ಇನಾಮಬಿ ಇನೊ ಸೇವಕ್‌ಹುಯಿರ‍್ಹೊತೆ ಮೋಶೆಮಾಬಿ ವಿಶ್ವಾಸ್ ರಾಖ್ಯು.